942-ə hissə-Muhəmmədi surə -7-14 şərifə ayəon

942-ə hissə

یَا أَیُّهَا الَّذِینَ آمَنُوا إِن تَنصُرُوا اللَّـهَ یَنصُرْکُمْ وَیُثَبِّتْ أَقْدَامَکُمْ(7)

Ha imon vardə kəson ha!ehanə bə Xıdo(dini)koməkkon,(əv həm)bəşmə komək və şımə qəmon ğoym bəkarde.

وَالَّذِینَ کَفَرُوا فَتَعْسًا لَّهُمْ وَأَضَلَّ أَعْمَالَهُمْ(8)

və kofir bıə kəson boəvon səlxortıney(səbəyjiyəti)bıbu(və (Xıdovənd) çəvon əməlon məhf bəkarde.

ذَلِکَ بِأَنَّهُمْ کَرِهُوا مَا أَنزَلَ اللَّـهُ فَأَحْبَطَ أَعْمَالَهُمْ(9)

ım boçəy xotoye ki, əvon çı Xıdo nozil kardə çiyku xoşışon omeydənıbe.çən,(Xıdovənd)çəvon əməlon məhf bəkarde.

Navnə proqramədə canqi meydonədə de İslomi deşmınon mıborizəku sıxan votey be,ın ayəon dəvomədə bə muminon xitob kardə holədə hamyedə:canqi meydon çı muharibə iyən mıborizə meydone və bəştə məxsus qıləy muşkilot və saxtiyonış heste.çən,bəpe ıştə din iyən şəxsiyyətii mıdofiyə royədə çı səbr iyən mığoviməti ro bıqətənən və çı canqi meydoniku fərol məkənən.

Əgər şımə çı deşmınon vədə Xıdo dini mıdofiyəkon,peştıpur bıbənən ki,Xıdovənd həm bəşımə komək bəkarde ta şımə bəştə deşmınon səbarz bıbənən.zira Xıdovənd çı deşmınon məhf bıey irodəş kardə və çəvon məkrinə plan və dəsisəon çı miyoniku bəbarde.

Əmmo,əvon bə Xıdo iyən çəy rəsuli həyot baxş kardə təlimon mığobilədə təslim bıey əvəzi,deəy canq və deşmınəti kardeşone.liza oxoyədə əvon həlok bəbeyn və çəvon koon bə qıləy vırə nibərəse.çın ayəonku omutedəmon:

1-fəğət imon vardey kifoyət kardedəni.bəlkəm,bəpe Xıdo dini nəşr və pevolo kardey cəhətədə səy və cəhd kardey bıbu və camiyədə de bə dini royku mınhərifi boyis bıə amilon mıborizə bardey lozıme.

2-bə Xıdo dini komək kardey keyfiyyət har zəmonədə de bəçəvon vəzyət iyən şərayiti dığğət kardə holədə tafutine.qahi zəmon dini həyğəton nəşr kardey iyən de zıvoni təblığ kardey,qahi zəmon de maliyyə koməkon və qahi zəmon həm  deştə coniku dəvardey və confəşonəti kardey vositə.        

3-İlahi təlimonku  ğəlbi kərohət,insoni vucudədə inev çı kuifri nışonəy və bəçəvon çokə koon məhfəti boyis bəbe.

4-de həxı mıborizə bardey ğərəz məhfəti co ağıbətış ni və bə insoni de xətəri pur bıə jimoni məhfəti boyis beydə.          

أَفَلَمْ یَسِیرُوا فِی الْأَرْضِ فَیَنظُرُوا کَیْفَ کَانَ عَاقِبَةُ الَّذِینَ مِن قَبْلِهِمْ دَمَّرَ اللَّـهُ عَلَیْهِمْ  وَلِلْکَافِرِینَ أَمْثَالُهَا(10)

Aya zəminədə seyr nıkardeşone ta nəzəkon çəvon bənav bıə kəson ağıbət çokonə be?Xıdovəndi əvonış (bəyəndeş je və) məhfış karde və bo ın kofiron həm bənə əvon cəzoonış bəbe.

ذَلِکَ بِأَنَّ اللَّـهَ مَوْلَى الَّذِینَ آمَنُوا وَأَنَّ الْکَافِرِینَ لَا مَوْلَى لَهُمْ(11)

ım bəçəy xotoye ki,Xıdo çə kəson yol və koməkəkəy ki,imonışon vardə.əmmo kofiron qıləy rəhbər və dustışon ni.

Navnə ayəon dəvomədə Xıdovənde-Xalığ bın ayəonədə de mısılmınon deşmınəti kardə bə kofir iyən mışrikon çəşnavi doydə ki,ehanə əvon səfəkon və ətrof məntəğəon  seyrkon,navnə ğovmonku baği mandə əsər və xərobəon bəvindeyn ki,məhfo-nobud bıən və həni çəvon hiç qıləy ism və nom həm mandəni.

Şımə qımon məkən ki,jıqo qıləy ağıbət fəğət bəvon məxsus bıə və şıməni nidəbəqəte.şımə həm əgər çəvon qətə ro bışon,hejo bə jəqo qıləy tale dıço bəbiyon və oxoyədə məhvo-nobud bəbiyon.həyğətədə ikəs ni ki,bəşımə koməkko və şıməni nicot bıdo.zira Xıdovənd ıştə deşmınon himoyə və bəvon komək kardedəni.çın ayəonku omutedəmon:

1-dəvardəyon torıxi mıtoliyə və çəvon sərzəmini neziku mışohidə kardey,İslomədə seyro-səyohət iyən nəvemoni hədəfonku qıləyni,bo dəvardə ğovmon sərquzəştonku ibrəti dərsi qəteye.

