Rəyisi: Dəməşğədə həmləon məsuliyət bə terroriston xarıcion himoyə əkəyon ohdəy
İron İslom Respublika prezdent, Suriyədə terroristiyə həmləon məsuliyət bə terroriston xarıci himoyə əkəyon əcumlə ım kişvəri sərzəminon işğolçiyon zınəşe.
Pencşəmbə rujədə , Suriyə ğərbi Homs ostanədə canqi univesti əfsəron təlimi mərosimədə terroristiyə qrupon de dron vositə həmlə kardışone.
Suriyə səhiyyə vəzorətxonə elanış kardə: ım terroristiyə həmlədə 89 nəfər kıştə iyən 277 nəfər həm zəxmin bıən.
Həminə cəhətədə iyən bə devləti məlumatərosnə mərkəzi raporti əsos, zinə cımə rujədə, İron İslom Respublika prezdent, Seyd İbreym Rəyisi qıləy mesaj ğolibədə bə Suriyə prezdent, devlət, ləşkər iyən millət ım terroristiyə hodisə təsliyət votey bəpeştə nıvıştəşe: dəvardə manqon mıddətədə Suriyədə terroristiyə hərəkəton iyən həmləon dəvom bə ım illəte ki terroristonku kəşfiyot, əmniyyət iyən locestiki himoyəon dəvom peydoş kardə və ım himoyəon ım kişvərədə komilə əmniyyət və stabiləti icod bey vəy qətey hədəfi əncom bıdə.
Rəyisi ijən əlovəş kardə: Suriyədə DAEŞ iyən təkfiri terroriston əməliyoton iyən jimoni dəvomiro çokə çəroyet icod kardey, qıləy hamcəhətə hərəkəte iyən bə Suriyə milli hakımiyəti ələyh sionist rejimi təcavuzon cəhətədəy.
İron İslom Respublika prezdent ijən əlovəş kardə: beşək ım ğamqinə hodisə məsuliyət, terroristiyə qrupon xarıci himoyəon əcumlə Suriyə sərzəminon işğolçiyon ohdəy, əvoni ki de terroriston təsirinə mubarizəon iyən bə Suriyə ərzi təmamiyyəti milli hakımiyəti hərəkətonku vəy qəteydən.
İron İslom Respublika prezdent ijən təkidış kardə: beynəlxalğə rəsmi şəxson təşkiloton xususi İ Bıə Milləton Təşkiloti əmniyyəti şura bəpe ım barədə ıştə məsuliyəti əncom bıdən.
