Pars Today

Şəbanə manqi 3-minə ruj çe Məhəmməd peyğəmbər (s.ə.v.s.) qiramə nəvə, İmom Əli (ə) və Fatimə (ə) fərzənd, mısılmonon 3-minə imom həzrəti İmom Huseyn (ə) mevludə ruje.

İmom Huseyn (ə) hicrəti 4-minə sori Mədinə şəhərədə bə dınyo omə. Iştə umri 6 sor deştə bobo Peyğəmbər (s.ə.v.s.) i vırədə dəvuniəşe. Peşonə 30 sor de ıştə pıə həzrəti İmom Əli (ə) i devrədə jimon kardəşe, de ey bahəm islami təbliğ və ədaləti bərğəror bıe roədə mubarizə bardəşe. Çe həzrəti Əli (ə) şəhadəti bə peş bə İmom Həsən (ə) beyət vardəşe. Peş Həzrəti Həsən (ə) şəhadəti bə imoməti məğam ros bıə. Çe hicrəti 61-minə sori Məhərrəmə manqi 10-də deştə əshabə bə ico Kərbəloədə çe Yezid ibn Muaviyə ləşkəri tərəfo şəhid kardə bıə.

İmom Huseyn (ə) jimoni həmə məğamon ğəhrəmanəti və şucaəti məktəbe. Çey jimon əsron dırozi har sor dınyo mısılmonon, Azərbaycani mısılmononən əz cumlə, tərəfo bənə fədakarəti simvoli de ehtirami bə yod vardə bedə. Har sor məhərrəmə manqədə Əhli – beyt (ə) məktəbi tərəfdaron bə İmom Huseyn (ə)  ıştə məhəbbəti de yolə əzəməti həmə dınyo ictimaiyyati vədə numayiş kardedən.

Azərbaycani İslamə Partiya de ım mubarəkə ruji munasibəti Azərbayçani xalğ, həmən dınyo mısılmonon təbrik kardəşe.

De ım Partiya sədri əvəz Haci İlhami imza bə “ Fakrxəbər.com” sayti daxil bıə həmonə bəyonatədə votə bedə ki, ıştə jimoni bə zulmi və behəxiəti mubarizə sərf kardə İmom Huseyn (ə) ım mubarəkə mevludə ruji mısılmonə cəmiyyət de ehtirami ğeyd kardedə. Çey xoto bo azadixahə insonon və cəmiyyəton bə səbəb əziz və muğəddəse, bə qorə ey de məhəbbəti bə yod vardedən ki, əv ədaləti roədə əzm, mubarizə və rəşadəti qıley həmuş nıbə ruşnəy.