Dionədə ro problem
Ostoro rayoni Əzəru diy Tolışə bandon haymədə Taxtənəkon – Torədi avtomobil royku 2 kilometr kənoədə ğəror ğətəşe
2 həzo nəfər sakin hestışe. Im 2 kilometr roy bərbod vəziyyətədə bıe bo əhali xeyli mışğılon bə əməl vardedə. Otəşokuşniə, Təcili tibbi koməkə maşinon bə di omeku imtina kardedən. Diy əji Yusif Nurəliyev votedə ki, bə muvafiğ təşkilaton muraciəton kardəşone, əmo nəticəş bıə ni. Im di çe şəhid Pəncəli Teymurovi perəsə die. Bə çey ğəbi ziyarət oməkəson vey kərə ım roy ğət karde mumkun nıbe səbəbiku nimə roədə mandedən.
Əzəru bə Əsxənəkon diy inzibati ərazi daxile. Çey numayəndə Səlahəddin Əliyevi bə “Sputnik Azərbaycan”i muxbiri votəşe ki, hələ 2018-minə sori bə İğtisadi İnkişafə Vəzarəti çe Əsxənəkon inzibati ərazi 10 qılə diy 18 kilometrinə daxili roon bə səhmon dəğande barədə layihə təğdim kardəmone. Tosə ısət hələ ki, qıley rəsmi cəvob sə nimone. Keynə imkan bə əməl bo, ım problemi həll bəkardemon.
Bənə bımi qıley co problem Tovuz rayoni mərkəziku diəromandə Həsənli, Məşədivəlilər, Sarıdamlı dionədən mevcude. İşkil bımədəy ki, bə ım dion şə ro çe ruyku dəvardedə. Va-voşə mevsum bino bıəcəğin bə ım ru ovayz omedə, ım dionədə jimon kardə 4 həzo əhali de rayon mərkəzi əlağə ğət bedə. Məşədivəlilərıj İlham Rzayev votedə ki, çəvon diy ğəbıston çe ruy çətonədəy. Ovayz omeədə əvon ıştə mardəyon 2-3 ruj dəkande imkaniku məhrum bedən. Mol-mələon, hətto kali kərə maşinonən ovayz bardedə. Həsənli diy əji Bayram Əliyev qəp jedə ki, çe Yolə Ğışləğ və Çatax diy əhaliən çe ım royku istifadə kardedə. Çunki çəvon kaşteko kardə zəminon ruyku bı təfədəy. Ovayz omeədə umumən 18 həzo nəfər əhali quzəron bə mışğıl eqınidə. Im dion cəmiyyəti bə çand bəjəm bə penə idarəon ruy səpe qıley pard inşa karde həxədə muraciət və xahişon vığandəşone, əmo ımon həmə besəmər mandən.
İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.
