Ayətullah Nuri Həmədani: islomi kişvəron bə Kərimə Ğıroni be ehtıroməti kardey moğabilədə ciddiyə ğərol bıqəton
Ayətullah Nuri Həmedani əcumlə mərcəe təğlidonku qıləyni bə Kərimə Ğıroni be ehtıroməti kardey barədə qıləy mesajədə votışe: islomi kişvəron bə Kərimə Ğıroni be ehtıroməti kardey moğabilədə ciddiyə ğərol bıqəton.
Bə İrna raporti əsos, ım mərcəe təğlid ıştə mesajədə əlovəş kardə: de təəsufi bə Kərimə Ğıron be ehtıroməti kardey həmçınan dəvomış heste və çımiku vey norohətəkə məsələ ıme ki təsirinə təşkilaton həminə məsələ barədə hiç hərəkət əncom doəşon ni və fəğət bə sodə bəyoniyə rozi bin və ijən İsveç kişvər həm əvvələdə, həminə be ehtıroməti kardey icozə doşe iyən peşo etırozəkəyon vədə ıştə təəsufi elan kardedə.
Ayətullah Nuri Həmedani ijən təsdiğış kardə: be şək, bə osmoniyə dinon muğəddəsəçiyon be ehtıroməti kardey icozə ni və islomi kişvəron yolon və təşkilaton bəpe har çəxtə rə de ım cinoyəti muğabilə iyən vəy qəteyro ciddiyə ğərol bıqəton.
İyuli 20 Pencşəmbə rujədə, və dəvardə haftəon mıddətədə 2minnə kərəro qıləy İraği-İsveçi şahrvandi ki çəy nom Selvan Momika be, de İsveçi plosi himoyə bə kərimə Ğıroni be ehtıromətiş kardə. qıləy be ehtıroməti ki həmmə mısılmonə kişvəron reaksiya bə ico be. islomi kişvəron bə Kərimə Ğıroni be ehtıroməti kardey məhkum kardışone iyən ım kişvəronədə İsveç diplomatiya nımoyəndəti rəyison və səfiron vanqışon kardə.
Çımiku bəpeşt həm Danimarkavıjə radikalist iyən İslomofobiya qrup yəni “Danimarka mihənpərəston” iyən i nəfər çəvonku İraği səforətxonə vədə Kərimə Ğıroni i cildi otəş jəş be.
Im bevəcə hərəkət de İ Bıə Milləton Təşkiloti sərkatib Antoniyo Qotreş reaksiya həm dim bə dim bıə və çəy tərəfo ım hərəkət məhkum elan bıə.
