Bə Həzrəte Fatimə(s) vilodəti məxsusə bərnomə
Bə Həzrəte Fatimə(s) vilodəti məxsusə bərnomə
Mehribonon səlom, şımə ruj bə xəyr bıbu, əzizə duston ımruj Cəmadiussaniyə manqi 20 , və de dınyo yolə inə , Həzrəte Fateməye Zəhra(s) milad ruji sorəqardışi bərobəre, ımruj təğvimədə inə ruj, həmçınin jenon ruj ğeyd bıə, ım mınosibəton bə şımə əzizon təbrik ərz kardəm, və urzo kardəm Xıdo Rəsul (S)-i qıramiyə kinə Həzrəte Seddiğəye Taherə(s) lutf və inoyət şımə ruji bıbu.
Bə həminə mıborəkə mınosibəti xoto, ım bərnomə bə Həzrəte Fateməye Zəhra(s) ixtisos doəmon, ta bə ım muvəffəğə inə tərbiyə metod və çəy inə bey roli işorə kəmon.
Şıməni dəvət kardəm de Tolışi rədio bə ico bımandən və bə ım bərnomə diğğət bıkənən.
Xosə həmzıvonon, Həzrəte Fateməye Zəhra(s) bə dınyo omey bənav, Cebreil Xıdo Rəsul(s) nəzdədə omə və ərz kardeşe: ey Muhəmməd, Xıdovənde Xalığ bə tı səlom rosniyəşe və əmr kardəşe ki çıl ruj Xədicəku diyəro bımendi, peşo peyğəmbər çıl ruj Xədicəku diyəro mandeşe və rujon rujə qətşe və şəvon bə xıdo ibodət kardey məşğul be. Çıl ruji bəpeşt, Cebreil nozil bıə və ərz kardəşe: Xıdo bə tı səlom rosniyəşe iyən hamiyəşe: bo çıme kəromət və mokafat hozzo bıbu, peşo Mikail beheşti mivəonku vardəşe və Xıdo Rəsul(s), çəvonku hardəşe və bə Xədicə tərəf şə, və həmonə şəvədə İslami peyğəmbəri kinə notfə dəbastə bıə.
Vaxti Xədicə de Xıdo Rəsul(s) vəyə kardəş be, Ğorəyş jenon çəyku diyəro bin, və vaxti Xədicə Həzrəte Fateməye Zəhra(s) hamilə bıə, fəğət Fatemə(s) deştə moə sıxən əvoti və dəy həmdardi əki. Xədicə (s) ım mətləbi bə hiç kəs votəş nıbe, ta ım ki i ruji Xıdo Rəsul(s), həzrəte Xədicə(s) vindeşe ki deştə sıxən voteydə, Xıdo Rəsul(s) ım koy barədə Xədicəku soval kardəşe, Xədicə(s) votışe: ım dol de mı sıxən votedə və çıme coyliyə ləzzəon vey munis bıə.
Xıdo Rəsul(s) hamiyəşe: ey Xədicə Cebreil bə mı mojdə doşe ki ım dol kinəy, və əv pok iyən mıborəkə nəslunku bəbe, və Aliyə Xıdo çıme nəsli de ım doli vositə dəvom bədoy və Məsumə İmomon(ə) ım yolə kinə nəsliku bəben ki çıme nəbovvəti bəpeşt, çıme roy idomə bədon.
Həzrəte Xədicə(s) ıştə hırdəni bə dınyo ome zəmonədə, vey coyli be və hiç qılə çı Ğorəyşi jenonku bəy komək nıkardeşone, qıləy holədə ki Xıdo beheştiku, 4 qılə jenon bə ım imoninə xanımi tərəfi vığandəş be. Həzrəte İbrahim(ə)-i həyot həmro Sarə, Feroni həyot həmro Asiyə, İmrani kinə Məryəm, Musəbne İmrani kinə Kulsun bə xıdo əmri, Həzrəte Xədicə(s) nezd omin və nəhayətədə Həzrəte Fateməye Zəhra(s) bə dınyo omə, çəy nom vey ğəşənqinə nom be ki xıdo bə peyğəmbəri kinə vıjniyəş be.
Əhle Beyte İsmət və Təharət(ə)-i jimon, bo əvon ki pidəşone bə dınyo və Axırəti vey səadətinə jimoni bırəson, vey ruşənə hidoyəte. Jəqo ki Came Kəbirə Ziyorətnomədə həm ki çəyədə bə həmmə Əemeye Əthor(ə)-i durud vığandıdəmon, qıləy baxş heste ki bandəon xuşbəxtiyəti və bədbəxtiyəti, Əeme Əthar(ə)-iku itoət ya itoət nıkarde, elan kardəşe və hamiyəşe:
«مَن أتاکُم نَجی وَ مَن لَمْ یَاْتِکُمْ هَلَک»
(Har kəs bə şımə nəzdədə omə nicot pəydo bəkay iyən har kəs nıomə həlok bəbe)
Həmçınin Aşura ziyorətnomədə ki Şiəyon əy bənə Ğudsi Hədisonku bə hisob vardedən, Xıdoku pidəmone ki çəmə jimon və mardey roy de Əhle Beyt(ə)-i jimoni metod mıntəbiğ ko, iyən handeydəmon:
«اللهُمَّ اجْعَلْ مَحْیایَ مَحْیا مُحَمَّد وَآلِ مُحَمَّد، وَمَماتی مَماتَ مُحَمَّد وَآل مُحَمَّد»
Səmimi duston, imrujnə ictimaiyətədə, ki ğərb sərmoyədorə nizom deştə mədəni həmlə kardey vositə, səyo cəhdışe ki bo mısılmonə jenon və kinəonro ğəyre insoni və mıbtəzələ ulqu bıbu, həğiğətən Həzrəte Fateməye Zəhra(s) muxtəlifə şəxsiyəti jimon karde bəzne bo həmmə mısılmonon nımunə ulqu bıbu.
