Ğıron çı Ğıroni nəzəku-1
Ğıron çı Ğıroni nəzəku-1
Rəməzonə manqi muhimmə hodisəonku qıləyni bın mıborəkə manqədə osmoniyə kitob bıə Kərimə-Ğıroni nozil bıə.ilahi misliş nıbə ım mığəddəsə kitob bo insonon hidoyətiro enovniyə bıə.islomi sıftənə soronədə mısılmınon bo Kərimə-Ğıroni zohiri hifz kardey iyən boçəy nığılə məfhumi dərk kardey xoto,veyə cəhdon kardedəbin.əmmo de zəmoni dəvarde iyən islomi camiyə ıştə rostə royku inhirof bıey bəpeştə,mısılmınon çın ilahi barzə maarifiku bə diyəro mandin və kəcə roon tərəf hərəkətışon karde.Kərimə-Ğıroniku fəğət çəy zohir mande iyən çəy ruf iyən həyğəton çı yodo bekardey be.dırıst çə rujonku çı islomi dınyo tənəzzul iyən suğuti devran bino be.çın zəmoniku be ki,islomi dınyo əzəmət iyən yolyəti çı dasto şe və çı mısılmınon miyono bıə vəhdət iyən ibemoni ıştə vırəş de zıllət iyən xarəti əvəzış karde.çə vaxtiku zolım iyən bedinə hukuməton bə mısılmınon mısəllət bin və Ğıroni erjon çı mısılmınon jimoniku peqətey be.odəmi dıli dojnə ım səhnə və proses ısət həm dəvom kardedə.joqo ki,vəs kardedə əmə ikərə bə mısılmınon ımrujnə jimoni vəzyəti erəxəmon.bın zəmon bəvindemon ki,əvnon çokonə camiyədə siyasi,ixtisodi.iştimayi,əxloği və co sahəonədə yavə iyən odəmi dıli dojnə vəzyətədə jimon kardedən.
İslomi dınyo çı dasto şıə əzəməti bəyji kardey yeqanə ro fəğət de mısılmınon miyono ibemoni iyən bə ilahi nıpessiyə rismon bıə Ğıroni çanq ğandey bə dast bome.
İslomi əziz-qramiyə pəyğombər(s) çı həmmə kəsisə vey bo islomi dınyo xoto norohət be.ə həzrət bə mısılmınon xitob kardə holədə hamyedə:"hafaxti deşmın çı ha tərəfiku hucumko və boşımə həxı çı botıliku co kardey muşkil bıbu,(bəvədə)bə Ğıroni pənoh bıbənən....hakəs Ğıroni ıştə vədə ğərol bıdə əv,əy bə vəhışti tərəf sovğ bədoe.və hakəs bəy peşt bıqordıno,bə cəhəndımi tərəf hərəkət bəkay.Ğıron bə vey çokə roon tərəf ro nışon doydə....Ğıronədə çı hidoyəti çoon iyən hikməti ruşinəkə mərkəzon ğərolış qətə".(Nəvadirul-Ravəndi-22-210).
Kərimə-Ğıroni xısusiyyətonku qıləyni ıme ki,bəvədə çı bəşəri qırd ehtiyocon bəyon bıə.joqo ki,Nəhli mıborəkə surə 89-ə ayədə hamyedə:"Əmə ım Kitob(Ğıron)bətı vığandemone ki,harçi bəyon kardedə və bo mısılmınon hidoyətəkə, (bə Xıdo əmron təslim bıey xoto) rəhmət iyən mıjdəvoniye". çın ayə mesaj ıme ki,mısılmınon joqo qıləy kitob çəvon ixtiyorədə bıə holədə,həni ehtiyoc ni əvon bə şərği ya ğərbi məktəbon tərəf dim bıqəton.
Bə İsra mıborəkə surə 9-ə ayə əsos,Im Ğıron bə vey ğoym iyən barzə roon tərəf hidoyət kardedə.bə həmonə dəlili xoto,çəy hukmon qırd zəmonon ıştədə ehtivo kardedə.yəni əv bə qıləy məxsusə zəmoni ayid ni,bəlkəm çəy hukmon bə qırd əsr iyən zəmononədə jiyə bəşəri camiyə məxsuse.İmom Bağır(ə) bo ın inkor nıbə həyğəti bəyon kardero hamyedə:"həyğətən,Xıdovənd de tobə ğıyoməti ruji insoni ehtiyocış bıə harçiş bın Kitob(Ğıronədə) vığandəşe (çəyku bəhsış kardə və boştə pəyğombəri əvış təbyin iyən ruşinış kardə".(Biharul-Ənvar-92-84).
Təbiiye çı har insoni çın ilahi kitobiku bəhrə bardey i səviyyədə ni.hakəs ıştə ğabiliyyət iyən bəsirəti miğdori əndozədə çın nığılıə maarifış bıə ilahi ktobiku foydə vindedə.İmon Huseyn(ə) çın mətləbi barədə hamyedə:"Xıdo kitob çoqlə baxşiku iborəte.İbadat,işarat,lətayif iyən həğayiğ.İbadat bo qırd məxloğiye.işarat bo məxsusə bandəon.lətayif(lətifəon) bo(ilahi)ovliyaon iyən həğayiğ(həyğəton) boçəy pəyğombərone".(Bihar-5-278).
