997-ə hissə-Vağiyə surə -75-96 şərifə ayəon

997-ə hissə

 

فَلَا أُقْسِمُ بِمَوَاقِعِ النُّجُومِ(75)

Çən,ğəssəm bə astovəon vırə.

وَإِنَّهُ لَقَسَمٌ لَوْ تَعْلَمُونَ عَظِیمٌ(76)

və ehanə bızıniyon ım qıləy dıjdə ğəssəme.

إِنَّهُ لَقُرْآنٌ کَرِیمٌ(77)

həyğətən əv Kərimə-Ğırone

فِی کِتَابٍ مَکْنُونٍ(78)

ki,puşniyə bıə(və məhfuzə) qıləy kitobədə vırəş heste.

لَا یَمَسُّهُ إِلَّا الْمُطَهَّرُونَ(79)

ğərəz(har nev mırdolətiyonku)pok bıə kəson(hiçki) bəçəy (həyğət iyən sırron) dastrəsətişon ni.

تَنْزِیلٌ مِنْ رَبِّ الْعَالَمِینَ(80)

aləmon pərəvrdıqori səmtiku nozil bıə.

أَفَبِهَذَا الْحَدِیثِ أَنْتُمْ مُدْهِنُونَ(81)

çən,aya şımə ın sıxani sıst iyən sıvık qətedon?

وَتَجْعَلُونَ رِزْقَکُمْ أَنَّکُمْ تُکَذِّبُونَ(82)

və ıştə ruzi əy təkzibədə ğərol doydon?.

 

Çandə qıləy bərnomədə de kofir iyən munkiron təvəssuti ğıyoməti ruji təkzibi barədə be,ruşine ki,çəmə çı ğıyoməti rujiku bıə aqahəti,İlahi vəhye ki,de peyğombəron təvəssuti bə bəşəri rosney beydə iyən munkiron çun vəhy iyən nıbuvvəti ğəbul kardedənin,ğıyoməti həm ğəbul nibəkardeyn.

In ayəon de bə astovəon vırə ğəssəm hardey bino beydə.ımruj bo bəşəri vey ruşin bıə ki,çandə həzo milyard astovəon ki,osomonədə mevcude,çəvon har qıləyni vırə və rutbə fəzoədə mıəyyəne.ım astovəon ıştə məxsusə mədor iyən orbitədə sınov hardedən,hərəkət kardedən və çəvon har qıləyni ro iyən orbit və hətto çəvon surət həm vey dəğiğ iyən bə hisobi əsose.

Çəy nımunəonku qıləyni Həşi qalaktikə və mənzuməy.bə alimon mıhosibəon əsos,Həşi qalaktikə səyyorə iyən planeton orbiton nizom jıqo dəğiğ və bə hisobi əsose ki,har qıləy mutəfəkkir iyən alimə insoni bə təəccıb vardedə.iyoe ki,əmə çı Ğıroni bə astovəon vırə və hərəkəti roy bıə ğəssəmi dərk kardedəmon və ım ıştən çı Kərimə-Ğıroni ecozonkuye.

In ayəon dəvomədə bə Kərimə-Ğıroni əzəmət iyən bəçəy barzə maarifi işorə kardedə və hamyedə: həmonə Xıdo ki,de əzəməti bıə osmonış ofəyə və çandə milyard astovəonış qıləy mıəyyənə mədor iyən orbitədə ğərolış doə,boşmə insonon hidoyətiro həm Kərimə-Ğıronış enovnəşe.

Im kitob çı bəşəri bə kəmol iyən barzəti rəseyro ehtiyocış bıə maarif iyən həyğəton,çı harcurnə xətoku bə diyəro kərimonə formədə şımə ixtiyorədə noydə və bın cəhətədə pəxıləti həm kardedəni.həlbəttə çın maarifiku bəhrə peqətey şərt,həxəti iyən həyğəti dumo bıey ruhiyyəy.liza əkəson ki,bə inodkorəti iyən çəvon ruf bə mırdoləti dıço bıən,çə həyğətonku dınyo iyən axırətədə bəhrə bardey nibəzıneyn.çın ayəonku omutedəmon:

1-Xıdovənd Ğıronədə bə astovəon vırə və dərəcə ğəssəm hardedə və bə çın mevzu əhəmiyyəti təkid kardedə.

