Seyd Həsən Nəsrullah: Tramp oşkor iyən de təhğir zivoni ğarətkorəti kardedə.
Livani Hizbullah rəis votışe: Amerkə navnə dıvləton de diplomatikə şivə və de ehtırom metodi ğarətkorəti kardə bin, əmmo Donald Tramp oşkor iyən de təhğir zivoni bə ğarətkorəti məşğule.
Bə İrna raporti əsos, Livani Hizbullah sədr Seyd Həsən Nəsrullah zinə əsr Şəhid Emad Moğniyə( Livani Hizbullah qurupi qıləy ali kamandanon) inə Amənə Səlame bəfot mərasimədə bə Ərəbistoniku Amerkə prezident Donald Trampi sue istifodəon işorəş kardə və votışe: İslamiyə kişvəron bəpe Trampi sixanonku ki çand kərə votəş be əqə Amerkə nıbu Ərəbiston həm məhv bəbe, ibrətışon bıbu.
Seyd Həsən Nəsrullah Donald Trampi təhğiron vədə bə Ərəbiyə kişvəron xususi Səudion reaksiya işorəş kardə və votışe: əvon həminə beədəbə sıxanon vədə fəğət sırı, təhğiri ğəbul iyən sukut karde ıştəniku nışo dodən.
Livani Hizbullah sədr təkiş karde ki İron İslam Respublika, hiç vaxt çı hakımiyəti barədə de hiç kəsi nibəkay, əlovəş do: ım ki Trampi bəyon kardəşe İroni karde bəzne 12 dəğiğə mıddətədə Miyonə Şərği kontorol bıkə, çı İroni əzəmət və ğudrəti nışonəy.
Seyd Həsən Nəsrullah məntəğə kali kişvəronədə tars icud kardeku Trampi hədəfi çimiku vey siloh həvote elanış karde iyən Farsi dıyo hamsoyə kişvəron hakimonku tələbış kardə deştə milləton aşti bıkən və bə çəvon tələbon diğğət karde çəvon mışkolon həl bıkən.
Livani Hizbullah rəis İjən Livanədə Hizbullah rəket silohon barəd bə sionist rejimi i-nə vəzir Benyamin Netanyahu tojə iddion işorəş kardə və əlovəş do: Netanyahu iddio bıə vırəonku Livani xarıci vəzarətxonə vindemon sionist rejim i-nə vəzir iddion du bey nışoş do.
Seyd Həsən Nəsrullah həmçnin Şəhid Emad Moğniyə moə naxş iyən şəxsiyyəti barədə votışe: Ummi Emad, vey yolə kamandaon bə Livanədə bıə mığoviməti təğdimış kardə.
