Əfğanistoni behron siyasi cəhəto həl bənine.
İroni xarıci vəzarətxonə sıxanəvot votışe: çı Əfğanistoni mışkilat iyən behronon ğəti hələkə roy siyasi votımononin.
İroni xarıci vəzarətxonə sıxanəvot Səid xətibzodə ımruj onlayn xəbə iclosədə bə dəvardə haftədə Əfğanistoni milli əmniyət mışovir, Həmdullah Muhibbi bə Tehron səfər karde işarə iyən əlovəş karde: çı Əfğanistoni mışkilat iyən behronon ğəti hələkə roy siyasi votımononin ijən de diğğət bə ım kişvərədə bıə Amerkə bestabiləkə siyosəton İron həmməy siyasi qurupon bə hevujə votımoni dəvət kardeydə.
Əv ətom sazişədə mandə kişvəron toja virtual iclosi barədə həm votışe: həmonə iclisədə İroni xarıci vəzir Muhəmməd Cəvad Zərif, co tərəfon qiədə bıə ehdəmononış bə yod varde.
İroni xarıci vəzarətxonə sıxanəvot İrağiku qıləy heyəti bə İron səfəri barədə həm xəbəş do ki: İraği i minnə vəziri mışovir de İroni rəsmə dəvəti bə Tehron omə ta məntəğə təhəvvolaton barədə sohbət iyən muzakirə bıbu.
Əv İroni siyosətonış bə hamsoyəti iyən dustiyəti əsos zınəş be və votışe: Amerkə çəmə hamsoyə kişvəronış noəmn kardəşe və İron həm vey kərə bəştə hamsoyə kişvəron nota doəşe ki Amerkə hakimə qərdənkəşə dıvləti anti İron xərobkaranə hərəkəton vədə bə i bıə milləton təşkilati ğanuni əsos reaksiya nışo bədamon.
İroni xarıci vəzarətxonə sıxanəvot Səid xətibzodə Şəhid Ğasim Suleymani barədə İraği nakonə i minnə vəziri sohbəton reaksiyadə həm votışe: Qeneral şəhid suleymani məntəğədə vey sulh icodəkə fərmondə be ki vəhabizm cinoyətkorə qurupon iyən terrorçion miyoniku bardey çəy irs mandə çi be.
Əv Şəhid Suleymani terrori çı Amerkə vey yolə steratejik səhvə ko bə hisobış varde və təkidış karde: Amerkə dıvlətədə bıə lm yolə cinoyəti əmr kardə kəson iyən icraəkəyon, hukmən ədoləti məhkəmədə bəpe ıştə ko ağibət və nəticə bıvindon.
