914-ə hissə- Zuxrufi surə -36-42 şərifə ayəon

914-ə hissə

وَمَنْ یَعْشُ عَنْ ذِکْرِ الرَّحْمَنِ نُقَیِّضْ لَهُ شَیْطَانًا فَهُوَ لَهُ قَرِینٌ ﴿٣٦﴾

Və hakəs Rəhmonə(Xıdo) zikriku dim bıqordıno, qıləy şəyton boəy təyin bəkardemon ki, çəy həmdəm bıbu.

 وَإِنَّهُمْ لَیَصُدُّونَهُمْ عَنِ السَّبِیلِ وَیَحْسَبُونَ أَنَّهُمْ مُهْتَدُونَ ﴿٣٧﴾

Və əvon(şəytonon) həxə royku əvoni oqəteydən, əmmo(əvon) fik kardedən ki, hidoyət pəydu kardəşone.

Vəynə proqramədə çə kəsonku bəhs be ki, əvon həmmə çiyon de maddi meyaron pamuyedə və dınyəvi maddiyyot iyən sərvəti dumon. qıləy holədə ki, həyğiyə muminon çı axırəti fikədən və əvon bə dınyo rifohi koon iyən zər-zibo dılışon bastə.

In ayəon hamyedə: bə dınyoziyondoə maddi jimoni ğərğ bıey təsironku qıləyni, insoni çı Xıdoku ğafil mandeye. bə ın ğəfləti təsiri xoto, qıləy şəyton bəy mısəllət bəbe və əy bəçəy dıli piyə har qıləy səmti obəkırne. ım çı Xıdo zikriku eroz kardey və bə diyəro mandey təbiiyə nəticəy.

De qıləy co iborəti insonon dılon ya çı Rəhmonə Xıdo vırəy və ya çı şəytoni vırə. Xıdo ziriku bə diyəro mandey və ğəflət mandey və bə dıənyo jimoni cəh-cəloli dıl dəvastey və bə çandə nev qınon mırtəkib bıey, bə şəytoni bə insoni təsəllut pəydu kardeysəbəb bəbe. bın surətədə şəyton çı insoni dust və həmnışin beydə və həni bo Xıdo qıləy vırə çəy dılədə baği mandedəni. şəyton və şəytonə fikon çın qrupi har tərəfiku insonon əhotə kardedən və əvoni Xıdo royku oqəteydən. Havaxt həm ın fərdon irodəkon ki, bə həxə roy oqardon, şəytonon mane icod kardeydən ki, bə siratəl mustəğim onıqardon. şəytonon jıqo qıləy zəloləti ro çəvon nəzədə ziynət doey beydə ki, çəvon çəş, quş iyən dılon həx iyən həğiğəti vindeyku ku və kor bıən, qımon kardedən ki, çəvon həmmə koon dırıste və əvon hidoyət pəydu kardəşone. jıqo fərdon fik kardedən ki, cokəson xətokorin. təbiiye ehanə insoni ko bə ın vırə bırəso, ıştə koonədə qıləy səhf və xəto vindedəni ta çı isloh iyən oqardemoni fikədə bıbu.

Çın ayəonku omutedəmon:

1-hakəs Xıdoku dim bıqordıno, hətto əgər çı nımoj iyən Ğıroni əhl bıə mısılmon həm nıbu, həyğətədə Xıdo zikriku dimış qordınə və çı şəytoni təsəlluti zəminəş boştə hozzı kardə.

2-insoni dıl qıləy təyliyə zərf və ğab ni. ya Rəhmonə Xıdo vırəy və ya şəytoni. ehanə Xıdo nıbu, şəyton çəy əvəzi əyo bəbe.

3-bə xəto mırtəkib bıeysə vey bevəc, əve ki, inson ıştə xəto və səhfi nıvindo və qımonko ki, əv həxə royədəy.

حَتَّى إِذَا جَاءَنَا قَالَ یَا لَیْتَ بَیْنِی وَبَیْنَکَ بُعْدَ الْمَشْرِقَیْنِ فَبِئْسَ الْقَرِینُ ﴿٣٨﴾

Tosə ə zəmoni ki,(ğıyoməto) çəmə nəzd bome(bə şəytoni çəy həmdəm) bəvote: ey kaş ıştı deçımı miyono məşriğ iyən məğribi(məsofə ğədər) fosilə bıəbe. çı bədə həmnişin biş.

 وَلَنْ یَنْفَعَکُمُ الْیَوْمَ إِذْ ظَلَمْتُمْ أَنَّکُمْ فِی الْعَذَابِ مُشْتَرِکُونَ ﴿٣٩﴾

Imruj(şəytoniku bə diyəro mandey oruzu) boşımə qıləy foydəş ni. zira(şımə) sıtəmon karde(və ısət həm şımə) həmmə əzobədə mıştərəkiyon.