2-ın əzəmətinə hestemoni ofəyəkəs,bo insoni bə ruşd iyən kəmoli səmt hidoyətiro,Ğıroniış nozil kardə.bəle! təkvin iyən təşri de vohidə Xıdo dastiye və həmməkəs çı iqlə mənbəku sərçeşmə peqəteydə.

3-Kərimə Ğıron Kərimə Xıdo kəlome.ım kitob fəğət ləfz iyən iborət ni.bəlkəm çəy mehtəvo barze və bə muminə insoni kəromət iyən izzəti boyis beydə.

4-bə çandə nev mırdolətiyon dıço bıə ruf,bo Ğıroni həyğəton dərk iyən ğəbuliro hınəşon ni və ğərəz pokon cokəson Ğıroni hidoyətiku bəhrə nibəbardeyn.

5-bə Ğıroni barzə maarifon be etino kardey və əy hırd iyən beəhəmiyyət hisob kardey,insoni bə ğıyoməti ruji təkzib iyən inkorəkəyon səmt bışıkırne.

 

فَلَوْلَا إِذَا بَلَغَتِ الْحُلْقُومَ(83)

Çən,boçi bə zəmon ki,(con)bə xılxi rəseydə

وَأَنْتُمْ حِینَئِذٍ تَنْظُرُونَ(84)

və şımə həmonə zəmonədə(fəğət)nəzə kardeydon(şımə dastiku hiççi omeydəni)

وَنَحْنُ أَقْرَبُ إِلَیْهِ مِنْکُمْ وَلَکِنْ لَا تُبْصِرُونَ(85)

və əmə şıməku bəy(bə conkənışi) vey nezimon,əmmo(şımə) vindedəniyon.

فَلَوْلَا إِنْ کُنْتُمْ غَیْرَ مَدِینِینَ(86)

çən,ehanə şımə(ıştə əməlon mığobilədə)cəzo doey nibəbiyon.

تَرْجِعُونَهَا إِنْ کُنْتُمْ صَادِقِینَ(87)

çıro həmonə(conkənıjəkə)coni oqordıneydəniyon,ehanə rost votedon?

 

In ayəon ijən bə ğıyoməti ruji mevzu oqardedə və bə maqi ləzəon işorə kardedə.joqo ki,hamyedə:şımə insonon maq iyən jimon de Xıdovəndi dastiye və şımə maqi omə rəsə zəmonədə hiçkəsi dastiku hiççi nibome.qıləy noxəş ki,bə maqi səmte,hətto mıtəxəssisə doktoron həm əy mıolicə kardeyku ocizin və əvon fəğət bəy təmşo kardedən.

Əkəson ki,Xıdo inkor kardedən və bə bəşəri elm iyən ğudrəti təkyə kardedən,ehanə çəy nezə odəmonku qıləyni conkənışko,aya bəçəy maqi mane bıey və çəy jimoni oqordıney bəzıneyn?.çokonə ım inson hozzı ni iğrolko ki,bəşər çı İlahi ğudrət iyən irodə mığobilədə hiççiye və fəğət İlahi irodə dınyoədə hakime.çın ayəonku omutedəmon:

1-həmonə ğudrət ki,çı insonon coni seydə və ikəs bəy mane bıey zıneydəni,ğıyoməto həm çəvon conon bəvon oqordıney bəbe və hiçkəs bəçəy irodə mane bıey əzıni.

2-maqi zəmonədə Xıdovənd bə insoni bəsə çəy nezə odəmonsə vey neze.əmmo cokəson ım həyğəti dərk kardednin.

