İron təkidış karde: bəpe Azərbaycan Respublika iyən Erməniston miyono daveon həlliro, sulhi royku istofodə bıbu.

İoni xarıci vəzarətxonə sıxənəvot Azərbaycan Respublika iyən Ermənistoni miyono marziyə daveon əlovə beyku ıştə niqəroni elanış karde iyən tələbış karde 2 qılə kişvəri miyono bə beynəlxalğə huğuğon əsos iyən sulhomiz royku çəvon daceon iyən ixtilafon həl bıbu.

Bə xarıci vəzarətxonə məlumatərosnə idorə raporti əsos, seşəmbə rujədə,İroni xarıci vəzarətxonə sıxənəvot, Nasır Kənani Çafi co kərə təkidış karde ki İron İslam Respublika səmtiku Azərbaycan Respublika iyən Erməniston marzonədə harcurnə təhəvulaton ğəbul kardənin ni.

Kənani Çafi ijən təkidış karde: İron İslam Respublika de diğğətin surətədə, həminə mıvzo təhəvulaton dumoədəy iyən votışe: bəpe Azərbaycan Respublika iyən Ermənistoni miyono ərazi təmamiyət rioyət bıbu və həminə royədə və ım 2 qılə kişvəron ixtilafon həlliro, İron harcurnə koməkiro hozzoe.

Seşəmbə sıbh, Azərbaycan Respublika iyən Erməniston xəbəşon do  ki 2 qılə kişvəron marzonədə daveon icod bıə və har tərəf co qılə tərəfi mıttəhəmış karde ki Otəşbasti təvafuğnomə rioyət nıkardəşe.

Miladi 2020 minnə sor və 44 rujə canqi bəpeşt, co kərə Azərbaycan Respublika iyən Ermənistoni marzi hərbion de yande daveon binoşon kardə iyən har tərəf co tərəfi mıttəhəm kardə ki otəşbasti muğavilə rioyət nıkardə.

Canqi bəpeşt, Azərbaycan Respublika iyən Erməniston miyono təvafuğ bıə ki marzon təyin kardeyro çand qılə kumitə icod bıbu, əmmo tosə bə ısət ım ko vey bə vırə rəsəş ni.