933-ə hissə-Casiyə surə -33-37 şərifə ayəon

933-ə hissə

وَبَدَا لَهُمْ سَیِّئَاتُ مَا عَمِلُوا وَحَاقَ بِهِم مَّا کَانُوا بِهِ یَسْتَهْزِئُونَ(33)

Və çəvon əməlon yavətiyon boəvon ruşin bəbe və çəvon məsxərə kardə çiyon əvoni dəbəqəte.

Navnə bərnomədə çı munkiron miadi barədə bıə sıxani bəyon kardedəbe.joqo ki,əvon de təhğıramizə ləhn iyən toni votedəbin:əmə zıneydənimon ğıyomət çiçe və çəy bə əməl omey barədə qıləy qımonimon ni.

In ayə çəvon cəvobədə hamyedə:qıləy zəmon ki,ğıyoməti ruj bome bərəse,çəvon əməlon pərvəndə və nomə bəçəvon daston doey bəbe və əvon bəvindeyn ki,çəvon kardə qırd koon əyo ğeyd kardey bıə və həni hiççi inkor kardey mumkin ni.bə zəmon ki,yavə koon çəvon vədə boəvon oşko bəbe və təcəssımış pəydu kardə,bəvədə dəbərəseyn ki,çəvon məsxərə kardə çiyon ımruj çəvon dovnəş qətə və çəvon bo fərol kardey iyən nicotiro qıləy roşon ni.çın ayəlu omutedəmon:

1-ğıyoməti ruj çı insoni əməlon iyən çəy məxfiyə təsir iyən ağıbəti buruz iyən zuhur pəydu kardə ruje.

2-bə İlahi hukm  və təlimon məsxərə məkəmon ki,jıqo rəftor qıləy ruj çəmə yəxə bəqəte.

وَقِیلَ الْیَوْمَ نَنسَاکُمْ کَمَا نَسِیتُمْ لِقَاءَ یَوْمِکُمْ هَـذَا وَمَأْوَاکُمُ النَّارُ وَمَا لَکُم مِّن نَّاصِرِینَ(34)

Bəvon votey bəbe ımruj şıməni yodo bebəkardemon.çoko ki,şımə ıştə ımrujnə vindemon çı viro bekardəyonbe və şımə vırə otəşe iyən boşımə hiç qıləy koməkəkə nibəbe.

Kərimə-Ğıroni fərhənqədə ehanə viro bekardey təbiiyi bıbu,çəyku sıvol kardey nibəbe.zira inson təbiiyi formadə kali koon çı yodo bekardedə.bənə əkəsi ki,nımoji votey çı viro bekardedə.əmmo əgər həmonə yodo bekardey bə Xıdo hukmon be etıno iyən dığğət nıkardey mənoədə bıbu,çəy qıləy cəzoş heste.zira həyğətədə ım viro bekardey ni,bəlkəm səhlənkorəti kardeye.

Bəzi fərdon ğıyoməti ruji bə həşə jeydən və ıştə bın inkorədə isror həm kardedən.kali qıləyniyon həm jıqo qıləy nəzəşon ni,əmmo bə ğıyoməti ruji hiç qıləy dığğət kardedənin iyən jıqo əməl kardedən ki,quya ğıyomətışon çı ğəsdo viro bekardə.har dıqlə qrup deçəvon əğedə iyən əməlon mutənosib bəvon cəzo doey bəbe və Xıdovənd jıqo deəvon rəftor bəkarde ki,jıqo bızın əvonış çı viro bekardə və əvoni ıştə oxoş nıbə rəhmətiku məhrum bəkarde.həlbəttə Rəhim iyən Mehribonə Xıdo ikəsi çı viro bekardey iyən ıştə qırd lutfonku əy məhrum kardey ko,bo insoni vey dardnok iyən ğəmqine.ayə bə ım nuktə işorə kardedə ki,jıqo fərdon vırə cəhəndımi otəşe və çəvon hiç qıləy hami iyən koməkəkəşon nibəbe.çın ayəku omutedəmon:

1-hakəs ıştə bovə iyən rəftorədə ğıyoməti çı viro bekardo,həmonə ruji bənə yodo bekardə bıə fərdon deəy rəftor kardey bəbe və Xıdovənd əy bəçəy ıştən holi vobədoe.

2-bə miadi imon kafi ni.muminə inson bəpe ha holədə miadi ıştə viro oqəto.

ذَلِکُم بِأَنَّکُمُ اتَّخَذْتُمْ آیَاتِ اللَّـهِ هُزُوًا وَغَرَّتْکُمُ الْحَیَاةُ الدُّنْیَا فَالْیَوْمَ لَا یُخْرَجُونَ مِنْهَا وَلَا هُمْ یُسْتَعْتَبُونَ(35)

Im bəçəy xotoye ki,şımə bə Xıdo ayəon məsxərə kardeyone və dınyo jimoni şıməş bə dast dənoe.çən,ımruj nə cəhəndımiku xaric kardey bəbeyn və nə çəvon uzron ğəbul kardey bəbe.

