983-ə hissə-Ğəməri surə -9-22 şərifə ayəon

983-ə hissə

کَذَّبَتْ قَبْلَهُمْ قَوْمُ نُوحٍ فَکَذَّبُوا عَبْدَنَا وَقَالُوا مَجْنُونٌ وَازْدُجِرَ(9)

Çımon bənav Nuhi ğovm(həm çəmə nışonəon) du hisob kardeşone və çəmə bandə(Nuh) təkzib kardeşone və voteşone:əv cındoye və(de çandə nev əziyyəton iyən təhdidon ıştə risolətiku)oqətey be.

فَدَعَا رَبَّهُ أَنِّی مَغْلُوبٌ فَانْتَصِرْ(10)

çən,Nuh ıştə pərvərdıqorış (jıqo)vanqış şe:(Xıdolim ha!)mı məğlub bıəm,çən,bəmı koməkkə.

فَفَتَحْنَا أَبْوَابَ السَّمَاءِ بِمَاءٍ مُنْهَمِرٍ(11)

çən,əmə osmoni bəon de vey iyən şurə ovi oj kardemone.

فَفَتَحْنَا أَبْوَابَ السَّمَاءِ بِمَاءٍ مُنْهَمِرٍ(12)

və zəminiku çeşməon bə cuş vardemone.çən,(zəmin iyən osmoni)ov bə qıləy mığəddər bıə ko əsos bə iyande umuj qınin.

Vəynə proqramədə ğıyoməti ruji bə həşə jıə munkiron saxt iyən hovlnokə vəzyətiku sıxan votedəbe,ın ayəon bəçəvon dınyoədə bıə cəzoku qıləy hissə işorə kardedə və hamyedə:həzrəte Nuh(ə) bənə coqlə peyğombəron milləti bə Xıdo səmt dəvət kardedəbe və mecuzəon bəvon nışon doydəbin.əmmo əvon ki, piyedəşon nıbe həxı ğəbulkon,bəy çı cıni təsiri jiyədə bıə iyən ıştə ağlış çı dasto doə cındo voteşone.

Əvon Nuh(ə) təhdid kardeşone ki,əy sənqsar bəkardeyn iyən bə ğətl bərosnen.kofiron hejo de ziyodə əzob-əziyyəti,çandə qılə maneəon çə həzrəti dəvəti vədə ğərol doydəbin ta ıştə risolətiku dast bıkəşo və əvoni bəçəvon ıştən holi vo bıdo.

Jıqo qıləy şərayitədə Nuh(ə) çı Xıdovəndiku tələbış karde ki,bəy çəy mıxolifon mığobilədə koməkko. çunki,Xıdovəndi bəvon huccətış təmom kardə və əvon bə həxə roy səmt nıoqardin,əve əzobış boəvon nozilış karde.qıləy dıjdə ovəyz cari be ki,çəvonku qıləy əsər-əlomətış baği nıhaşte.çın ayəonku omutedəmon:

1-bə peyğombəron səfi votey torıxi dırozi rayic bıə iftiroonku bıə.bədkorə mıxolifon hejo səy kardedən de jıqo qıləy silohi çı peyğombəron şəxsiyyəti terrorkon.

2-imoni əhl bəpe bəştə vəzifəon əməlkon iyən çı deşmıni mığobilədə məğlub bıə surətədə bəpe bə məyusəti dıço məbəmon.zira İlahi ğudrət çı həmmə ğudrəton fevğədəy.

3-voş ki,çı İlahi mehr iyən rəhməti məzhəre,qahi zəmon bə cəzo,ğəhr iyən ğəzəbi boyis beydə.

وَحَمَلْنَاهُ عَلَى ذَاتِ أَلْوَاحٍ وَدُسُرٍ(13)

Və Əv(Nuh) bəy,bə taxtə iyən mıxonış bıə(kəşti)suvar kardemone.

تَجْرِی بِأَعْیُنِنَا جَزَاءً لِمَنْ کَانَ کُفِرَ(14)

qıləy kəşti çəmə nəzə jiyədə cari be. (ım) qıləy peyğombəri mıkofot be ki,bə kufr iyən inkori mə`ruz mandedəbe.

وَلَقَدْ تَرَکْنَاهَا آیَةً فَهَلْ مِنْ مُدَّکِرٍ(15)

və həyğətən əmə əvımon (kəşti) bənə qıləy nışonə unvoni baği haştemone.çən,aya pand qətəkəs heste?

فَکَیْفَ کَانَ عَذَابِی وَنُذُرِ(16)

çən,çımı əozb iyən çəşnavi çokonə be?

وَلَقَدْ یَسَّرْنَا الْقُرْآنَ لِلذِّکْرِ فَهَلْ مِنْ مُدَّکِرٍ(17)

və bərosti əmə Ğıronımon bo zikri(pandiro) hoston kardemone.çən,aya qıləy pand ğəbuləkə heste?

Bə Nuhi ğovmi əzobi nozil bıey bəpeştə,Xıdovəndi bəy əmrış karde ki,qıləy dıjdə kəşti bısoxto ta çandə nev heyvonon bəvədə vırə bıqəto iyən çəvon nəsli inğiroz və bırniye vəy bıqəto.ım vədə omə qıləy dıjdə tufoni omey nışonə be ki,çı zəmini ziyodə baxşi dəbəqəte.ehanə jıqo bıənıəbe,bo ın ko əncom doeyro qıləy ehtiyoc nıbe.

