Ermənistoni i minnə vəziri muxalifon eteroz aksiya dəvom kardeydə.
Muğavimət nomo hərəkati uzvon və tərəfdaron ıştə eterazon dəvomədə Ermənistoni xarıci vəzorətxonə bina vədə aksiya dəvonişone.
Bə Ermənistoni dıvlət iyən i minnə vəziri zidd bıə milləti eterazon ijən dəvom kardeydə.
Ermənistoni eterozonədə Muxalifon jığo elan kardən ki Paşiniyoni siyasəton Ğərəboğədə çı Ermənion həxi poymol kardey çərçivədəy, iyən dıvləti mıttəhəm kardən ki Ğərəboği qırd bə Azərbaycan Respublika doeış pidə.
Əvon i minnə vəzir Nikol Paşiniyan və çəy dıvləti istifo tələb kardən.
Bə Armenpres aqentiyəti raporti əsos, eterozəkəyon de bəyoniyə sadir kardey vositə rəsmən elan kardışone ki dıvlət həxış ni ki kişvəri muhimmə məsələon barədə milləti əvəzi ğərolış bıbu.
İjən ğeyd be: dıvlət çı milləti nımoyəndə ni çən beynəlxalğ iclosonədə harcurnə saziş təvafuğ botile və erj ğəymətış nibəbe.
Cəmaət ıştə eterazon dəvomədə Ermənistoni xarıci vəzorətxonə bina vədə aksiya dəvonişone ki de polis ğıvvon daveon bois bıə.
Miladi 2020 minnə sori Oktiyabrə manqədə Azərbaycan Respublika vey hevuj iyən həmmə tərəfinə əməliyati bo Ğərəboği məntəğəku Ermənion xaric karde və işğal bıə ərazi ozodəti xoto bino kardışone.
Azərbaycan Respublika 44 ruj canqi bəpeşt muvəffəğ bıə təğribən 3500 kilomiter çı Ğərəboği ərazi əcumlə 132 kilomiter çı İroni sərhəd nezi məntəğon ozod bıkə.
