De Qilonıjə mırəbbi hidoyəti İroni jenon futbol milli kamanda bə Asiya çempionati oxonə mərhələ ovaşte.
İroni jenon futbol milli kamanda de Qilonıjə mırəbbi xanım Məryəm İrandusti hidoyəti i minnə kərə bə Asiya çempionati oxonə mərhələ ovaşte.
Bə İrna raporti əsos, İroni jenon futbol milli kamanda çı Asiya çempionati muğəddəmə hənəkonədə ki Uzbəkistonədə dəvordoniyə bəy ıştə qurupiku bənə i minnə kamanda bə Asiya jenon futbol çempionati oxonə mərhələ ovaşte.
Qilonıjə mırəbbi xanım Məryəm İrandust İroni jenon futbol milli kamanda ləyoğətinə mırəbbie ki de çəy erjinə hidoyəti həminə yolə mıvəffəğiyət bənə İroni tarixədə i minnə kərə kəsb be.
İroni jenon futbol milli kamanda həminə mərhələdə de 5 bə 0 Bənqladeş iyən penalti zərbəonədə İordaniya milli kamandaon badışe və omə sor Hindustanədə bıə Asiya jenon futbol çempionati oxonə mərhələ rəğabətonədə iştirok bəkarde.
Tojə soronədə Qilonıjə kinə iyən jenə futbolistonku veyni bənə hənəkəkə və mırəbbi çı İroni futbol iyən futsal sahədə yolə muvəffəğiyəton kəsb kardəşone.
Isət sıvoy Məryəm İrandust, Qiloniku xanım Məryəm Azmon həm çı İroni 20 soriku bə kam bıə kinəon futbol milli kamanda mırəbbie.
