Rusiyəku Ermənistoni himoyəon.

Avropa Şuraədə çı Rusiyə həxi ləğv karde Ermənistoni tərəfo nomınosib zınə bəy və dəy muxalifət be.

Bə Sputnik raporti əsos, Ermənistoni Xarıci vəzorətxonə de qıləy bəyoniyə sadir kardey vositə təkidış karde ki Ermənistoni nəzəku Avropa Şuraədə çı Rusiyə həxi ləğv karde qıləy ko heste ki bəpe təhdid şəroyetədə iyən co əbzaron ko nıkarde bəpeşt istifodə bebu, çən Erməniston de jığo bə Rusiyə fişar varde muxalife.

Avropa Şura tojədən elanış kardə be ki mıvəğğət surəti ım təşkilotədə çı Rusiyə həx ləğv bıə əmmo ın kişvər həmçenan bənə Avropa Şura uzv ko karde bəzne.

Həminə ğəroli barədə sədo qırdə karde zəmonədə Erməniston və Rusiyə mənfi sədo doşone iyən Azərbaycan Respublika və Tırkiyə iclosədə nıbin.

In ğərol de 42 qılə mısbətə sədo təsdiğ bıə.

Ukrayna iyən Avropa şərğ məntəğə kişvəron daxıli məsələon iyən əmniyəti koonədə Amerkə və Nato mıdoxiləon ki veyni de anti Rusiyə hərəkəton dəvom kardedə be oxoy sə Rusiyə prezident Putini tərəfo bə Ukrayna həmlə karde əmri  sadir kardey bois bıə.

Rusiyə elanış karde ki ın əməliyot canqi bino bey məno ni boçi ki Rusiyə pidəşe dınyoədə yolə mıhoribəon vəy bıqəti.