Vəynə ayəon dəvomədə ın ayə insonon bə cəhəndım şıey səbəbi dıqlə rəğ-rişə işorə kardedə. qıləyni bə dınyo jimoni aşığ bıey və coqləyni həm bə Xıdo ayəon istehzo kardeye.həyğətədə,bə dınyo jimoni de şiddəti dıl dəvastey boyis beydə inson maqi bədiqə dınyo iyən ğıyoməti ruji inkorko ta de rohətə formə iyən asudə deştə nəfsoni ləzzəton koy məşğul bıbu.

Im fərdon,bəvon pand doə iyən əvoni de cəhəndımi otəşi torsınə kəson mığobilədə de təhğıramizə formə mandedən və votedən:kom kəsi çə dınyokuş qıləy xəbə vardəşe ki,şımə əməni deəy torsıneydon?kom vəhışt?kom cəhəndım? Imon həmmə puçə və`dəonin.nağdi bıqət və nisyə vobıdə!.

Ruşine ki,jıqo fərdon deştə ıncur təftoron çı tobə iyən oqardemoni dumo nin və bın vəzyətədə həm çı dınyoku şeydən.əvon ğıyoməti ruji bo cəhəndımiku fərol kardero qıləy ro pəydu kardey nibəzıneyn və qıləy ğəbul bıəninə uzrışon həm ni ta bəçəvon çı cəhəndımi otəşiku xilosi boyis bıbu.çın ayəku omutedəmon:

1-insoni bədağıbət bıey mənşə,bə dınyo,bəçəy ğudrət iyən ləzzəton aşığ bıeye.

2-Xıdovəndi huccətış boştə həmmə bandəon təmomış kardə və çı uzrxahəti iyən bəhonə roş həm bastə ta ğıyoməti ruji ikəs iddio nıkoki,az zıneydənıbim.

فَلِلَّـهِ الْحَمْدُ رَبِّ السَّمَاوَاتِ وَرَبِّ الْأَرْضِ رَبِّ الْعَالَمِینَ(36)

Çən,həmd iyən sıtoyiş bə Xıdo məxsuse.osmonon iyən zəmini pərvərdıqor.həmmə aləmon rəbb.

وَلَهُ الْکِبْرِیَاءُ فِی السَّمَاوَاتِ وَالْأَرْضِ وَهُوَ الْعَزِیزُ الْحَکِیمُ(37)

və osmonon iyən zəminədə yolyəti iyən əzəmət(fəğət) bəy məxsuse və Əv Əziz iyən Həkime.

In ayəon ki,Casiyə mıborəkə surə oxonə ayəonin,bə Xıdovəndi hestemoni aləmədə bıə məğami işorə kardedə və hamyedə:əzəmətinə osmonon iyən oxoş nıbə kəhkəşon və planetonədə hestemoni koon tədbir,Xıdovəndi ixtiyorədəy.çoko ki,zəmin iyən zəmini əhli koon tədbir ki,bın əzəmətinə hestemoni aləmədə vey noçiz iyən kam bə hisob omeydə-de Xıdovəndi ğudrəti bə əməl omeydə.

Əv deştə məğlub nıbə iyən benəhoyətə ğudrəti və bəştə elm iyən hikməti əsos,hestemoni aləmi idorə kardedə.liza çəmə insonon vəzifə Xıdovəndi iyən hestemoni aləmədə çəy məğam və roli çok zıneye.təbiiye ım mərıfət və zıney bəçəy sıtoyiş iyən şukri boyis bəbe.zira har qıləy xəy və bərəkət çəy pokə zotikuye və təmom sıtoyişon bəy oqardedə.

Oxonə ayədə bə ım mevzu işorə kardedə ki,Xıdovəndi əzəməti əsəron,hevujə osmonon iyən qırd zəmin və həmmə aləmonədə oşkoye və osmonon iyən zəminədə bıə əzəmət fəğət bəy məxsuse.çın ayəonku omutedəmon:

1-təmom hestemoni aləm Xıdovəndi irodə jiyədə idorə beydə və bın koyədə osmon,zəmin iyən nevbənevə təzahuron miyono qıləy farğ mevcud ni.

2-izzət iyən ğudrət bəvədə bə dardi dəvo bəkarde ki,çı elm iyən hikməti sayədə bıbu.

3-Xıdovəndi ibodət səhihə mərıfəti girovədəy və fəğət Əv bə yolyəti,həmd iyən sıtoyişi loyığe.