Ğətər tələbış karde ki sionist rejimi işğalçiyəti sə bıbu
Imruj İ Bıə Milləton Təşkilatədə Ğətəri daimə nımoyəndə votışe: israil bəpe ərəbi kişvəron sərzəminon bənə Suriyə Colan bandəkuon, Livan iyən Fələstini ərazi işğali orəx bıdə.
Bə İrna raporti əsos, əmniyyət şura dıvrəiyə iclosədə, İ Bıə Milləton Təşkilatədə Ğətəri daimə nımoyəndə Oliya Ale-Sani votışe: 2 qılə mıstəğilə dıvləti icod bey çı Fələstini mıvzoero vey çokə hələkə roy bə hisob omeydə.
Əv həmçınin bə qədə şəhron soxtey vey təcili be hərəkət kardey zərrurəti, Fələstinıjə avarəon oqardey, Fələstini milləti torixiyə həxon oqətey və Fələstini mıstəğilə kişvəri icod kardey təkidış karde.
Əv bə həminə vırə rəsey vey çokə roy, 2 tərəfon miyono muzakirə əncom bey zınəş be iyən votışe: beynəlxalğə ictima bəpe həmmə məsələon həll kardey iyən sulhi prossesi hoston kardeyro, həmmə koon əncom bıdən.
Ğətəri Im diplomat ijən işorəş karde ki bə oxonə hələkə roy rəseyro Ğudsi şəhr vey muhimmə məsələonku bə hisob omeydə və votışe: ım şəhrədə bə məsihi iyən islami muğəddəsə vırəon oqəte və çəy rişə əvəz nıbey təkidış kardə.
