Rusiya mısılmonon Rujə İd ğeyd kardışone.
De Miladi təğvimi mayə manqi 2-minə ruji Rusiya mısılmonon Rujə İd ğeyd kardışone. De ım munasibəti Prezident Vladimir Putin keşvəri mısılmonon təbrik kardışe, votışe ki, mısılmonon deştə fəal iştiraki çe Rusiya ictimai jimondədə sulh və mədəni, həmən dini həmahəngiəti təmin kardedən
Prezidenti ımən ğeyd kardışe ki, Rujə İd çe humanistə idealon, mərhəmət və təğiyə simvole, insonon bə ali mənəvi keyfiyyəton dəvət kardedə. Rusiya Sər vəzir Mixail Mişustiniən ım əzizə rujədə bə mısılmonon təbrik votışe, həmən Rusiyadə mısılmonə umməti çe keşvəri xalğon və konfession arədə dustiəti və mehribançiəti sahədə xidməton ğeyd kardışe.
Moskva şəhəri Cumə məçit və çey ətrofədə 150 həzo odəm bə İdə nomoj qırd bin. Rusiya Mısılmonon Dini İdarə və Muftion şura sədr şeyx Ravil Qaynutdin`i xutbə ehandışe, həmə mısılmonə ummət de İslami ım şərafətinə idi munasibəti təbrik kardışe.
Rujə İd çe Rusiya co vilayətonədən ğeyd kardəşone. Bə TASS İnformasiya Aqentiyyəti doə xəbə istinadən Sankt-Peterburği Rujə İd mərasimədə şəhəri Cumə və Primor rayoni məçitonədə 250 həzo mısılmoni iştirak kardəşe. Im məlumat bə jurnaliston çe Sankt-Peterburğ və Şimal -Ğərb peqioni Mısılmonon Dini İdarə sədr Ravil Pançev`i doəşe. Oubernator Aleksandr Beqloviən bə mısılmonon de ım idi munasibəti təbrik votəşe.
Vladivostok , Ekaterinburğ şəhəronədən Rujə İdi mərasim barzə səviyyədə dəvardə. Im reqionon hokuməti, həmən dini rəhbər odəmon bə mısılmonon muraciət ehandəşone, çəvon ım id təbrik kardəşone.
Azərbaycanə Respublikadən de Rəməzonə manqi bə orəx rəse munasibəti məçitonədə idə nomoj votəşone. “Report” sayti bı barədə nıvıştəşe ki, “Tojə pir” məçitədə əhali de Ğəfğazi Mısılmonon İdarə sədri muavin Hacı Fuad Nurullayevi pişnomojiəti idə nomoj votəşone, bə Xıdo dıvo kardəşone, çeyku piəşone ki, çəvon qınoon bıbaxşo.
İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.
