Tokiyoədə İroni xarıci vəziri vindemonon.
İroni xarıci vəzir Tokiyoədə de Yaponiya i minə vəzir vindemon iyən məntəğə, beynəl xalğ iyən ətomiyə sazışi barədə sohbətış karde.
Şin Zoabe ım vindemonədə bə de İron əloğəon oqəte xoto Yaponiya səy və iradə təkid və işorəş karde: ətomiyə saziş qıləy muhimmə muğavilə be ki bəpe oqətə bıbu.
Yaponiya i minə vəzir ijən Miyonə Şərğədə bıhranon dəvom peydo karde barədə ıştə niqərani ka və bə ım məntəğə əmniyyəti oqəte xoto bə İroni rol vırə təkidış karde.
İroni xarıci vəzir ijən ımroj de Yaponiya xarıci vəzir Tarokano vindemon karde ətomiyə sazışi barədə suhbətış ka.
Muhəmməd Cəvad Zərif ım vindemonədə votışe: Amerkə anti İron sanksiyaon şiddətin bey nohəx iyən ğeyri ğanuniye.
Tarokano həm bə İron-Yaponiya miyono əloğəon nığıləti işorəş ka və İroniku pidəş be ijən ətomiyə sazişədə bemando.
Zərif ki zinə bə Yaponiya varid be de Yaponiya rəsmi şəxson vindemon karde bəpeştə məntəğə şərayeti barədə bə Amerkə canqtələbə siyasəton dəvom işorə və təkidış ka: İron məntəğədə bıhran icod kare pidəş ni əmmo ıştə mənafeku de zumandəti mudafiə bəkay.
İroni xarıci vəzir bə Yaponiya varid bey faxti ım səfəri qıləy muhimmə hədəfon Amerkə bıhran icodəkə rəftoron barədə de Yaponiya məslehət karde elanış ka.
