Rusiya şiə icma sədron de Ayətullah Şeyx Əli Əkbər Haşimi Rəfsəncani vəfati əlağədar ıştə həmdardi izhar kardəşone
İron İslam Respublika yolə devlətə xadim, islam aləmi mübarizə şəxsiyyət, məşhurə dini alim, İroni nafkonə Prezident Ayətullah Şeyx Əli Əkbər Haşimi Rəfsəncani ıştə dınyo dəyqış kardəşe. Im yolə şəxsiyyəti vəfat Rusiya şiə ıcma üzvon arədən bə ğüssə səbəb bıə.
"Tolışi radio" müxbiri de Moskva şəhəri şion təşkilati sərdar Hacı Famil Cəfərovi telefon əlağə oqətəşe. Ey bə müxbiri votəşe ki, Şeyx Əli Əkbər Haşimi Rəfsancani dahi şəxsiyyət bıe. İroni nıpiə imperialist ğıvvon de Səddam rejimi dasti İron xalqi islami inğilabi nailiyyəti çey dastədə se cəhd kardə canqi nəticədə İroni iğtisadi inkişafədə xeyli problemon mevcud bıə vaxtədə, xalqi bey bənə diərovində siyasətmədari etimad nişon doşe, əv Prezident vıjnişe. Cey 8 sornə Prezidentəti vaxtonədə hokuməti bə hırdə biznes fəaliyyəti doə azadi və bey tənəvəc mande nəticədə məmləkəti iğtisadiyyat çe behraniku beşe və bə yolə inkişafi nail be. Haci Familı ımən əlavə votışe ki, 2000- minə soron əvvəlonədə de ım ğədər sandinə tarixi şəxsiyyəti həmsehət be boştə yolə şərəf hisob kardedə. Əv ışətən Şeyx Əli Əkbər Haşimi Rəfsəncani bənə qıley praqmatik, yəni metədil qıley müdriki bə yod vardedə, çey bə rəhmət şe bo çəmə həmə şiə aləmi qıley ğəm hisob kardedə.
Yekaterinburğ Şiə icma sərdar Kərbəlayi Emin Qənciyeviən votışe ki, Şeyx Əli Əkbər Haşimi Rəfsəncani vəfatiku vey mütəəsir be . Ğeyd kardışe ki, əv İslam aləmi mübariz tarixi şəxsiyyətonədey. Bə şah despotik rejimi əleyh mübarizə əbey. Çand soron həmonə rejimi zindonədə bıə. Zindonədə 20 cildədə ibarət Ğırone-Kərimi Təfsir nıvıştəşe. Xoş məramin, həmişə bə dialoqi tərəfdar qıley yolə siyasətmədar şəxsiyyət bıe.
Rusiya şion icma ım dı nəfər sərdaron ıştə qəpi orəxədə de İron İslamə devləti jıqo tarixi şəxsiyyəti vəfati əlağədar bə həmə şiə cəmiyyəti ıştə həmdardi izhar kardışone.
