Livani cənubədə bə UNIFIL-i iştiroki dəvomi təkid
Livani Cənubədə İ Bıə Milləton Təşkiloti sulh mərominə ğıvvon sıxənəvot, Andrea Tennetti elonış kardə: UNIFIL-i ğıvvon hiç vaxt Livani cənubiku xarıc nibəben.
Livani Cənubədə İ Bıə Milləton Təşkiloti sulh mərominə ğıvvon ya həmonə UNIFIL, İ bıə Milləton Təşkiloti sulh mərominə ğıvvonku qıləy qrupin ki bə İ bıə Milləton əmniyyət şura ğəroli əsos və bə Miladi 1987 minnə sori Martə manqədə 425 və 426 numrə ğətnoməon əsos bə ım məntəğə vığandə bıən ta Livaniku israili bə duko kırniye təsdiğ bıkon, iyən bə məntəğə sulh və sazışi obəqardon və bə Livani devlət komək bıkon ta məntəğədə ıştə nufuzi ziyod bıkon.
Sionist rejim, bə Livani ələyh ıştə cinoyətədə, Livani cəmubədə bə UNIFIL həm rəhm kardedə ni. tojədən israili iminnə vəzir, Benyamin Netanyahu bə İ Bıə Milləton təşkiloti sərkotib Antoniyo Qutereş qıləy mesaj ğəlibədə, Livani cənubədə İ Bıə Milləton təşkiloti sulh mərominə ğəvvon xarıc kardey tələbış kardə.
De diğğət bə Netanyahu mislış nıbıə təhdid, dəvardə rujonədə xususi dəvardə 3 rujədə bə UNIFIL-i mərkəzon, sionist rejimi həmləonku bəpeşt, Livanədə UNIFIi ğıvvon vəziyət, vey niqəronəkəy.
Demi həm bo UNIFIL-i ğıvvon xarıc kardeyro, İ Bıə Milləton Təşkiloti ğərol bə ım məenoe ki həm bo sulh icod kardeyro İ Bıə Milləton təşkilot ocize və həm İ Bı Milləton Təşkilot nə ım ki sioniston cinoyəti vəy qəteyədə ocize bəlkəm əmələdə bo veyə cinoyəton əncom doeyro meydoni teyli kardəşe.
Həminə cəhətədə Livani Cənubədə İ Bıə Milləton Təşkiloti sulh mərominə ğıvvon sıxənəvot, Andrea Tennetti votışe: de ım həmləon vecudi, UNIFIL bə ğərol omə ki bə əmniyyət şura tələbi əsos, Livani cənubədə bımando. və fəğət bə ım şura tələb cəvob bıdə.
Həğiğətədə ə çi ısət bo İ Bıə Milləton Təşkilotiro vey muhimme ıme ki ıştə minimum etıbor oqətey karde bızno, həmonə etıbor ki əmniyyət şuraədə Veto həxiku de Amerkə əbzori vositə və sionist rejimiku mudafiə kardeyədə bəştə vey kamə səviyədə rəsəşe.
Co qılə vey muhimmə nuktə ıme ki Livani cənubədə bə UNIFIL-i ğıvvon ələyh sionist rejimi cinoyət de bəzi kişvəri hevujə aksiya dim bə dim bıə ki UNIFILədə həmkoətişon heste.
Təğribən 40 qılə kişvər ki Livani cənubədə İ Bıə Milləton Təşkiloti sulh mərominə ğıvvonədə iştirok və həmkoətişon heste, ım ğıvvonku ıştə komilə himoyə elon kardışone və Fransə və İtaliya həm Paris və Romaədə, bo bə UNIFIL-i ğıvvon ələyh sionist rejimi hərbiçion həmləon etıroziro, ım rejimi səfiron vanqışon kardə.
İjən Avropa ittifoği xarıci siyosəti rəsmi şəxs, Cozef Burel həm de ım ittifoği 27 qılə uzv bıə kişvəron tərəfo, de şiddətinə bəyoniyə muntəşir kardey bə Livani Cənubədə İ Bıə Milləton Təşkiloti sulh mərominə ğıvvon ələyh, sionist rejimi həmləon məhkumış kardə.