Rusiya tolışon Nəvuzə id ğeyd kardışone
Har sor dınyo bənə co keşvəron Rusiyadən Nəvuzə idi devləti səviyyədə ğeyd kardedən. İyo jimon kardə tolışon de ıştə ictimaiə təşkilaton vasitə ım idə tədbironədə fəal iştirakşon bedə.
İmsor martə manqi 20-minə ruji çe Yekaterinburği Tolışə Milliə Mədəniə Muxtariyyəti təşkil kardə Nəvuzə idə şodmonə tədbirən bənə har sornə de tənətənə dəvarde. Im tədbiri mehmonon, çe qurci diaspora “Sakartvelo” təşkilati sədr Nukri Çavleişvili, “Yezidı Urala” təşkilati sədr Deniz Rojkani, uzbəkon diaspora təşkilati idarə heyəti uzv Ənvər İskanov`i Nəvuzə idi çe Şərğ xalqon tarix və mədəniyyətədə oğətə rizon, muasirə zəmonədə ım xalğon bə yəndı həniən nez və mehribon kardeədə əhəmiyyəti barədə qəp jəşone, de ım şərafətinə idi munasibəti məclisi iştirakəkon təbrik kardəşone.
Məclisi orəxədə ce hırdənon arədə musabiğə dəvuniəşone. Yekaterinburği Tolışə Mədəniə Muxtariyyəti sədr Elşən Həsənovi bə musabiğə ğalibon hədiyyə edəştəşe.
Tolışon martə manqi 24-ədə Rusiya paytaxt Moskva şəhərədə dəvardə Nəvuzə şodmonə tədbirədən fəal iştirak kardəşone. De Moskva şəhəri hokuməti təşəbbusi təşkil bıə bə ım mərasim Tolışə diasporə təşkilaton devləti tərəfo rəsmən dəvət kardəşone. Tolışon ım idə tədbirədə iştirak kardə yekanə devlətış nıbə xalğ bıə. Çəmə xalği ğıryətmandə fərzəndon ım tədbirədə tolışə millət de ləyağəti təmsil kardəşone, bo əvon co bıə pavilyonədə tolışə etnoqtafik numunon, tolışə mətbəxi ləzizə hardəy və təamon numayiş kardəşone və bə mehmonon edaştəşone.
