940-ə hissə-Əhğafi surə -29-35 şərifə ayəon

940-ə hissə

وَإِذْ صَرَفْنَا إِلَیْکَ نَفَرًا مِّنَ الْجِنِّ یَسْتَمِعُونَ الْقُرْآنَ فَلَمَّا حَضَرُوهُ قَالُوا أَنصِتُوا  فَلَمَّا قُضِیَ وَلَّوْا إِلَى قَوْمِهِم مُّنذِرِینَ(29)

Və bə zəmon ki,cınonku i dastə bəştı səmt rəvonə kardemone(vığandemone) ta Ğıroni bıməson çən,çoko çəy nəzdədə hozzı bin,voteşone:sakit bımandənən(və quşkənən).çən,çoko(ayəon məsey)bə oxo rəse, bəştə ğovmi səmt oqardin ta bəvon çəşnavi bıdon.

Vəynə proqramonədə bə Məkkə mışrikon xitobən hamyedə be ki,deştə inodkorəti iyən bəhonəon bo imon vardey hozzı nıbin.ın ayəon həm dəvomədə hamyedə:harçənd şımə imon nıvardeyone,əmmo cınonku idastə ki,şımə həm bəçəvon vucudi bovə kardedon və şımə ıştə jimonədə boəvon qıləy rol ğayiliyon,əvon de Ğıroni ayəon məsey bə peyğombəri imon vardeşone və cokəsonışon həm bə İslomə ayini səmt dəvət kardeşone.

Cıni nomədə mevcudoton vucud qıləy mevzuye ki,Kərimə-Ğıronədə de oşkoə formə bəyon bıə.Ğıroni surəonku qıləyni nom həm Cıne ki,həmonə surədə çəvon bə Xıdovəndi vohidəti,bə Ğıron iyən miadi etığodi və bəçəvon miyono dıqlə mumin iyən kofirə dastə həm işorə kardedə.çın ayəku omutedəmon:

1-cın həm bənə insoni ağl,şuur iyən təklif və vəzifəş bıə qıləy mevcude və əvon çı irodə iyən ixtiyori soybin.

2-fəğət imoni ğəbul kardey kafi ni.bə həxə roy səmt cokəson irşod iyən dəvət kardey həm lozıme.

قَالُوا یَا قَوْمَنَا إِنَّا سَمِعْنَا کِتَابًا أُنزِلَ مِن بَعْدِ مُوسَى مُصَدِّقًا لِّمَا بَیْنَ یَدَیْهِ یَهْدِی إِلَى الْحَقِّ وَإِلَى طَرِیقٍ مُّسْتَقِیمٍ(30)

Voteşone:ha çəmə ğovm ha! həyğətən,əmə qıləy kitobi (ayəon) məsemone ki,Mosə bəpeşt nozil bıə və ıştə bəpeştə bıə kitobon təsdığ kardedə və milləti bə həx iyən rostə roy (səmt) hidoyət kardedə.

یَا قَوْمَنَا أَجِیبُوا دَاعِیَ اللَّـهِ وَآمِنُوا بِهِ یَغْفِرْ لَکُم مِّن ذُنُوبِکُمْ وَیُجِرْکُم مِّنْ عَذَابٍ أَلِیمٍ(31)

ha çəmə ğovm ha! İlahi dəvətəkə icobətkənən və bəy imon biyənən ta Xıdovənd şımə (kali) qınoon bıbaxşo və şıməni qıləy dardnokə əzobiku pənoh bıdo.

وَمَن لَّا یُجِبْ دَاعِیَ اللَّـهِ فَلَیْسَ بِمُعْجِزٍ فِی الْأَرْضِ وَلَیْسَ لَهُ مِن دُونِهِ أَوْلِیَاءُ  أُولَـئِکَ فِی ضَلَالٍ مُّبِینٍ(32)

və hakəs İlahi dəvətəkə icobət nıko,hiçvaxti (Xıdo)zəmini dimisə ociz kardey nibəzıne və ğərəz Xıdovəndi hiç qıləy dust və koməkəkəşon nibəbe.jıqo kəson oşkoə zəlolətədən.

