Həzrəte Məsumə(s),Məhəbbət iyən Mərıfəti Banu
Həzrəte Məsumə(s),Məhəbbət iyən Mərıfəti Banu
Həzrəte Məsumə(s),Məhəbbət iyən Mərıfəti Banu
Əhli-Beyt(ə) xoşə ətri bostoniku qıləy vıl,Ğomi mığəddəsə şəhrədə qıləy nuroniyə hərəmış heste ki,çəy nom həm Fatimə-Məsuməy(ə).əv nə qıləy jene,bəlkəm həşi bılındi qıləy ğulləy ki,Ğomi şəhriku boştə zayiron rulu kardedə,pemedə.çə həzrəti pokə hərəm çı firiştəon covlan kardə vırəy və çı oqonə şəxson dılon orom bıə məkone.həzrəte Məsumə(ə) hərəmi har qıləy vırədə bıə dılon de osmoni səmt qıləy anqıl heste və bə dıvo iyən nımoji ğərğ bıə.jıqo bızın həzrəte Məsumə(ə) qədə hərəm,vəhıştiku qıləy bəy ki,de bə vırə daxil bıey,ğəmon çı dılonku bardedə və zayir bə məhəbbət iyən mənəviyyati ğərğ beydə.
İmom Kazımİ(ə) kinə və İmom Rıza(ə) xosə hovə Həzrəte Fatimə-Məsumə(ə) ğıyoməti ruji şəfoət doə xanıme və boçəy pokə ğəbi ziyorətiro ziyodə səvobon zikr kardey bıə.əmə həm çın Kərimə Banu bəfoti ruji ıştə dılon bə həzrəti zayiron anqıl jeydəmon və ıştə irodət və məhəbbəti ərz və ibroz kardedəmon:”Səlom bıbu bə Xıdo Vəliyyi kinə.səlom bıbu bə Xıdo vəliiy hovə.səlom bıbu bətı ha çı Xıdo vəliyy bibi.Xıdo səlom,rəhmət və bərəkət bıbu bətı ha çı Mosə ibn Cəfəri kinə!.səlom bıbu bətı.Xıdovənd əmə iyən şıməni vəhıştədə bə iyande məlumko və əməni deşmə bə ico məhşurko”......
Qırd fəziləton,çokətiyon,sıfət iyən xısləton ki,bə qıləy odəmi ziynət baxş kardedə və qırd ımoni çı həzrəte Məsumə İmomon (ə) siyrə və rəftornədə və çə pokə xıyzoni dılədə tərbiyə vində kəson əməlonədə hiss və mışohidə kardey bəbe.Xıdovəndi bandəçəti iyən çı riyaku bə diyəro bıə xolisonə ibodəton,ıştə molonku bə fəğır-fuğəra baxşeş və səxovətməndəti,məxfiyonə və çı cokəson dığğəti cəlb nıkardə baxşeşon,eım cəm kardey,elm omutey və alimə şoqirdon perosney,bə har təbəğə və hissədə bıə milləti sıvolon cəvob doey,çı təkəbbır iyən məğrurətiku bə diyəro mandey və buzurquvar bıə holədə təvazukorəti və sodə jimon kardey və çandə həzo qılə bə xoş omə xısusiyyəton ki,çəmə dini yolə şəxsiyyəton və İmomon(ə) siyrədə mevcud bıə ki,qırd bımonədə qıləy dərs və ibrəton heste.bə Əhli-Beyt(ə) xanedani siyrə və roftoron murur və qıləy nəzə kardeyədə,çəvon bo həmmə zəmonədə bıə insonon qıləy ulqu və nımunə bıey məlum beydə.
Həzrəte Məsumə(ə) ım şərofətinə banu ıştə kırtə umrədə bənə ıştə pokə əjdodi məxsusən bənə Fatimeyi-Zəhro(s) çı bandəçəti dərs,elm omutey,həyo iyən mətonət,səhnədə bəey və çı botıli mığobilədə həxı mıdofiyə kardeyış,əyani surətədə nışonış doe.......
Həzrəte Fatimə-Məsumə(ə) Hicri-Ğəməri 173-ə sori bə dınyo çəşış oj karde.ım mutəhhər və pokə banu,qıləy pokə inə dovnədə və ıştə əzizə pı həzrəte İmom Kazımi(ə) və peşo ıştə erjinə bıvə İmom Rıza(ə) tərbiyə jiyədə yol be və elm iyən dinış çı əsliyə sərçeşməku ğəbulış karde.ə həzrət ıştə hırdənətiku bə dini elmon iyən həyği mərıfəti dumo bıə kəson dini nığılə sıvolon cəvob doydə.jqoo ki,çın pokə banu buzurquvarə pı çəy səhihə cəvobon məseyədə,de iştiyoği hamyeşe:”Fidaha Əbuha” yəni çəy pı bəy fido bıbu.......
Həzrəte Məsumə(ə) bəştə xıyzoni uzvon məxsusən bəştə əzizə pı İmom Rıza(ə) ziyodə məhəbbətış hestebe.İsməti Xanedani miyono qıləy nığılə rabitə və məhəbbət hestebe və de vey çokə formə ıştəni nışon doydəbe.Kərimə-Ğıroni təlimonədə və Rəsuli-Əkrəmi(s) iyən çə həzrəti pokə xıyzon bıə Əhli-Beyt(ə) ibrətamizə sıxanonədə sileyi-rəhm və bəştə nezə odəmon çokəti kardey,vey dəğğəti mərkəzədə bıə.joqo ki,ikəs ki,deştə xıyzoni ıştə rabitəon bıbırno məxsusən deştə pı-mo rabitə ğətko,bə Xıdovəndi ğəzəbi dıço bəbe və çəy rəhmətiku bə diyəro bəmande.Kərimə-Ğıron çandə qılə ayəonədə hamyedə:”və`budu.....Xıdovəndi pərəstışkənən və hiççi boəy şərik ğərol mədənən və bəştə pı-mo çokikənən”.(Nisa-36).coqlə vırədə hamyedə:”...vəttəğu....çə Xıdoku bıtarsənən ki,deçəy nomi iyandeyku tələb kardedon və sileyi-rəhmi barədə səhlənkorəti məkənən.həyğətən,Xıdovənd şıməku mığəte”.(Nisa-1).
Bə Rəsuli-Əkrəmi(s) bəştə əzizə kinə həzrəte Zəhro(s) iyən həzrəte Əli(ə) və bəştə əzizə nəvəon İmom Həsən(ə) iyən İmom Huseyni(ə) bıə eşğ və məhəbbət və həzrəte Zəhro(s) deştə jimoni həmro İmom Əli(ə) iyən deştə fərzəndon miyono nığılə eşğ və rabitə,həzrəte Zeynəb(ə) bəştə bıvon məxsusən bə İmom Hsueyni(ə) bıə məhəbbət,torıxədə çı qıləy xıyzoni mehr,məhəbbət və eşği reçinə cilvəon bə nımoyiş noydə.