De ım dıjdə tufoni bə əməl omey,çı Nuhi(ə) soxtə kəşti de İlahi fərmoni bə hərəkət dəşe və çəy sakinon perəxin,əmmo kofiron həmmə ğərğ bin,eşin.nəhoyətən ovi pekırey bədiqə,kəşti sakinon de səlomətəti kəştiku xaric bin.əmmo çə həmonə dıjdə kəşti əmandəni ki,çı poə çuyonku iyən i mışt mıxiku iborət be, de Xıdovəndi irodə baği mande ta çı İlahi ğudrəti nışonə bıbu və həxı munkiron bızınon ki,İlahi cəzo saxte iyən çı peyğombəron çəşnaviyon ciddi bıqəton.

Həlbəttə Kərimə-Ğıronədə ım dastoni nəğl kardey bo təzəkkur iyən pandiroye ta insonon pand və ibrət bıqəton iyən de həxı inodkorətiku dast bıkəşon.

Çın ayəon oxoyədə bə Ğıroni hoston bıey işorə kardedə.beşək Ğıroni ləfz jıqoye ki,əy tilovət kardey hoston iyən eyni holədə reçine.çəy ayəon mehtəvo iyən məzmun həm bə qıləy misol iyən dastonon şomil beydə ki,çı mətləbi ğəbul kardey həm hoston kardedə.Həlbəttə Kərimə-Ğıron eyni holədə hostone, sıxanonış həm ğoym iyən mehkəme.həmçinin deməkə ki,hostone,çəy ayəon jıqoye ki,ehanə həmmə aləmi əhl  de iyande mıttəfiğ iyən həmdast bıbon,bənə əy qıləy kitob vardey əzınin. çın ayəonku omutedəmon:

1-Xıdovənd əgər irodəko,çuyə taxtəon insoni çı dıjdə ovəyzi miyono hifz bəkarde,obəqəte.çoko ki, Mosəş(ə) çı Nili ruy ləpəon miyono nicotış doe.

2-ikəs ki,bə peyğombəron vucudi neməti kufrko iyən noşukrətiko,dınyo iyən axırətədə bə əzobi dıço bəbe.

3-çoko ki,çı fironi bədəm oviku perəxe,baği mande,çı Nuhi(ə) soxtə kəşti həm baği mande ta bə vəomə nəsli ibrəti boyis bıbu.

4- Kərimə-Ğıron qıləy hostonə kitobe.demiyən hiçkəs bənə əy qıləy kitob vardey nibəzıne,harçənd həmmə aləmi əhl de iyande dast bə dast həm bıdon.

کَذَّبَتْ عَادٌ فَکَیْفَ کَانَ عَذَابِی وَنُذُرِ(18)

Adi ğovmi(ıştə peyğombər)təkzib kardeşone.çən,çımı əzob iyən çəşnavi çokonə be?

إِنَّا أَرْسَلْنَا عَلَیْهِمْ رِیحًا صَرْصَرًا فِی یَوْمِ نَحْسٍ مُسْتَمِرٍّ(19)

əmə boəvon qıləy məşum iyən dəvominə rujədə saxt iyən sardə tındəvo vığandemone.

تَنْزِعُ النَّاسَ کَأَنَّهُمْ أَعْجَازُ نَخْلٍ مُنْقَعِرٍ(20)

 (qıləy tındəvo ki,Adi zumandə) ğovmış bənə rişəku kandə bıə xımo do andomi vırəku bekardeşe.

فَکَیْفَ کَانَ عَذَابِی وَنُذُرِ(21)

çən,çımı əzob iyən çəşnavi çokonə be?

وَلَقَدْ یَسَّرْنَا الْقُرْآنَ لِلذِّکْرِ فَهَلْ مِنْ مُدَّکِرٍ(22)

və bərosti əmə Ğıronımon bo pandiro hoston kardemone.çən,aya pand ğəbuləkə heste?

Nuhi ğovmi bəpeştə ın ayəon bə Adi ğovmi sərquzəşton işorə kardedə.çə ğovmi peyğombər həzrəte Hud(ə) çanədə əvonış torsıneşe,əvon ijən ıştə kardə yavə koonku dast nıkəşone.əvon hejo əvışon təhğır iyən məsxərə kardeşone və əvon deştə ğəvi iyən zumandə andomi fəxr kardedəbin.

Əvon jıqo qımon kardedənıbin ki,iruj jıqo vəhşətnok iyən zumandə vo,bəçəvon şəhr iyən diyoron qıniye ki,çəvon zumand iyən barzə bolo və cismon bənə zəminiku ıştə rəğ-rişəonku beşə xımo do,çı zəminiku xaric kardeşe və bə har tərəfi ğandeşe.ım hovlnokə tufon i haftə dəvomış pəydu karde və çə vırə sakin iyən çəvon kə-bəonku hiççiş nıhaşte.

Xıdovənd ijən təkror kardedə ki,çıro çı dəvardə etnoson sərquzəştiku ibrət peqəteydəniyon iyən pand qəteydəniyon?.deməkə ki,əmə de çəvon macəraon Kərimə-Ğıronədə nəğl kardey,çəvon taleku pand qətey boşımə hoston kardemone.çın ayəonku omutedəmon:

1-Xıdovənd de pəyğombəron vığandey iyən deçəvon roy bə milləti pand doey,huccətış bə odəmon təmomış kardə və inodkorə fərdon bəpe ıştə kardə bevəcə koon intizroədə bımandon.

2-vo həm bənə ovi Xıdovəndi irodə iyən fərmoni jiyədən.qahi zəmon İlahi mehri nışonə və qahi zəmon de bədkoron cəzo doey vositə.de Xıdovəndi irodə ım həm bə ruşd iyən ozavziye və həmən bə vironəti iyən təxribi boyis bıey bəzıne.

3-Kərimə-Ğıron torıxi kitob ni.əmmo bo milləti hidoyətiro kali fərd iyən ğovmon sərquzəşti zikr kardedə ta həmməkəs pand bıqəton iyən həxı inkoriku dast bıkəşon.