974-ə hissə-Tuuri surə -13-21 şərifə ayəon

974-ə hissə

یَوْمَ یُدَعُّونَ إِلى‏ نارِ جَهَنَّمَ دَعًّا(13)

Qıləy ruj ki,de saxtəti bə cəhəndımi səmt tojney bəbeyn.

هذِهِ النَّارُ الَّتِی کُنْتُمْ بِها تُکَذِّبُونَ(14)

(bəvon votey bəbe:)ım həmonə otəşe ki,hejo əy inkor kardedəbiyon.

أَ فَسِحْرٌ هذا أَمْ أَنْتُمْ لا تُبْصِرُونَ(15)

çən,aya ın(əzob həm)coduye?ya şımə(dırıst) vindedəniyon?

اصْلَوْها فَاصْبِرُوا أَوْ لا تَصْبِرُوا سَواءٌ عَلَیْکُمْ إِنَّما تُجْزَوْنَ ما کُنْتُمْ تَعْمَلُونَ(16)

əyo daxil bıbənən iyən bısutənən.çən,səbr bıkon ya səbr nıkon,boşımə yeksone(mısoviye).şımə fəğət ıştə kardə çiyon mığobilədə cəzo doey bəbiyon.

Peyğombəron mıxolifon taktikəonku qıləyni ım be ki,de peyğombəron dasti vositə əncom doey bıə,İlahi mecuzəon sehrı-codu zıneydəbin iyən votedəbin:quya çəmə çəşon sehr kardey beydə və çəmə çəşon piyo qıləy pardə eğandedən ta ıştə kardə koon həyğəton nıdərəsəmon.

Kərimə-Ğıron bın ayəonədə hamyedə:çoko ki,əvon cəhəndımi otəşışon deştə çəşi vindeşone və çəy sutuney hiss kardeşone,bəvon votey bəbe:aya ım həm sehrı-coduye və şımə çəşon həmonə otəşi səhf vindedən?

Peyğombəron mıxolifon bəştə inodkorəti xoto bəvon voteşone:ısət çı bəmə pand bıdon ya pand nıdon, çımi boəmə hiç qıləy təsirış nibəbe və əmə bəşmə ım nəsyəton qıləy dığğət nibəkardemon.ın ayəon hamyedə:ğıyoməti ruji həm bəvon votey bəbe:əvon çı səbrkon və ya ah-nolə bıkəşon,hiç qıləy tafutış ni və şımə bo əzobiku fərol kardeyro hiç qıləy roon ni.çın ayəonku omutedəmon:

1-həxı vədə inodkorəti nəticə,saxt iyən sanqinə əzobe.

2-ğıyoməti cəzo adilonəy və çı insoni ıştən əməl iyən rəftori nəticəy.

3-dini pok iyən mığəddəsə erjon təhğir iyən məsxərə kardey,ğıyoməti ruji məsxərə kardey dumo ıştə bəvarde.

إِنَّ الْمُتَّقِینَ فِی جَنَّاتٍ وَ نَعِیمٍ(17)

Beşək,pərhizkoron (vəhışti)boğon iyən ziyodə nemətonədən.

فاکِهِینَ بِما آتاهُمْ رَبُّهُمْ وَ وَقاهُمْ رَبُّهُمْ عَذابَ الْجَحِیمِ(18)

bəçəvon pərvərdıqori bəvon doə çiyon (xoto) şo iyən məsrurin və çəvon pərvərdıqor əvonış çı cəhəndımi əzobiku əmonədə oqətəşe.

کُلُوا وَ اشْرَبُوا هَنِیئاً بِما کُنْتُمْ تَعْمَلُونَ(19)

(bəvon votey bəbe:) bəştə əncom doə əməlon xoto,nuş(bıbu) bəhənən iyən peşomənən.

Kərimə-Ğıroni tərbiyəvi şivəonku qıləyni tars iyən umu və çəşnavi iyən bəşorəti iyandey kəno ğərol doeye ta hiçkəs çı Xıdovəndi rəhmətiku məyus nıbu və co tərəfiku qıləy bemənoə umu çı ikəsi dılədə icod nibəbe.

Vəynə ayəon dəvomədə ki,çı kofiron iyən munkiron ğıyoməti ruji bıə cəzo bəyon kardedəbe,ın ayəon bə çokə inson iyən pərhizkoron vəhıştədə bıə mıkofoti işorə kardedə və hamyedə:vəhışti əhl bə dıqlə cəhəti xoto şo və xoşholin.qıləyni çı Xıdovəndi hisobış nıbə neməton ki,çəvon ixtiyorədə ğərolış noə və coqləyni İlahi lutf iyən rəhməte ki,bəçəvon xətoon baxşeşi boyis beydə ta əvon çı cəhəndımi əzobiku perəxon.

