Seyd Həsən Nəsrullah: məntəğə hadisəon bə mığovimət cəhbə mənafe əsose.
Livani Hizbullah sədr votışe: məntəğə hadisəon bə mığovimət cəhbə mənafe əsose iyən Suriyədə bıə mısəlləh qrupon məhv bey holədən.
Bə İrib aqentəti raporti əsos, Seyd Həsən Nəsrullah zinə ıştə sıxənonədə məntəğə ısətnə vəzyəti bə mığoviməti mehvəri nəf zınəş be və votışe: məntəğə hadisəonku kəsoni sui-istifodə karde fikədən ki bəpe jığonə fəaliyətonku bə kəno bıbun.
Livani Hizbullah fərmondə bə Suriyədə hadisəon iyən terroriston məğlubiyət işorəş karde və votışe: Suriyədə canq çı məntəğə ısətnə və tale canqe ijən ımruj Suriyə cənubədə həm terroristiyə qrupon məhv beyku nışonəon vindənin heste.
Əv ijən tələb karde Suriyə avarəon dovtələbonə və əmn bə ıştən kişvər oqardon ijən Hizbullah həm ım mıvzoədə bo komək karde hozzoe.
Livani Hizbullah sədr bə Suriyə sərhədədə dəvardə rujonədə bə İraği mığovimət qrupon həvoiyə həmləon işorəş karde və votışe: Suriyə və İraği mərzədə bə mığovimət qrupon həmlə bəpe becəvob nımando.
Seyd Həsən Nəsrullah ıştə sıxənon idomədə, bə ətomiyə sazışiku Amerkə xarıc bey işorəş karde iyən votışe: ım təvafuğiku Amerkə xarıc bey, İroni təhdid karde ijən bə sanksiya dənoe "əsri əməliyot" ya həmonə "ğərni muamilə" çərçivədəy ki çəy hədəf iyən niyyət Fələstini məsələ barədə hisob-kitobi əvəz kardeye.
Seyd Həsən Nəsrullah ıştə sıxənnon co baxşədə Livanədə dıvləti təsis karde prosessədə təxiriku tənğidış karde və votışe: dıvləti təsisədə bə vıcud omə təxiron bə prinsipon nıbey vabəstəy iyən bəpe mıvzoon hədd mıəyyən bıbu.
Livani Hizbullah sədr təkidış karde: vəzarətxanəon bəpe bə parlamenti səçıni nəticəon əsos yaxot mıəyyənə partiyəon iyən cəmaəti dılədə məğbuliyət mizon ıştə tələbonku kam bıkən ta Livani dıvləti de sorəti təsis bıbu.