Bə ın ayəon əsos muminə cınon bəştə ğovmi səmt oqardə zəmonədə,əvonışon jıqo irşod karde ki, həmonə,Mosə(ə) de kitobi bə ico vığandə Xıdo,ısət coqlə qıləy peyğombərış de Ğıroni nomo qıləy co kitobış vığandə.əmə ımruj çın kitobi ayəon məsemone və əvımon həm bənə Mosə(ə) Tovrati vindemone ki, milləti bə həxə roy səmt dəvət kardedə.

Hakəs milləti bə Xıdo roy səmt dəvət kardə bə ın peyğombəri imon biyo,çı qıno iyən fəsodiku bə diyəro bəmande və Xıdovəndi cəzoku əmonədə bəmande.əmmo əkəson ki,imon vardedənin və inodkorəti kardedən,bızınon ki,Xıdovəndi irodə mığobilədə mandey və çəy ğəzəbiku perəxey nibəzıneyn.zira sıvoy Xıdo çə həmonə cəzo mığobilədə hiçkəs bə insoni komək kardey nibəzıne.çın ayəonku omutedəmon:

1-cınon həm dəvardə peyğombəron torıx iyən osmoniyə kitobi mehtəvoku xəbədon.çəvonku i dastə mumin və i qrup həm kofirin.

2-həxə ro həmonə mıstəğim iyən sərostə roye.qıləy ro ki,insoni harcurnə kəcəro,ifrot iyən təfritiku oqəteydə və bə ədoləti əsos rahnuma kardedə.

3-peyğombəron milləti bə Xıdo dini dəvət kardedən,nəyinki,bəştə səmt.əvon Xıdovəndi barzə hukmon bəyon kardedən,nəyinki,ıştə tələbon.

4-Xıdo inkor və bəy kufr kardey,oxoyədə insoni bə sıvi səmt kəşeydə.qıləy sıv ki,nə inson çəyku fərol kardey bəzıne və nə cokəson çəyku ozod kardey bəzıne.

أَوَلَمْ یَرَوْا أَنَّ اللَّـهَ الَّذِی خَلَقَ السَّمَاوَاتِ وَالْأَرْضَ وَلَمْ یَعْیَ بِخَلْقِهِنَّ بِقَادِرٍ عَلَى أَن یُحْیِیَ الْمَوْتَى بَلَى إِنَّهُ عَلَى کُلِّ شَیْءٍ قَدِیرٌ(33)

Aya nıvindeşone qıləy Xıdo ki,osmonon iyən zəminış ofəyə və çəvon xılğətədə dəmandəni(ociz mandəni), bımyon bəyji kardey bəzıne?.bəle,Əv bə harko ğadire.

وَیَوْمَ یُعْرَضُ الَّذِینَ کَفَرُوا عَلَى النَّارِ أَلَیْسَ هَـذَا بِالْحَقِّ  قَالُوا بَلَى وَرَبِّنَا  قَالَ فَذُوقُوا الْعَذَابَ بِمَا کُنتُمْ تَکْفُرُونَ(34)

və qıləy ruj ki,kofiron otəşi mə`rəzədə ğərol bəqəteyn,(bəvon votey bəbe:)aya ım həx ni?bəvoteyn:bə pərvərdıqori ğəssəm ki,jıləvoniye.(çən) bəvote: bəştə kufri xoto əzobi bıçaştənən.

In ayəon ki,Əhğafi mıborəkə surə oxoyədə omə,ijən bə miadi mevzu oqardedə və bə mışrikon xitobən hamyedə:bəle Xıdovənd ki,osmonon iyən zəminış ofəyə və çəvon xılğətiku oqoniyəni iyən ocizni,ğadire ki,bımyon həm bəyjiko.beşək ın hevujə hestemoni aləmi xılğət,de qırd ım nevbənev və rənqaranqə mevcudoton bə ico çı Xıdovəndi bo har qıləy ko bə vırə rosneyədə bıə noməhdudə ğudrəti nışon doydə. çokonə mumkine ki,jıqo qıləy Xıdo insonon ijən sənibəton xılğətiku iyən qıləy nuyə həyoti icod kardeyku ocize? Im ıştən miadi mumkinətiro qıləy ruşinə dəlil bə hisob omeydə.

