939-ə hissə-Əhğafi surə -24-28 şərifə ayəon

939-ə hissə

فَلَمَّا رَأَوْهُ عَارِضًا مُّسْتَقْبِلَ أَوْدِیَتِهِمْ قَالُوا هَـذَا عَارِضٌ مُّمْطِرُنَا  بَلْ هُوَ مَا اسْتَعْجَلْتُم بِهِ رِیحٌ فِیهَا عَذَابٌ أَلِیمٌ (24)

Çən,qıləy kuyə(kutlə) vindeşone ki,bəçəvon sərəzmini dimış qəte,voteşone:ım qıləy avəy ki,boəmə voyedə.(Hudi voteşe:ne)bəlkəm qıləy əzobe ki,şımə de surəti əy tələb kardedəbiyon.qıləy tındəvoye ki,bəvədə qıləy dardnokə əzob heste.

تُدَمِّرُ کُلَّ شَیْءٍ بِأَمْرِ رَبِّهَا فَأَصْبَحُوا لَا یُرَى إِلَّا مَسَاکِنُهُمْ  کَذَلِکَ نَجْزِی الْقَوْمَ الْمُجْرِمِینَ(25)

(qıləy vo ki)deçəy pərvərdıqori fərmoni həmmə çi bəyənde jeydə (hırd kardedə).çən,jıqo bin ki,ğərəz çəvon kəon hiççi mışohidə beydenıbe.əmə jıləvoni bə cinoyətkoron cəzo doydəmon.

Vəynə bərnomədə votemone ki,Adi ğovm ıştə peyğombəri dəvəti mığobilədə,bəştə inodkorəti xoto voteşone:əmə ıştə royku dast nibəkəşemon.tı həm ehanə rost votedəşbu,bəmə və`də doə əzobi nozilkə. çən,çoko ki,huccət bo milləti təmom be və əvon ıştən əzobi nozil bıey tələb kardeşone,əve Xıdovəndi qıləy tındə voş vığande ki,deəy bə ico qıləy avə həm hestebe.Adi ğovm ufuğədə siyo iyən tındə avə vində zəmonədə şo və xoşhol bin və jıqo qımon kardeşone ki,rəyrə boəvon de bərəkəti pur bıə qıləy voş bəvoe. əmmo nəyinki,voş nıvoe,bəlkəm qıləy sard,vironəkə iyən sutunə tındə vo qıniye və ım qınokorə ğovmi həlokəti zəminəş hozzı karde və ğərəz çəvon kəon həni co hiççi nıhaşteşe.

Bə Hağğə mıborəkə surə 7-ə şərifə ayə əsos,vey şiddətin iyən vironəkə ım tındəvo haft rujo-haft şəv dumo yənde dəvomış pəydu karde tayinki,çəvon jimoni səyfə mur doey be və çəvonku hiçki bəyji nımande.

Im həyğətədə bo qırd inodkorə mucrim,qıniokor iyən kofiron qıləy çəşnaviye ki,əgər şımə həm bın rioyədə hərəkətkon,çımisə qıləy çokə tale və sərnıvışton nibəbe.çın ayəonku omutedəmon:

1-de həx iyən həyğəton inodkorəti kardey,qıləy saxtə əzobış heste.dəvardə ğovmon torıx jıqo qıləy ibrətış bo vəomə milləti bağiş haştə.

2-təbiiyi təzahuron Xıdovəndi ğudrəti jiyədəy.avə,vo iyən sayir təbiiyi təzahuron həm çı Xıdovəndi lutf iyən rəhməti nışonə  bıey bəzıne və həmən çəy ğəhr iyən ğəzəbi nışonə.çoko ki,qıləy zəmon ki,bə avəon hərəkəti iyən bə voşi nozil bıey boyis beydə və qıləy zəmon həm çı məhfəti vəsilə iyən vositəy.

3-dınyoədə çı mucrimon həlokət,İlahi sınnət və adəte və çı dəvardə hukumət iyən ğovmonku mandə əsəron bo ibrətiro qıləy dıjdə nımoyişqohe.

وَلَقَدْ مَکَّنَّاهُمْ فِیمَا إِن مَّکَّنَّاکُمْ فِیهِ وَجَعَلْنَا لَهُمْ سَمْعًا وَأَبْصَارًا وَأَفْئِدَةً فَمَا أَغْنَى عَنْهُمْ سَمْعُهُمْ وَلَا أَبْصَارُهُمْ وَلَا أَفْئِدَتُهُم مِّن شَیْءٍ إِذْ کَانُوا یَجْحَدُونَ بِآیَاتِ اللَّـهِ وَحَاقَ بِهِم مَّا کَانُوا بِهِ یَسْتَهْزِئُونَ(26)

Və həyğətən bəvon(Adi ğovmi) jıqo imkonaton domone ki,bəşmə(Məkkə əhli) doəmon ni və boəvon quş,çəş iyən dıl ğərol domone.əmmo çəvon quş,çəş iyən dılon bəçəvon holi qıləy foydəş baxşış nıkarde. zira əvon hejo Xıdo inkor kardedəbin və (nəhoyətən) qıləy əzob ki,bəy məsəxərə kardedəbin,əvonış dəqəte.

