920-ə hissə- Zuxrufi surə -79-84 şərifə ayəon

920-ə hissə

أَمْ أَبْرَمُوا أَمْرًا فَإِنَّا مُبْرِمُونَ ﴿٧٩﴾

Bəlkəm əvon(bo de həxı mıxolifətiro) qıləy ğovmə ğərol bekardeşone və əmə həm(çəvon barədə) qıləy ğoymə irodəmon heste.

 أَمْ یَحْسَبُونَ أَنَّا لا نَسْمَعُ سِرَّهُمْ وَنَجْوَاهُمْ بَلَى وَرُسُلُنَا لَدَیْهِمْ یَکْتُبُونَ ﴿٨٠﴾

Aya fik kardedən ki, əmə çəvon punhoniyə sırron iyən məxfiyə sıxanon məseydənimon? bəle və çəmə firiştəon çəvon nəzdədə hozzon və(həmmə çiyon) nıvışteydən.

Vəynə bərnomə oxonə hissədə həxı ğəbul nıkardə və deəy mıborizə bardə çı kofir iyən mışrikon sıxanonku bəhs be. ım ayəon hamyedə: əvon nəyinki,çı həxıku bezo və bə diyəro bin, bəlkəm deəy deşmınəti iyən mıbroizə bardedəbin. əvon həxı təzif kardey və çəy nuri hamuş kardey cəhətədə planon kəşəşonbe və çandə nev məkrinə suyi-ğəsdonku oko doydəbin. çəvon bo həxı məğlub kardey iyən boəy məhf kardero qıləy ciddiyə əzmışon hestebe.əmmo həni zıneydə nıbin ki, çəvon mığobil tərəf Xıdoye. İlahi irodə çəvon piyə və tələb kardə çiyonsə barz və bəpeye və jıqo ni ki, çəvon dılon çiçi piyeşe bə həyğət bərəse.

Həmonə suyi-ğəsdə niyyətışon bıə mıxolifon fik kardedəbin ki, çəvon məhrəmonə iclos və votemonon Xıdoku məxfiye və Əv əvoni vindedəni iyən çəvon sıxanon məseydəni. qıləy holədə ki, Xıdovənd çəvon məxfiyə məclisonədə bıə ahəstə və pıç-pıç kardə sıxanon həm məseydə. boçi ki, boəy məxfi iyən oşko mısovi iyən iye. İlahi məlayikon həm co hozzon və dayimi surətədə çı insonon sıxan və əməlon, hətto çəy pıç-pıçon həm səbt kardedən, nıvışteydən və hiççi çəvonku məxfi mandedəni.

Çın ayəonku omutedəmon:

1-har qıləy ğərol çanədə həm ciddi iyən ğəti həm bıbu, Xıdovəndi irodə jiku xaric ni və İlahi izn nıbu əv bə həyğət nibərəse.

2-mıxolifon qımon kardedən ki, Xıdovənd çəvon punhoniyə koonku bexəbədoye. qıləy holədə ki, insoniku sadir bıə çi, ilahi dastqoədə nıvıştey beydə və hiççi çəy firiştəon nəzəku ki, əvon İlahi məmuronin, məxfi nibəmande.

قُلْ إِنْ کَانَ لِلرَّحْمَنِ وَلَدٌ فَأَنَا أَوَّلُ الْعَابِدِینَ ﴿٨١﴾

(Ha pəyğombər ha! bəvon)Vuji: əgər bo Xıdovəndi qıləy fərzənd bıəbe, mı(əy) pərəstış kardə iminə kəs əbim.

 سُبْحَانَ رَبِّ السَّمَاوَاتِ وَالأرْضِ رَبِّ الْعَرْشِ عَمَّا یَصِفُونَ ﴿٨٢﴾

Osmonon iyən zəmin iyən ərşi pərvərdıqor pok iyən mınəzzəhe əy tevsif kardə çiyonku.

Çın surə iminə ayəonədə bə mışrikon Xıdovəndi fərzəndi soyb bıey həxədə bıə etığodi işorə kardeydəbe və peşonə ayəonədə çı məsihiyon həzrəte İsa-Məsih(ə) çı Xıdovəndi fərzənd bıey həxədə bıə etığodiku bəhs kardedəbe, ın ayəon çəvon ım nodırıstə bovəon rədd kardə holədə hamyedə: əgər Xıdovəndi qıləy fərzəndış bıəbe ki, bəpe əv pərəstış kardey bıəbe, peyğombəron iminə şəxs əbin ki, əy sıtoyiş əkardin. qıləy holədə ki, əvvəla Xıdovənd çı jimoni həmro iyən fərzəndi soyb bıeysə mınəzzəh və poke. saniyən Əv bə insonon ıştə hiç qıləy məxloğati min cumlə məlayikon pərəstış kardey əmrış həm doəni.

Çın ayəon dəvomədə omə qıləy Xıdo ki, osmonon iyən zəmin malik iyən dıjdə ərşi pərvərdıqore, həni bə fərzəndi ehtiyociş ni. Əv oxoş nıbə və bə hestemoni aləmi əhotəş bıəqıləy vucude. həyğətədə, fərzənd bo əkəsi lozıme ki, boştə nəsli dəvom doeyro bəy ehtiyociş heste və ya ikəs ki, zəyfəti iyən ocizəti zəmonədə bə qıləy fərzənd və jimoni həmro ehtiyociş bıbu. coqlə nuktə ıme ki, fərzəndi vucud cism bıey iyən çı zəmon iyən məkoni məhdudədə ğərol qəteyku hikoyət kardedə. qıləy holədə ki, qıləy Xıdo həmmə hestemoni aləmış ofəyə və çəy hakimiyyəti jiyədən, qırd ım vıronku pok və mınəzzəhe və bə hiççi iyən hiçkəsi min cumlə bə fərzəndi ehtiyociş ni.