Vəhışti əhl bənə cəhəndımi əhli ıştə dınyoədə bıə əməlon nəticə ğəbul bəkardeyn.həlbəttə İlahi cəzo iyən mıkofoti şiddət iyən zəyifəti bəçəvon çok iyən bədə əməlon iyən təsiron şiddət iyən zəyfəti əsose. çın ayəonku omutedəmon:

1-vəhışti kilid pokəti,pərhizkorəti iyən pokədastətiye.əgər təğva nıbu,hətto imoni həm coyli foydəş ni.

2-ikəs ki,dınyoədə təğvanin bıbu,ıştəni çı yavə iyən nopəsəndə koonku obəqəte.Xıdovənd həm ğıyoməti ruji əy çı cəhəndımi otəşiku muhafizə bəkarde.

3-vəhışti bə ğeyməti doydən,nəyinki,bə bəhonə.de Farsi zıvonə şayir Sədi təbiri:renc nıbardə holədə xəzinə bə dast nibome.

مُتَّکِئِینَ عَلى‏ سُرُرٍ مَصْفُوفَةٍ وَ زَوَّجْناهُمْ بِحُورٍ عِینٍ(20)

Restədə bıə taxtonədə təkyə bəjeyn və de reçinə diminə siyuə çəşə jimoni həmroon izdivoc bədomon.

وَ الَّذِینَ آمَنُوا وَ اتَّبَعَتْهُمْ ذُرِّیَّتُهُمْ بِإِیمانٍ أَلْحَقْنا بِهِمْ ذُرِّیَّتَهُمْ وَ ما أَلَتْناهُمْ مِنْ عَمَلِهِمْ مِنْ شَیْ‏ءٍ کُلُّ امْرِئٍ بِما کَسَبَ رَهِینٌ(21)

və imon vardə iyən çəvon fərzəndon imonədə bəvon pemandə kəson əmə çəvon fərzəndon bəvon ilhoğ bəkardemon və çəvon əməlon(mıkofotiku) hiççi bəkam nibəkardemon.(bəle) hakəs ıştə əməlon girovədən.

In ayəon bə vəhışti əhli Xıdo bəvon əto kardə coqlə lutfon işorə kardedə və hamyedə:vəhışti əhl,bə de pok iyən çokə şəxson unsiyyət bastey iyən votemon kardey neməti malikin və mınosibə məkonədə əvon şoyvonəti mərosimon bərpo bəkardeyn.

Xıdovənde-Xalığ boəvon pok iyən reçinə jimoni həmroonış təğdırış kardə.bo imoninə merdon cəmoli soyb bıə jenon və bo imoninə jenon çı kəmoli soyb bıə merdon ki,bə iyande uns,ulfət iyən oroməti boyis bəbeyn.vey mumkine imoninə merd iyən jenon ki,dınyoədə çandə soron de iyande çok iyən xoşə holədə jimonışon kardə və axırətədə həm de iyande jimoni həmro bəbeyn.

İmoninə fərzəndon həm bəştə valideyni mulhəğ bəbeyn ta çı vəhışti xıyzon komil bıbu və çəvon şoyvonəti səbəbon çı naviku hozzı kardey bıə.həlbəttə Xıdovənd deştə lutf iyən kərəmi çəvon fərzəndon kali kamə əməlon cubran bəkarde və çəvon əvəzi bebəkarde ta əvon həm ıştə valideyni mərtəbədə ğərol bıqəton iyən deəvon bə ico bıey bızınon.çın ayəonku omutedəmon:

1-vəhıştədə həm bə iffət iyən pokdovnəti rioyət kardey bəbe və çı jenı-merdi rabitəon çı izdivoci çərçivədə bəbe.nəyinki,beəxloğəti iyən avarəçəti.

2-dınyoədə bə noməhrəmi de noloyığə nəzəku ıştə çəşon vi kardə kəson,axırətədə çı reçinə dimə jenon soyb bəbeyn.

3-İslomədə xıyzoni təşkili meyar,imone.liza vəhıştədə həm imoninə jimoni həmroon iyən fərzəndon iyande kəno bəbeyn.

4-bə jimoni həmro niyoz iyən bə fərzəndi məhəbbət,insoni dılədə noey bıə.vəhıştədə həm bə bəşəri ım təbiiyi iyən fıtri ehtiyocon dığğət kardey bıə.