Məntəğə təhəvulaton təğib kardey, Əmirəbdullahiyan iyən Seyd Həsən Nəsrullah votımoni mehvər
İroni xarıci vəzir Huseyn Əmirəbdullahiyan de Livani Hezbullah muğavimət təşkilati yol Sed Həsən Nəsrullah vindemon iyən votımonış karde.
Bə İran Peres aqentiyəti raporti əsos, Im vindemonədə ki de Livanədə bıə İroni səfir Muctəba Əmani iyən İroni xarıci vəziri bə ico bıə heyət həm iştirokışon be, İroni xarıci vəzir iyən Livani Hezbullah muğavimət təşkilati yol məntəğə oxonə təhəvulaton barədə xususi, Livan iyən Fələstini barədə deyande votımonışon karde.
Həmçınin ım vindemonədə, beynəlxalğ və məntəğə tojə təhəvulaton iyən hodisəon vədə, muğaviməti mehvəri hozzoəti iyən sionist rejimi təhdidon barədə votımon be.
İroni xarıci vəzir ki deştə ali heyəti bə ico bə Livan səfərış kardə bə ın kişvər varid bey zəmonədə votışe: bə Livani xarıci vəziri dəvəti əsos, iyən de məntəğə, beynəlxalğə və 2tərəfiyə məşvərəton əncom doey ijən Fələstini oxonə təhəvulaton təğib kardey hədəfi bə Beyrut oməm.
Əmirəbdullahiyan ijən əlovəş karde: İron İslom Respublika de zumandəti bə Livanədə muğavimət, ərtış, dıvlət və millətiku ıştə himoyəon dəvom bədoy.
İroni diplomatiya təşkiloti yol ijən təsdiğış karde: Livani həmmə siyasi cərəyononku dəvət kardedəmon ki votımon iyən təvafuği royku ıştə prezidenti vıjniye və siyosi prosseson komil kardey əncom bıdən.
İroni xarıci vəzir ijən təkidış karde: Livanədə bıə muxtəlifə siyosi cərəyanon ləyoğətin iyən bə xarıci mıdoxilə hiç ehtiyocışon nıbıə şəroyetədə ıştə tojə prezidenti bəvıjnın.
Tosə bə ısət, Livani ğanun noə kəson 6 sori dıvrə sə bey bəpeşt, Mişel Oniro caneşin vıjniye koy barədə bə təvafuğ rəsəşon nin, ki ım mıvzo Livanədə siyasi bohrani əlovəş karde iyən niqəronioni bois bıə.