Çın ayəonku omutedəmon:

1-de mıxolifon debatədə bəpe mıdora kardey bıbu və ruşin kardey bıbu ki, de çəvon nəzəon səhihəti fərz kardey, kom nəticəon bə dast omeydə ta ıştə bovə nodırıstəti dərəson.

2-beşək Xıdovənd çı harcurnə noğisəti və ya bə insoni şəbih bıeyku pok və mınəzzəhe. liza bəpe dayima bənə insoni bıə xıdoku bə diyəro mandey bıbu. çıro ki, jıqo qıləy xıdo çı bəşəri təxəyyul və bə həmto iyən mislış nıbə Xıdovəndi sıfəton nisbətədə cəhli məhsule.

3-osmonon iyən zəmin deştə qırd əzəməti Xıdovəndi irodə və tədbiri jiyədəy və mutəmərkiz iyən vohidə formədə idorə bəbe.

فَذَرْهُمْ یَخُوضُوا وَیَلْعَبُوا حَتَّى یُلاقُوا یَوْمَهُمُ الَّذِی یُوعَدُونَ ﴿٨٣﴾

Çən, əvoni bəçəvon ıştən holi vabıdə ta(bıdə botılədə) bımandon və səşon bıtaspo ta qıləy ruji ki, və`də doey bıə, bıvindon.

وَهُوَ الَّذِی فِی السَّمَاءِ إِلَهٌ وَفِی الأرْضِ إِلَهٌ وَهُوَ الْحَکِیمُ الْعَلِیمُ ﴿٨٤﴾

Və Əve ki, osmononədə Xıdoye və zəminədə(həm) Xıdoye və Əv Həkim, Əzıne.

İlahi peyğombəron bo bəşəri hidoyətiro omən. əvon bın royədə de veyə dıləsutəti səyışon kardə və de mıxtəlifə roon daxil beydən ta milləti nicot bıdon. ın ayəon hamyedə: çın xeyrxahəti iyən dıləsutəti qıləy həddı-marzış heste və qıləy zəmon ki, fərdon ıştən bə hərəbaxtəti rəsey piyedənişone, əvoni bın koyədə məcbur kardey nibəbe. bəlkəm, bəpe əvoni bəçəvon ıştən holi vadoey lozıme ta əvon ıştə botıl və nodırıstə roy nəticəon bıvindon.ğasbu əvon ıştə xəto və səhfon dərəson və oqardon. ğasbu həm de tosə ıştə umri oxo ıştə inhirofiyə royədə bımandon və onıqardon ta ğıyoməti ruji mıloğat və vindemonkon və ıştə yavə fik iyən əməlon telə miyvəon bıçaşton.

Ayəon dəvomədə bə Xıdovəndi çı milləti imon nıvardeyku be ehtiyocəti təkid kardedə və hamyedə: kofiron qımon kardedən ki. Xıdovəndi bəçəvon ibodəti qıləy ehtiyociş heste və çəvon kufr iyən tuğyongərəti bəçəy rububiyyəti qıləy zərəl bərosne. Əv çı osmonon iyən zəmini Xıdo iyən çı qırd mevcudaton məbude. de qıləy co bəyoni həyğiyə məbud əkəse ki, aləmi idorə kardedə və çəy tədbiri vindedə. liza məlayikon, bıton və bənə ovşım, həşi iyən astovəon bıə təbiiyi təzahuron hiçqıləyni bo ibodət iyən pərəstışi ləyoğətışon ni. əvon həm ıştə nevbədə çı Xıdovəndi məxluğin və əvon həmmə deştə vucudi çəyku bə şıkrən. çın ayəon oxoyədə omə ki, Xıdovənd həmmə çiyonku xəbədoye və Əv dınyo bəştə benəhoyətə elm iyən hikməti əsos idorə kardedə.

Çın ayəonku omuteydəmon:

1-İlahi peyğombəron milləti dəvət və irşodi məmurin, nəyinki, əvoni bın koyədə məcburkon və ya çəvonku təmənno iyən xahişkon.

2-etığodi koonədə bo milləti huccəti təmom iyən dəlili nışon doey bəpeştə, əvoni bəpe təzyiği jiyədə ğərol mədəmon, bəlkəm bəpe əvoni ozod bəhaştəmon ta əvon ıştən ıştə roy bıvıjnon.

3-Xıdovənd bə insonon hiç qıləyni ehtiyociş ni, ısət çı bımando ki, bəçəvon ibodət və bandəçəti həm ehtiyociş bıbu. qıləy zəmon ki, əmə nibimon Əv Xıdo be və qıləy zəmon həm ki, əmə çın dınyoku bışəmon, Əv ijən Xıdoye. Əv osmonon, zəmini iyən aləmi həmmə mevcudaton Xıdoye.

4-əkəsi bo pərəstışi ləyoğətış heste ki, qıləy benəhoyətə elm iyən hikməti soybe.