2-ımruj çı kofiron rohəti dılədə iyən rifohinə jimon əməni bədast nıdəno.çıro ki,çəvon qıləy çokə ağıbətışon ni.

3-bə Xıdo imon vardey,dınyo iyən axırətədə İlahi rəhmət iyən himoyəti cəlb kardey vəsiləy və kufr əvoni çı dasto doey amile.

إِنَّ اللَّـهَ یُدْخِلُ الَّذِینَ آمَنُوا وَعَمِلُوا الصَّالِحَاتِ جَنَّاتٍ تَجْرِی مِن تَحْتِهَا الْأَنْهَارُ وَالَّذِینَ کَفَرُوا یَتَمَتَّعُونَ وَیَأْکُلُونَ کَمَا تَأْکُلُ الْأَنْعَامُ وَالنَّارُ مَثْوًى لَّهُمْ(12)

Xıdovənd,imon vardə iyən salehə koon əncom doə kəson bə(vəhışti)boğon ki,çəy (doon)jintono nəhr (ru) cariye,varid bəkarde və kofir bıə kəson dayima de dınyo(rədəvardə ləzzətonku)bəhrə bardey səşon tasb bıə və hardedən.çoko ki,çolınqə heyvonon hardedən və (nəhoyətən) çəvon vırə otəşe.

Dınyoədə imoni əhli de kufri əhli mığoyisə dəvomədə,ın ayə bəçəvon ğıyoməti ruji bıə məğami mığoyisə işorə kardedə və hamyedə:ə muminon ki,dınyoədə dırıst və səhihə şikilədə bəştə vəzifəon əməlışon kardə və çok iyən salehə əməl bə vırə rosney dumo bin,ğıyoməti ruji qıləy havz və de neməti pur bıə məkonədə və çı şoyvonəti dılədə bəbeyn.əmmo bə həxı ələyh beşə kəson vırə cəhəndımi sutunə otəşe. zira əvon çı dınyəvi rədəvardə ləzzəton dumo bin və əvon bənə ço lınqə heyvonon çı luz-ləvə iyən şəhvəti dumo bin və boştə axırəti ruji hiç qıləy tuşə və azuğəşon hozzı nıkarde.çın ayəku omutedəmon:

1-çın dınyoku ləzzət və bəhrə bardey,ısət çı kam bıbu ya ziyod,rədəvardə iyən foniye.əmə bəpe bəştə əbədiyə axırəti ruji tuşə və azuğə fik bıbəmon.

2-Kərimə-Ğıron insoni çı dınyo iyən çəy ləzzətonku bəhrə bardey cayiz zıneydə,əmmo de insoni bənə heyvoni jimon kardey mıxolife.

3-bo jimoni roy vıjniyero,bə oxonə məğsədi nəzəkəmon,nəyinki,bə vey rədəvardə caddə kəno bıə reçinə cilvəon.

وَکَأَیِّن مِّن قَرْیَةٍ هِیَ أَشَدُّ قُوَّةً مِّن قَرْیَتِکَ الَّتِی أَخْرَجَتْکَ أَهْلَکْنَاهُمْ فَلَا نَاصِرَ لَهُمْ(13)

Və çanədə veyə şəhron ki,(çəy millət) tıni xaric kardə şəhriku vey zumand bin.əmmo əvonımon məhf kardemone və boəvon hiç qıləy koməkə nıbe.

أَفَمَن کَانَ عَلَى بَیِّنَةٍ مِّن رَّبِّهِ کَمَن زُیِّنَ لَهُ سُوءُ عَمَلِهِ وَاتَّبَعُوا أَهْوَاءَهُم(14)

çən,aya ikəs ki,ıştə pərvərdıqori səmtiku qıləy ruşinə dəlilış heste,bənə əkəsiye ki,çəy bədə əməlon çəy nəzədə dərostə bıə və bəştə həvəson pemandən?

In ayəon bə deşmınə kofiron yavə xısləton işorə kardedə və hamyedə:əvon deştə sərvət və ğudrəti fəxr kardedəbin və qımon kardedəbin ki,ikəsi deəvon mıborizə bardey hınə və zuş ni.qıləy holədə ki,dəvardə ğovmon taleku hikoyət kardedə ki,əvon de Xıdovəndi irodə məhf bin və hiçkəsi əvonış nicot doey nızınışe.

Çı kofiron coqlə yavə sıfətonku qıləyni ıme ki,həvaye-həvəs,ləzzət iyən mənfəətpərəstəti jıqo bəvon ğələbəş pəydu kardə ki,ıştə bəd iyən bevəcə koon ğəşənq vindedən.əvon Xıdo tərəfiku iyən həx bıə çiyon yavə vindedən və boəy ğəbul kardey hozzı nin.çın ayəonku omutedəmon:

1-mumin bəpe çı Xıdo deşmınon zohiri zumandətiku nıtarso.zira Xıdovəndi ğudrət çı bəşəri ğudrəton həmməysə barz və bəpeye.

2-deşmınon de mıxtəlifə şivəon bə muminon əzob-əziyyət doydən.əmmo imoni əhl hiçvaxti ıştə imoniku dast kəşeydənin və bəştə mıborizəon dəvom doydən.

3-imoni məbno və əsos,dəlil iyən subute.əmmo kufri təkyəco botılə fikon iyən nəfsoni həvəsonin.

4-inson deştə İlahi fıtrəti çı koon yavəti dərk kardedə.əmmo bəştə nəfsoni tələbon rəseyro ıştə bədə koon puşniyedə və de mıxtəlifə şivəon əy ğəşənq və pəsəndidə cilvə doydə.