Bə Kərimə Ğıroni be ehtıroməti kardey barədə bə İslomi həmkoəti təşkiloti iclos bərpo kardey təkid
İraği xarıci vəzir de çand nəfər İslomi kişvəri vəziron votımonədə əcumlə İron dınyoədə de İslomofobiya muğabilə kardey iyən həminə barədə lozimə hərəkəton əncom doey təkidış kardə.
Bə Əlforat Niyoz raporti əsos, İraği xarıci vəzir Fuad Huseyn, de İordan, Tırkiyə, İron İslom Respublika iyən Ərəbistoni xarıci vəiron yəni İmen Əlsəfədi, Hakan Feydan, Huseyn Əmirəbdullahiyan və Feysəl Fərhan telefoniyə votımonış kardə.
İraği xarıci vəzorətxonə ijən elanış kardə: ım votımononədə bə Kərimə Ğıroni be ehtıroməti kardey iyən dınyoədə de islomofobiya muğabilə kardey və lozimə hərəkəton əncom doey xarıci vəziron səthədə bə İslomi həmkoəti təşkiloti fovğoladə iclos bərpo bey zərurət təkid bıə.
Fuad Huseyn təkidış kardə: ım təhrikomizə hərəkət, beynəlxalğə prinsipon darşiye, ictimai sulh iyən vızməti və nifrəti mədəni rəvoc doey mənodəy.
İslomi 4 qılə kişvəri xarıci vəziron həm İraği nəzəonku himoyə kardışone və ın məsələ barədə fovğuladə iclosi bərpo bey tələbışon kardə.
İyuli 20 Pencşəmbə rujədə, və dəvardə haftəon mıddətədə 2minnə kərəro qıləy İraği-İsveçi şahrvandi ki çəy nom Selvan Momika be, de İsveçi plosi himoyə bə kərimə Ğıroni be ehtıromətiş kardə. qıləy be ehtıroməti ki həmmə mısılmonə kişvəron reaksiya bə ico be. islomi kişvəron bə Kərimə Ğıroni be ehtıroməti kardey məhkum kardışone iyən ım kişvəronədə İsveç diplomatiya nımoyəndəti rəyison və səfiron vanqışon kardə. İron İslom Respublika həm İsveçi səfiri bə xarıci vəzorətxonə vanq və elanış kardə ki de diğğət bə Tehronədə İsveçi məmuriyəti sə bey və bə İron İslom Respublika prezdenti əmri əsos tosə zəmoni ki İsveçi devlət osmoni kitob və Kərimə Ğıroni horməti oqəteyro təsirinə hərəkət əncom doəş ni və de ə şəxsi ciddiyə rəftor əncom doəş ni, İsveçi tojə səfir ğəbul nibəkamon.