Çən,həyğətədə muşkil Xıdo ğudrətədə ni ki,əvon bə miadi imon vardedənin,bəlkəm şımə muşkil çəyu rişə seydə ki,dılon heste bəştə nəfsoni meylon əsos har qıləy ko bıkon və çəy ağıbətiku əmonədə bımandiyon.qıləy holədə ki,ğıyoməti ruji şımə çı cəhəndımi otəşi şuləon mışohidə kardeyədə,şımə bəvədə ğərəz etıofi coqlə çorəyon nibəbe və bəçəy həxəti iğror bəkardiyon.əmmo həni çı foydəş bəbe bəvədə.çunki,bə zəmon boşımə oqardemoniro qıləy ro nibəmande.çın ayəonku omutedəmon:

1-Xıdovəndi ğudrət benəhoyət iyən noməhdude.pərvərdıqori ğudrət ın əzəmətinə dınyo xılğətədə bo ğıyoməti ruji bə insoni sənibəton bəyji bıey mumkinəti həmməysə ruşinə dəlile.

2-ğıyoməti ruji kofiron zıvon de həxı votey oj bəbe.əvon bə Xıdo rububiyyəti,bə ğıyoməti həxəti iyən bə cəzo və mıkofoti nizomi iğror bəkardeyn.əmmo çın iğror iyən etırofi boəvon hiç qıləy foydəş nibəbe.

فَاصْبِرْ کَمَا صَبَرَ أُولُو الْعَزْمِ مِنَ الرُّسُلِ وَلَا تَسْتَعْجِل لَّهُمْ کَأَنَّهُمْ یَوْمَ یَرَوْنَ مَا یُوعَدُونَ لَمْ یَلْبَثُوا إِلَّا سَاعَةً مِّن نَّهَارٍ  بَلَاغٌ  فَهَلْ یُهْلَکُ إِلَّا الْقَوْمُ الْفَاسِقُونَ(35)

Çən,(ha pəyğombər ha!)səbr bıkə.çoko ki,ululəzm peyğombəron səbr kardeşone və boçəvon(əzobiro) əcələ məkə.qıləy ruj ki,bəvon və`də doə bıə çiyon nəzəkənən.jıqo bızın (dınyodə) ğərəz i saatisə vey mandənin. (ın bo həmmə kəsi) qıləy ibloğe(rosneye).çən,aya ğərəz fosiğon(bədə dastə) cokəs həlok bəbe?

In ayə ki,Əhğafi mıborəkə surə oxonə ayəy,bə İslomi peyğombəri(s) xitobən hamyedə:çı mışrikon əzob-əziyyət iyən inodkorəti mığobilədə səbri roy bıqət və boəvon əzobi nozil bıeyro əcələ məkə və dastpoçə məbi.zira,Xıdovənd əvoni ğıyoməti ruji bəçəvon ıştən cəzo bərosne.şımə İlahi dəvəti ibloğ iyən rosnyeku iborət bıə ıştə vəzifə bə vırə bıroson,əmmo çəy nəticə bəşmə ıştən ehdə ni.şımə çı imon biyon ya nıvon kofir bıbon,çəvon hisob-kitob de Xıdoye.

In ayə bə dınyo umri kuto bıey işorə kardedə.dınyo umr anədə çı axırəti jimoni mığobilədə kuto iyən kırte ki,fərdon hiss bəkardeyn ki,jıqo bızın dınyoədə ğərəz isaatisə həm vey mandənin.iyoe ki,əvon bə xəsorət iyən nığılə ğəmqinəti dıço bəbeyn ki,boçi həxə roşon intixob nıkardeşone.əmmo çı foydə ki,həni boçəvon ıştə xətoon əvəzi bekardero hiç qıləy ro baği nibəmande.çın ayəku omutedəmon:

1-peyğombəron Xıdovəndi dəvəti ibloğ kardey məsul şəxsonin,nəyinki,milləti bo imon vardey iyən bə kofiron cəzo doə şəxson.

2-mıxolifon mığobilədə səbr kardey iyən hevujə dıli soyb bıey,İlahi yolə peyğombəron xıslətonin.çəvon tərəfdoron həm bəpe jıləvoni bıbon.

3-İlahi sınnət və adətonku qıləyni,dınyoədə bə kofir iyən qınokoron mehlət doeye.

4-dınyo umr de axırəti mığoyiəsədə vey kuto və bənə qıləy ruji I saatiye.