936-ə hissə-Əhğafi surə -11-14 şərifə ayəon

936-ə hissə

وَقَالَ الَّذِینَ کَفَرُوا لِلَّذِینَ آمَنُوا لَوْ کَانَ خَیْرًا مَّا سَبَقُونَا إِلَیْهِ  وَإِذْ لَمْ یَهْتَدُوا بِهِ فَسَیَقُولُونَ هَـذَا إِفْکٌ قَدِیمٌ(11)

Və kofiron çı muminon barədə voteşone:ehanə(ım din) çok bıəbe,əvon çəy(ğəbul kardeyədə) çəməsə bənav nıəbin və çun deçəy vositə hidoyət pəydu kardəşon ni,rəyrə bəvoteyn:ım qıləy kanə duye.

İslomi-Peyğombəri(s) dəvəti sıftədə fəğır,dast təyli iyən nokə bıə  şəxson çı cokəsonku bənav bə peyğombəri imonışon varde.zira çəvon qıləy noməşru və ğeyri-ğanuni mol iyən mənafeşon nıbe ki,bə xətər eqıno və bə kibr iyən ğururi dıço nıbin ki,çı peyğombəri mığobilədə bımandon.

Camiyə zəyifə təbəğə bə İslomə dini dim qətey boyis be ki,Məkkə əşrof iyən yolon qıləy reaksiyə nışon bıdon və bıvoton:ımon i dastə fəğır-fuğəra və məşhur nıbə şəxsonin.ehanə ım ayin qıləy səhihə dinebu, sıftədə əmə bəpe bəy imon biyəmon.çumçıko,əmə dərk,fame,ğudrət iyən sərvəti cəhəto çəvonsə barzimon.

Çı kofiron ım ğururamiz iyən məntığiku bə diyəro bıə sıxanon bəçəvon tuğyongərəti iyən təkəbbırəti xoto be.və holın ki,muşkilon rəğ-rişə hejo çəvon ıştəku be,nəyinki,İslomə ayinədə.əgər çəvon dılonsə çı təkəbbırəti iyən məğrurəti pardə bıə nıəbe,əgər əvon de dınyo mol-əmvoli,məğam iyən posti məst bıə nıəbin və əgər əvon ıştəni pekırney və barz qətey koyku dastışon kəşəbe və bənə həmonə fəğırə insonon pokədıl iyən həxtələb bıəbin,əvon həm de surəti bə İslomə dini səmt dim əqətin.

Liza ayə dəvomədə hamyedə:çunki,əvon Ğıroni hidoyətışon ğəbul nıkarde,rəyrə bəvoteyn:Ğıron Xıdo kəlom ni və bənə coqlə kanə əfsonəon qıləy puç və pesoxtə bıə sıxanonin.əvon bə Ğıroni iftiro ğandeyışon boştə imon nıvardero qıləy sipər ğərolışon doə.çın ayəku omutedəmon:

1-kofiron ıştəni bəsə mısılmononsə vey ağılmand iyən zırənq zıneydən və qımon kardedən ki,çəvon məktəb iyən ayin bəsə İslomə dinisə vey çoke.

2-kofieon bə Ğıron iyən İslomi-Peyğombəri(s) doə norəvoə nisbəton rəğ-rişə, çəvon inodkorəti,kibr iyən məğrurətiyədəy, nəyinki,çəvon qıləy məntıği dəlilışon heste.

وَمِن قَبْلِهِ کِتَابُ مُوسَى إِمَامًا وَرَحْمَةً  وَهَـذَا کِتَابٌ مُّصَدِّقٌ لِّسَانًا عَرَبِیًّا لِّیُنذِرَ الَّذِینَ ظَلَمُوا وَبُشْرَى لِلْمُحْسِنِینَ(12)

Və çəy bənav Mosə kitob qıləy rahnuma və rəhmət be və ım Ğıron ərəbi zıvono qıləy kitobe ki,(əy) təsdığəkəy ta bə sıtəmkoron tars bıdo və bo çokə ko soybon qıləy bəşorət bıbu.

Məkkə mışrikon bə Ğıron iyən İslomi-Peyğombəri(s) ğandə norəvoə iftiron mığobilədə ki,əvon əy qıləy kanə əfsonə hisob kardedəbin,ın ayə hamyedə:çın kitobi sadığ və rostə nışonəonku qıləyni ıme ki,İslomi-Peyğombəri(s) nom və nışonəon Tovratədə omə.Ğıroni ayəon həm bənə Tovrati ayəon həmohənqe və iyande təsdığ kardedən.ım ko çın kitobon iqlə məbdə iyən mənşəku bıey nışon doydə.

