Dınyo keşvəronədə mısılmonon Məhərrəmə manqi əzadarəti barz dəvunişone.
Mısılmonon dınyo har keşvəronədə ki, jimon kardedən, de Məhərrəmə manqi əzadarəti barzə səviyyədə dəvunie roy bə İmom Huseyn (ə) və bə çey əsabaon, ıştə məhəbbət və ehtirami, həmən bə Əhli beyt (ə) məktəbi idealon ıştə sadiğəti numayiş kardedən
Diə məkəmon ki, de koronavirusə pandemiya əlağədar bə kutləviə aksion dəvunie məhdudiyyəton hestin, ımsorən Əhli beyt (ə) məktəbi aşığon Kərbəlo şəhidon xatirə de əzəməti ğeyd kardışone.
Maide.az bə “Leader.ir” sayti istinadən xəbə doşe ki, Həzrəte Əbaəbdollah Huseyn (ə) matəmə rujonədə İmom Xomeyni (r.ə) nominə huseyniyyədə təşkil bıə matəmə mərasimədə Ali Rəhbər Ayətullah Seyid Əli Xameneiən iştirak kardəşe. İroni həmə məntəğəonədə Kərbəlo şəhidon matəmə mərasimon dəvuniəşone. Kərbəloədən matəmə mərasimon təşkil bıən, Əhli beyt (ə) aşığon bə İmom Huseyn (ə) və bə Həzrəte Əbəlfəzl (ə) hərəmi tərəf şemon kardəşone , əyo əzadarəti dəvordıniəşone.
Rusiya şəhəronədə jimon kardə azərbaycanıjə muhacironən əzadarə məclison barzə səviyyədə təşkil kardəşone. Çıvrey hokuməti de kovidi əlağədar bə kutələviə tədbiron ğədəğə və məhdudiyyət noəş ni. Imsor Rusiya məntəğəonədə İmom Huseyn (ə) aşiğon asudə və bemaneə əzadarə tədbiron təşkil kardəşone. Yekaterinburğ şəhəri dı qılə məçitədə Məhərrəmə manqi iminə rujiku əzadarəti mutəşəkkil surətədə dəvuniə bıə. Moskva, Sankt-Peterburğ, Tumen, Novokuznetsk, Noyabrsk və həniən co şəhəronədə Əhli beyt (ə) aşığon təşkil kardə əzadarə məclison xeyli əzəmətin dəvardə.
Tasua və Aşura şemonon və mərasimon London, Nyu York, çe Turkiyə İğdır, Pakistani Kəraçi, Hindistani Kəşmir vilayətədə, Avstraliya Sidney, Melborn şəhəronədə vağeə bıə. Kabilədə ki, hakimiyyət bə “Talibon” dast ovaştə, bə Kərbəlo şəhidon xatir şemonon təşkil bıən, ım tədbiron əmniyyət tojə hokuməti təmin kardəşe.
Az.R məntəğəonədən diə məkəmon ki, Boku hokuməti ımsor bə Məhərrəmə manqi əzadarəti maneon həniən vey kardəşe, ım tədbiron dəvunie mumkun bıə. Boku məcitonədə hokuməti bə jıqo məclison dəvunie tosə saat 21 , de 50 nəfərisən vey nıbe şərti icazə doəşbe, şəhəri əhali ıştə kəon vədə İmom Huseyn (ə) ehsan bə ro dəvardon edaştəşone. Lankoni , Masəlu rayoni dion məçitonədən əhali bə hokuməti noə ğədəğon pape bıə ni, bə Tasua və Aşura əzadarə məclison dəvune nail bıən.
İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.
