İmom Huseyni nom dılon miyono rabitə bərğərorəkəy.
Əsolım tolışə şəhri cımə İmom votışe: Koronavirus həm bois nıbıə ki İmom Huseyn(ə)-i num iyən yod dılonku məhv bıbu.
Bə Tolışi Rədio raporti əsos, huccətul islam vəl muslimin Cəvad Bağıri zinə çı Əsolım tolışə şəhri cımə nımoji xutbəonədə, Ərbəinış Xıdo tərəfo bə İmom Husey(ə)-i doə məxsus emtiyuz və qıləy İlahi hədyə bə hisobış varde və votışe: faxti Seyyeduş-Şuhəda(ə) de ixlosi ıştə coni xıdo royədə təğdimış karde, Xıdo həm de şəhodəti mukafati bəy ehtırom karrdışe və Ərbəini bo ə Hətrət bənə məxsusə ruji ğəror doşe.
Əv Ərbəini ziyorət iyən Kərbəloədə anədə milyoniyə zairon iştiroki çı İmom Huseyn(ə)-i num iyən Aşura mədəniyəti bəjiəkə amil bə hisobış varde.
Əsolım tolışə şəhri cımə İmom əlovəş karde: har çənd ki bə Koronavirusi xoto iyən dəvardə 2 sori mıddətədə Ərbəini ğeyri İrağıjə zaironku kam be əmmo İmom Huseyni(ə)-i num ijən çand milyon dıli bəştə tərəf cəlb kardedə və de Xıdo rabitə bərğəroəkəy.
Ostoro cımə imom həm zinə ın sərhəd şəhri cımə nımuji xutbəonədə Ərbəine Huseyni mərosimi çı İslom dınyo izzət və zumandəti iyən həmməy ozodəti tələb kardə milləton simvol bə hisobış varde.
Huccətul islam vəl muslemin Kazim Hafizniya umudvarətiş karde ki dınyo çı Koronavirusiku xilos bey bəpeşt, ijən Ərbəine Huseyni mərosim de Seyyeduş-Şuhəda(ə) aşiğon milyoniyə iştiroki bərpo bıbu.
2 sor çimi bənav və dınyoədə Korono pandemik şəroyeti bino nıbey zəmonədə 3 milyon nəfəriku vey İronıj əcumlə 52 həzo nəfər Qilonıj Kərbəloədə Ərbəine Huseyni mərosimədə iştirok kardeyro bə İrağ səfər kardə bin.
Səfə manqi 20, Sentiyabri 27, Kərbəloədə İmom Huseyn(ə) və çəy bəfodorə əshobi şəhodəti çılım ya xod Ərbəinə ruje.
De həminə mınosibəti hasor çand milyon zair bə Kərbəlo şedə bin ki bə Korona pandemik şərayeti xoto İrağ ımsornə zairon səhmiyə miğdori vey kamış kardə.