 

فَأَمَّا إِنْ کَانَ مِنَ الْمُقَرَّبِینَ(88)

Çən,ehanə əv çı mığərribon(nezonku)bıbu

فَرَوْحٌ وَرَیْحَانٌ وَجَنَّتُ نَعِیمٍ(89)

osoyiş və rifoh və de neməti pur bıə vəhışt boəy bəbe.

وَأَمَّا إِنْ کَانَ مِنْ أَصْحَابِ الْیَمِینِ(90)

və əmmo əgər çı hərəbaxtonku bıbu

فَسَلَامٌ لَکَ مِنْ أَصْحَابِ الْیَمِینِ(91)

(bəy votey bəbe:)baxtəvərə əhli tərəfiku bətı səlom bıbu.

وَأَمَّا إِنْ کَانَ مِنَ الْمُکَذِّبِینَ الضَّالِّینَ(92)

və əmmo ehanə çı ro qimkardə təkzibəkəyonku bıbu.

فَنُزُلٌ مِنْ حَمِیمٍ(93)

de bə cuşomə(qılə)ovi ğəbul kardey bəbe.

وَتَصْلِیَةُ جَحِیمٍ(94)

və(çəy cəzo)bə cəhəndımi varid bıeye.

إِنَّ هَذَا لَهُوَ حَقُّ الْیَقِینِ(95)

həyğətən, ım  (mətləb)həx iyən bə yəğıni əsose.

فَسَبِّحْ بِاسْمِ رَبِّکَ الْعَظِیمِ(96)

çən,deştə buzurquvarə pərvərdıqori nomi təsbih bıvot.

 

Çın surə sıftədə millət bə seqlə dastə təğsım bıən:mığərribon,hərəbaxton iyən ro qim kardə kəson.ın ayəon ki,çın surə oxonə baxşe,ijən sənibəton bə ın seqlə qrupi işorə kardedə və hamyedə:hejo çı maq iyən bə bərzəxi aləmi varid bıə zəmonədə çın seqlə dastə şərayit tafutine və de tobə ğıyoməti ruji bərpo bey ım ko dəvom pəydu bəkarde.

Mığərribon ki,imon iyən salehə əmələdə navədə şıə kəsonin,çı dınyo saxtətiyonku rohət bıən iyən çı rifoh osoyiş iyən neməton dılədən.hərəbaxton həm de pok iyən baxtəvərə əhli vositə ğəbul beydən və deəvon bə icon.əmmo ğıyoməti ruji inkorəkəyon ki,ıştə zəlolət iyən inhirofədə ğərğin,hejo çı maq iyən bə bərzəxi aləmi varid bıə zəmonədə çı əzobi dılədə bəbeyn ta bə ğıyoməti bırəson və bə cəhəndımi daxil bıbon.

Bın surədə omə ğıyoməti ruji həxədə bıə çiyon,həmmə həx iyən bə yəğıni əsose və imoni əhli bəy bovəşon heste.əvon Xıdo bəştə bandəon çı harcurnə zılm iyən sıtəmi pok iyən mınəzzəh zıneydən və dayima əy təsbih kardedən.çın ayəonku omutedəmon:

1-umum millət çı maqiku tarseydən və əy saxt iyən dardnok hisob kardedən.əmmo ım bo bə İlahi dərqo nez bıə kəson bə çandə dıjdə neməton rəseyro bıə vəsəy.de maqi inson çı dınyo ğussə iyən saxtiyonku ozod beydə və bə osoyiş iyən rohəti rəseydə.İlahi lutfon bəçəvon holi şomil beydə və əvon bə qıləy əbədiyə hərəbaxtəti rəseydən.

2-hejo çı maqi zəmoniku çı çok iyən bədə odəmon cəzo iyən səvob bino beydə və tosə ğıyoməti ruji dəvomış heste.