Adi ğovm Məkkə nezi Cəzirıətul-Ərəb ya Ərəbi ləpəkədə jimon kardedəbin və çəvon kəon xərobətiyon çəvon səfə kardə zəmonədə roonsə mışohidə kardeydəbin.liza Kərimə-Ğıron İslomi peyğombəri(s) mığobilədə mandə və inodkorəti nışon doə bə Məkkə mışrikon xitobən hamyedə:Adi ğovmi millət cismi iyən moliyyə cəhəto həm şıməsə vey zumand bin,əmmo ım ğudrət iyən sərvət,İlahi əzob nozil bıə zəmonədə nə boəvon qıləy foydəş be və nə əvonış peroxne nızıne.

Əvoni nicot doə çi bəpe həxı zıney iyən əy ğəbul kardey bıbu.əvon bənə co insonon çı çəş,quş iyən ağli soyb bin.əmmo əvon çəyku bo həyğəton zıneyro bəhrəşon nıbarde.əvon ıştə çəş iyən quşışon bəsə həx iyən həyğəton piyo bastəşone və qımon kardedən ki,deştə ğudrət,sərvət iyən imkonaton çı Xıdovəndi mığobilədə mandey bəzıneyn.liza əvon bəştə peyğombər Hudi(ə) çı İlahi əzobi həxədə bıə xəbərdorətiyon məsxərə kardedəbin və bəy dığğət kardedənıbin.çın ayəku omutedəmon:

1-ğudrət iyən sərvəti soyb bıey,bə insoni nicoti boyis nibəbe.bəlkəm bo həx iyən həyğəton dərkiro ağl,quş iyən çəşiku oko doey,çı bəşəri nicot iyən hərəbaxtəti amile.

2- həx iyən həyğəton inkor,bə insoni həlokəti boyis bəbe və maddi imkonaton iyən sərmoyəon əy bə məhf bıey səmt bəşıkırne.

3-bə İlahi ayəon iyən peyğombəron çəşnaviyon məsxərə kardey,dınyoədə bə İlahi ğəzəbi boyis beydə.

وَلَقَدْ أَهْلَکْنَا مَا حَوْلَکُم مِّنَ الْقُرَى وَصَرَّفْنَا الْآیَاتِ لَعَلَّهُمْ یَرْجِعُونَ(27)

Və beşək şımə ətrofədə bıə ovdonətiyon nobud kardemone və mıxtəlifə formadə ıştə ayəon bəyon kardemone ta ğasbu oqardon.

فَلَوْلَا نَصَرَهُمُ الَّذِینَ اتَّخَذُوا مِن دُونِ اللَّـهِ قُرْبَانًا آلِهَةً  بَلْ ضَلُّوا عَنْهُمْ  وَذَلِکَ إِفْکُهُمْ وَمَا کَانُوا یَفْتَرُونَ(28)

çən,çıro çəvon bo Xıdo əvəzi bo təğərrıbiro vıjniyə mə`budon bəvon komək kardeyış nızıne?bəlkəm çəvon nəzdiku məhf iyən nobud bin və çəvon du iyən duyədə boftə çiyon (ağıbət) ım be.

Navnə ayə dəvomədə ki,Adi ğovmi həlokəti bəyon kardedəbe,ın ayə hamyedə:nəyinki,fəğət Adi ğovm, bəlkəm coqlə ğovmon ki,şımə Məkkə əhli ətrofədə jimon kardedəbin,çı həxı mığobilədə mandə zəmonədə bə həlokət rosnemone.bənə Səmudi ğovmi ki,Cəzirətul-Ərəbi şimolədə və Səba ğovmi ki, cənubədə bin.

Bo həmonə ğovmon har qıləyni həm deçəvon dərk iyən fame mıtənosib ıştə ayə və nışonəon nozil kardemone ta huccət bəvon təmom bıbu və boçəvon şırk iyən kufri roy qəteyro hiç qıləy uzr iyən bəhonə vırə nımando.əmmo əvon bə pesoxtə bıə mə`budon soyəx şin və jıqo fik kardeşone ki,ım bıton bəçəvon nicot iyən xoşbaxtəti boyis bəbe.qıləy holədə ki,əzobi nozil bıə zəmonədə həmonə mə`budonku hiç qıləyni bəvon komək kardeyış nızıne,bəlkəm İlahi cəzoku əvon hətto ıştə conışon həm peroxney nızneşone.liza əvon çı miyoniku şin və çəvonku hiç qıləy əsər-əlomət həm nımande.çın ayəonku omutedəmon:

1-Kərimə-Ğıroni tərbiyəvi şivəonku qıləyni,milləti bo dəvardə torıxi mutaliyə dəvət kardey iyən çəvon taleku ibrəti dərsi qəteye.

2-Xıdovənd çı bəşəri hidoyət iyən çəy bə İlahi fıtrəti səmt oqardemoni zəminəş hozzı kardə.muhim çı insoni inhirofə royku oqardemoni tələb kardeye.

3-bidətamiz,xorafi iyən mevhumatiyə fikon boyis beydə millət boəvon hiç qıləy təsir iyən foydəş nıbə əşyoon bo bə Xıdo təğərrıbi vositə iyən səbəbon bızınon.