Be şək ə yolə Xanımi (s) ictimai və şəxsi jimon bo həmmə kəson ibrətomize. Qıləy holədə ki ailədə həzrəte fatiməye Zəhra(s) rol, bənə həyot həmro və inə vey təsirin be.
Əzizon ım baxşədə bə ə Həzrət(s) moə bey roli işorə bəkamon.
Jəqo ki moə bey rol bənə (Rububiyyət)e və Xıdo həm (Rbbe), moə bey rol həm Xıdo roliku qıləy nur və ruşinəy. İnə mehribon və şəfəğğətinə dıl, Xıdo rəhmət və mehriboni təcəlliye. Bə nəzər omeydə ki aliyə Xıdo, ıştə eşğ və məhəbətə dıyoku, inə dılədə ğəror doəşe.
Kərimə Qıronədə, Bəğərə surə 223 minnə ayədə jeniku bənə insoniyəti kaştemoni zəmin yod kardə bıə, Xıdo hamiyəşe:
«نِسَاؤُکُمْ حَرْثٌ لَکُمْ فَأْتُوا حَرْثَکُمْ أَنَّى شِئْتُمْ »
(ey muminon) şımə jenon şımə kaştoronin. Havaxt iyən harcoku bıpine bəştə kaştor(boənən)varid bıbənən.
Bə həminə illəti xoto inə luz bo nəslonro prosniyə vırə heste, və inə luzədə hırdən ıştə inə, dədə və cəddon həmmə xusiyəton bəqəte. jəqo ki donə sərnıvıştədə ov, nur, xok, qaməti iyən ofoton təsirış heste.
Moə məğom çunki ki inson soxtey vırəy, muhimmə məğom bə hisob omeydə. Həmçınin bə çəy xoto ki moon vey zəmonon kədə mandən, bəştə hırdənon vey nez hestin, Həzrəte Fateməye Zəhra(s) hırdən prosniyeədə vey nımunə be, və həğiğətədə ıştə məsuliyəti yəni moə bey çok surəti əncom dodə be, və hırdənoni bənə İmom Həsən(ə), İmom Husein(ə), Həzrəte Zeynəb(s) iyən Umme Kulsum(s) bə ictimaiyət təğdim kardəş be, ki har qılə çəvonku aqah, şuca, mumin, cəhadəkə iyən insoni vey aliyə erjon soyb bıə məşhurə insononku nımunə bə hisob omeydə bin.
Əzizə əməson, İslami qıramiyə peyğəmbər(s)-i kinə ıştə hırdənon hətto bə şəvədə oğo mandey adət ədi. ə Həzrət(s) prosniye metodi vey çok əzıni və jəqo rəftor əki ki çəy hırdənon zu və ğabliyətədə bıbu. Məsələn Həzrəte Fateməye Zəhra(s) Rəməzan mıborəkə manqi 23 minnə şəvədə ıştə hırdənon bə oğo mande və nıhıte təşviğ əki və rujədə bəvon kamə xorək ədi iyən bəvon əvoti ki rujədə bıhıtən ta ım mıborəkə şəviku istifodə bə şımə ğısmət bıbu iyən hamiyəşe:
"məhrume har kəs ki ğədrə şəvi bərəkətonku məhrum bımando"
Həzrəte seddiğəye Taherə(s) ıştə hırdənon prosniye hissədə jəqo rəftor əki ki çəy hırdənon əlovə bə komil bey tərəf hərəkət karde iyən komil tələbəti , de yandı vey mehribon və şəfəğğətin bıbun iyən ailədə bə yandı ehtırom bınən. çumçiku be ki İmom Huseyn(ə) bə İmom Həsən(ə) vey məxsusə ehtırom nodə be və çəy nəzdədə sıhbət nıəki və bəştə hovəon vey şiddətinə meylış be və bə ehtıromi xoto, de ım vucud ki İmom Husyn(ə)-iku qədə be, vırəku rost əbi, de həminə surət Həzrəte Zeynəb(s) həm mıtəğobilə ehtırom bəştə bıvəonro nodə be.
Həzrəte Fateməye Zəhra(s) ıştə hırdənon çəşon vədə bə millət komək əki, ə Həzrət ıştə qərdənbəndi bə ehtiyocinə şəxson adi. Iştən vəşi mande əmmo bə co kəson xorək ədi. Ə Həzrət hətto ıştə dıvoonədə həm Əvvəl bo co kəsonro dıvo əki, jəqo ki i ruj İmom həsən(ə) ıştə inə vindəşe ki tosə sıb dıvo əki, və co kəson və mumininro vey kərə dıvo əki, vaxti çəy illəti soval kardıme, hamiyəşe: "əvvəl hamsuyə, peşo əmə"
İslami yolə xanımi tərbiyəvi iyən prosniye metod, bois bıə ta hırdənoni mıvəffəğ, təsirin, muşkilaton vədə stabil, imonsoyb, mubarizəkə iyən ictimaiyətədə vey həmkarəkə şəxs prosniyə bıbun.
Im ki Həzrəte Fateməye Zəhra(s), dınyoədə bə "سیده النساء العالمین" məşhure, çəy yolə məğom və vırə iyən vey fəzilətonku hikoyət kardedə.
Əzizə duston urzo kardəm Ə Həzrət(s) lotf və inoyət bə şımə ğesmət bıbu,