In ayəon dınyoədə bə Xıdoku ğafil mandey oxo işorə kardedə və hamyedə: Xıdoku ım eroz iyən dim qordıney dəvomış heste ta yinki, inson çı dınyoku şeydə və ğıyoməti ruji məhşəri səhnədə hozzı bəbe. iyoe ki, çəy həyğəti vində çəşon oj beydə və dərəseydə ki, şəytoni bəçəy sə çı bəloonış vardə. bəvədə oruzə bəkarde ki, ey kaş dınyoədə çı şəytoni dustiyətiş ğəbul kardə nıbe və deəy həmnışin bıə nıəbe. əv bəvote:ey kaş çımı deştı miyono bənə məşrıği de məğrıbi miyono bıə qıləy fosilə və məsofə bıəbe. tı çanədə bevəc iyən yavə həmnışin biş. tı çokətiyon bomı yavə və yavə çiyon ğəşənq cilvə doe və mını çı rost iyən həxə royku oqəte. ruşine ki, həmonə ruji çəvon çı şəytoniku bə diyəro mandey barədə bıə dıvo və oruzu bə məyusəti təbdil bəbe və əruji peşmonəti hiç qıləy foydəş nibəbe. jıqo fərdon koy oxo jıqoye ki, hejo de həmonə şəytoni cəhəndəmədə əzobədə bəbeyn və əvon deəy bə ico bəbeyn. çoko ki, dınyoədə deəy həmnışinətişon ğəbul kardəbe. bəle, ğıyoməti ruj çı dınyo ovəynəy və dınyəvi duston axırəti ruji həm həmnışin bəbeyn.

Çın ayəonku omutedəmon:

1-mığət bıbəmon ki, dınyoədə de kom kəson dust və həmnışin beydəmon ta axırətədə bə həsrət iyən peşmonəti giriftor məbəmon.

2-cəhəndım həm bo insoni iyən həm bo şəytoniye və cəhəndımi əhl de şəytoni iqlə kədə bəbeyn.

3-zılm, fəğət bə cokəson ni. Xıdoku dim qordıney həmməysə dıjdə zılme. zira, insoni dınyoədə bə zəloləti iyən axırətədə bə cəhəndımi bəşıkırne.

أَفَأَنْتَ تُسْمِعُ الصُّمَّ أَوْ تَهْدِی الْعُمْیَ وَمَنْ کَانَ فِی ضَلالٍ مُبِینٍ ﴿٤٠﴾

(Ha pəyğombər ha!)Aya tı koron əməs kardey bəzıneyş ya kuon və əkəson ki, oşkoə zəlolətədən hidoyət kardey bəzıneyş?

 فَإِمَّا نَذْهَبَنَّ بِکَ فَإِنَّا مِنْهُمْ مُنْتَقِمُونَ ﴿٤١﴾

Çən, ehanə tıni(dınyoku) bobəmon, çəvonku intiğom bəstənemon.

 أَوْ نُرِیَنَّکَ الَّذِی وَعَدْنَاهُمْ فَإِنَّا عَلَیْهِمْ مُقْتَدِرُونَ ﴿٤٢﴾

Ya(nuyə həyoti zmonədə) (çı əzobiku)çəmə bəvon və`də doə çiyon bətı nışon bədomon. beşək əmə bəvon səbarzimon.

In ayəon bə Xıdo-Rəsuli(s) xitob kardə holədə hamyedə: əkəson ki, bo həxı məsey iyən vindey hozzı nin, harçənd çəvon zohiri çəş iyən quşon solime, əmmo çəvon botıni çəş iyən quşon bastə bıə. liza tı ıştə sıxani bəçəvon quşon rosney nibəzıneyş və ya həyğəti bəvon nışon doey nibəzınbeyş və tı əvoni çı zəlolətiku bə rostə roy hidoyət kardey nibəzıneyş.

Iştəni bə hani jıə kəsi de hıtəkəsi miyono tafut heste. iminə kəsi çanədə vanq bıjənoş, hiç qıləy əksul-əməl nışon nibədoe. əmmo dıminə kəs de ikərə vanq jıey oğo bəbe.

Kali insonon anədə bə qıno ğərğ bıən ki, hətto Xıdo iyən çəy pəyğombəri nomi məseyku qıləy nifrəti hissış heste. əvon de dini iyən mənəvi məfhumon dimbədim omeydə, pərişon və aşuftə beydən. təbiiye ki, ım fərdon boştə oqardemon iyən hidoyətiro qıləy roşon haştəni. hətto əgər hidoyətkə Xıdo peyğombər bıbu ki, de həmməysə çokə şivə dəvət kardedəbe və çə həzrəti əməl bəçəy sədoğəti həməysə çokə şoyde.

Jıləvoni de həxı deşmınəti iyən indokorəti, dınyoədə ğərəz İlahi ğəzəb iyən ğəhri co qıləy nəticəş nibəbe. ısət çı peyğombəri(s) zəmonədə bıbu ya çə həzrəti rehləti bəpeştə. ha holədə əvon bo fərol kardero hiç qıləy roşon ni. zira Xıdovənd bə qırd dınyo əhotəş heste və ikəsi çəy oxoş nıbə ğudrəti sultə jiku xaric bıey ğudrətış nibəbe.

Çın ayəonku omutedəmon:

1-ehanə həxı ğəbul kardey zəminə hozzı nıbu, hətto bənə İlahi rəsulon bıə həmməysə çokə insonon sıxanon həm bəvon təsir nibəkarde.

2-əgər şəyton bə insoni hakim bıbu, çəy ğəlb iyən rufi həxı məsey iyən vindeyku ku və kor bəkarde.

3-mışrikon qımon nıkon ta çanədə peyğombər heste, bəvon əzob nibome ya ehanə peyğombər çı dınyoku bışo, həni bəvon cəzo doey nibəbe.