Harçənd Tovrati zıvon ibri iyən Ğıroni zıvon ərəbiye,əmmo har dıqlə kitobi mehtəvo iyən məzmun milləti bə Xıdo səmt dəvət və bəçəy əmron pemandeyku iborəte.həmçinin har dıqləyni hədəf həm de zolımon mıborizə bardey iyən bəvon çəşnavi doey və bə saleh iyən çokə ko soybon çı səbarzəti iyən hərəbaxtəti mıjdəvoni doeye.çın ayəku omutedəmon:

1-osmoniyə ktobi nozil bıey,torıxi dırozi bo bəşəri hidoyətiro İlahi adətonku qıləyni bıə.ım kitobon iyande təyid kardedə və bəico həmrayin.nəyinki,iyande nəfy və inkorkon.

2-osmoniyə kitobon  Xıdo rəhmətiku bıə cilvəonin və qıləy camiyə osmoniyə kitobi boştə rahnuma və rəhbər ğərol nıdoə holədə,bə İlahi rəhməti dast pəydu kardey nibəzıneyn.

3-bə Xıdo imon vardey,de bə cokəson sıtəm kardey mıtobiğ və i ni.imoni bəvədə foydəş bəbe ki,de ehson iyən çokə ko bə oxo bırəso.

إِنَّ الَّذِینَ قَالُوا رَبُّنَا اللَّـهُ ثُمَّ اسْتَقَامُوا فَلَا خَوْفٌ عَلَیْهِمْ وَلَا هُمْ یَحْزَنُونَ(13)

Beşək,əkəson ki,votedən:çəmə pərvərdıqor Allahe(Xıdoye).peşo (bın royədə) mığovimət nışon doydən. nə boəvon qıləy tars heste və nə əvon ğəmqin bəbeyn.

أُولَـئِکَ أَصْحَابُ الْجَنَّةِ خَالِدِینَ فِیهَا جَزَاءً بِمَا کَانُوا یَعْمَلُونَ(14)

əvon vəhışti əhlin iyən əyo əbədi bəmandeyn. bəçəvon kardə koon xoto(ım qıləy)mıkofote.

In ayəon osmoniyə kitob iyən peyğombəron ğəbul kardə çı həyğiyə muminon simo jıqo tərsim kardedə, kəşeydə və hamyedə:Vohidə Xıdo pərəstış kardə həmonə şəxson voteşone ki,Xıdo çəmə pərvərdıqore və əvon bın istiğomətədə de mətonəti sabit ğədəm mandin.ruşine ki,sırfən bə Xıdo ğəlbiyə bovə və ya kali kəlməon və ləfzon bə zıvon vardey bo bə Xıdo imon vardero vəs kardedəni.bəlkəm əmələdə həm bəpe bə Yolə Xıdo çəməku piyə çi əsos əməlkəmon iyən bın royədə ğoym iyən sabit ğədəm bımandəmon. nəyinki,bə bəzi benizoməti iyən muşkiloton bənav beşey xoto,çı imoni qovhəri çı dasto bıdəmon,Xıdo roy vobıdəmon və çı mol,sərvət iyən ıştə nəfsoni həvəson irzo iyən si kardey dumo bıbəmon.məxsusən qıləy əsrədə ki,çı fəsod,beəxloğəti iyən bə qıno mırtəkib bıey zəminə ziyode,odəmi ıştə imoni oqətey ko vey saxte və mığovimət nışon nıdoə holədə çımi imkonış ni.

Həlbəttə,Xıdovənd həm bə rostə muminon dınyo iyən axırətədə mıkofot bədoe və bəvon həmonə bın dınyoədə qıləy oroməti iyən xotırcəməti bəbaxşe.jıqo fərdon nə çı omə hodisəonku qıələy tars və vohiməşon heste və nə çı dəvardəyonku qıləy ğəmqinəti iyən ğussə.çımi mığobilədə əmmo mumkine sərvətin iyən cismi asayişi dılədə bıə ğudrətinə fərdon hiç qıləy rufi iyən psixoloji rohətətişon nıbu və qahi zəmon həm mumkine əvon boştə stres və həyəconon bərtərəf kardero,bə çandə nev damon,həb və hətto bə narkotik maddəon səmt həm dim bıqəton.

Muminon dınyoədə ğəlbi iyən rufi oroməti iyən xotırcəmətisə əlovə,Xıdovənd axırətədə həm tohidi royədə qəm şodə və bın royədə mığovimət nışon doə kəson bə vəhışt daxil bəkarde ki,çəy məkoni hevujəti iyən zəmoni mıddət ki,bəşər əy dərk ğudrətış ni.əyo vəhışti əhl əbədi jimon bəkardeyn və çəy benəhoyətə nemətonku ləzzət bəbardeyn.çın ayəonku omutedəmon:

1-sırfən imon vardey və tohidi iğror kardey vəs kardedəni.bəlkəm həmməysə muhim mığovimət nışon doey və həmonə royədə sabitğədəm mandeye.

2-ikəs ki,bə Xıdo imonış heste,ğərəz Xıdo hiçkəs iyən hiççiku tarsış nibəbe.

3-bo dəvardəyon ğussə hardəkəson əvonin ki,bə xətoə roy səmt şeydən və peşo peşmon beydən.əmmo dayima həxə royədə hərəkət kardə kəson ıştə dəvardəyonku peşmon beydənin iyən ğussə həm hardedənin.