"Ğudsi Ruji" çe sionistə rejimi tojə cinayətə hərəkəton
İyunə manqi 8-ədə dınyo xeyli məmləkətonədə "Ğudsi ruj" dəvarde. Im keşvəron mısılmonə umməti bə imperializmi, bə zulmkar və işğalqərə rejimon ıştə etiraz de şuar və barzə vanqon bəyon kardışone. Jıqo etirazə aksiya həmən Ğəzza de Fələstini işğal bıə ərazion sərhədədən vağeə bıe.
"Maide.az" xəbə dodə ki, sionistə rejimi fələstinıjon ım tədbir qoluləbaran kardəşe. Im cinayətə hərəkəti nəticədə 4 nəfər aksiya iştirakəkə şəhid, 117 nəfər de qolulə yarəjə bıən. Çəvonədə 9 kəsi vəziyyət qone. Fələstini Səhiyyə Vəzarət məlumat dodə ki, marti 30-minə rujiku bino bıə etirazə aksionədə 120 nəfər şəhid bıə ki, çəvonədə 13 nəfər kamsınninə hırdən, 2 nəfər şəfğətə hovə, 2 nəfər jirnaliste. 13 həzo nəfərisən vey odəm yarəjə bıə ki, çəvonədə 7451 nəfər qolulə nəticədə zəxmin bıən.
"İslamınsesi.info" sayt Avropa devlətonədə dəvardə "Ğudsi Ruj"i aksionədə ortodoks yəhudion "Neturey Karto" cərəyani uzvon iştirak bəştə əhandon nəzə rosniəşe. Im təşkilat 1938-minə sori onoə bıə. Çey uzvon sioniston yəhudi hisob kardedənin. Votedən ki, əvon bə fələstinıjon kardə zulmi bəraət doe ro dinku bənə vasitə istifadə kardedən.
Azərbaycanə Respublika İslamə Partiyan "Ğudsi ruj" de fəal siyasiə hərəkəton ğeyd kardəşe. Bokuədə İsraili səfarəti vədə etirazə piket dəvuniəşone, polison mudaxilə bəvon imkan doə nişe ki, ım aksiya ğətnamə bə səfarəti təğdim bıkon. Im tədbiri 26 nəfər iştirakəkə polison tərəfo dəstqir bıən. Partiya uzvon həmonə ruji həmən Şəhidon Xiyaban ziyarət kardəşone, ğəbon səpe vılə çanqon noəşone.
