İslami peyğəmbər(s) meraci xususiyə bərnamə
İslami peyğəmbər(s) meraci xususiyə bərnamə
İslami peyğəmbər(s) meraci xususiyə bərnamə
Xosə əməson iyən əzizə rujə əqəton səlom, şımə ruj bə xəyr bıbu, umidımon heste ilahi dərqohədə, şımə taat iyən ibodəton ğəbul bıbun və ım manqi erjinə ləzzəon şıməro de xəy, bərəkət bə ico bıbu, əzizon bə kali rəyoyəton əsos, mıborəkə Rəməzonə manqi 17 minnə ruj, Xıdo Rəsul(s)-i Meraci səfəri sorəqardışe. Im bərnomədə həminə barədə sıhbət bəkamon, umidımon heste ki əmə həm Peyğəmbəri ım ruhani və erjinə səfəri jintonədə, bə Xıdovənde xalığ iyən ilahiyə kəmol səmti qəm peqətəmon, lutfən dəmə bə ico bımandən.
Xosə Tolışon, islami sədrədə peyğəmbəriro heyrətomizə hadisəonku qıləyni, Meraci səfər be. Merac, Xıdo Rəsul(s)-i vey yolə mucizəonku qıləyni bə hisob omeydə. Və bəşəri əğl çəy dərkiku ucize. Həğiğətədə Merac, modiyə çiyonku xarıc bey və bə barzə osmonon ğədəm noey mənodəy. Im ilahi mucizə Nəbi(s)-i xalisə ibodəti sayədə icod bıə və vey ayəon iyən rəvoyəton çəyku de əzəmət iyən yoli yod kardışone. Həğiğətədə Merac, zəminiku bə osmon və ərş səmti şey, çı Xıdo Rəsul(s)-i səfər be.
Həzrəte Muhəmməd(s) ım əzəmətin və mislış nıbıə səfəri Umme Hani kə ya Məscedulhəramiku bino kardeşe, peşo bə Beytul Muğəddəs səmti şə. Çəy bəpeşt Məsceduləğsaku bə Həzrəte Məsih moəku bıə vırə, Beytulləhm şə və peyğəmbəron kəon vindışe. Peyğəmbər ıştə səfəri 2 minnə mərhələ, bə 7 qılə (təbəğə) osmononi səmti hərəkət kardeşe, və nəhayətədə 7 minnə osmonədə, bə “sedrətulmontəha” və “cənnətol məeva” yəni ilahi beheşt rəsə, və həmonə vırədə, pərvərdeqari əzəmətinə əsəron dərk kardışe. Həzrəte Muhəmməd(s) həmonə ruşin və nuraniyə vırədə, bə zoti şuhud mərhələ iyən bə Xıdo rəsə. Xıdovənde xalığ, Peyğəmbəri ım səfərədə, vey muhimmə sıforışon və əmron bəştə Peyğəmbəri doşe.
Meraci şəvi macəra, zəminiku bə osmon, və ıştəniku bə Xıdo səmti səfər bə hisob omeydə. Xıdo həminə hadisə təsdiğ kardəşe və Əsra surə iminnə ayədə hamiyəşe:
“Iştə nışonəon nışon doeyro bəşəvnəy ıştə bandə çı Məscidul-Həramiku, tosə bəçəy ətrofi bərəkətımon doə Məscidul-Əğsa bardə ə(Xıdo), pok iyən mınəzzəhe. Əv əməs iyən vindedə.”
Həmçınin Ğıroni yolə təfsirəkə, Əllame Təbatəbai, həminə ayə təfsiri barədə hamiyəşe: “sıtoyeş bə Xıdovənde Xalıği məxsuse ki deştə əzəmət və yoləti vositə və şəvi zəmonədə ıştə bandə yəni Həzrəte Muhəmməd(s)-i bə Meroc bardeşe və ıştə hakımiyət iyən zumandəti bəy nışoş do. Peşo şəvi dılədə,əy Məscidul Həramiku bə Məsciduləğsa səmti, bardışe və çəy ətrofi mıborək kardışe. Im şəvdə Meroc bə ım xoto be ki ıştə nışonəon və əzəməti bəy nışo bədoy. Buçiki əv bəştə peyğəmbəri əhvoli, əməs, diyə əkə və aqah be və zıneydə be ki peyğəmbər bə həminə hukumət və inoyəti loyiğe.”
Xıdo Rəsul(s), Merocədə Xıdovənde Xalıği sıxənon ki be vositə bə çəy mıborəkə dıl vəhy bıdə be, bo həmmə insonon bəyon kardəşe. Im hədis, Xıdo Rəsul(s)-i soal-cəvobonku qıləy məcmuə bə hisob omeydə. Meroci hədisi iminnə baxşədə peyğəmbər votışe: “ ey Xıdo, vey çokə əməl çiçe? Cəvob omə: “çıme nəzədə hiç çi bə mın təvvəkkul kardey və bə həmonə çi ki ğısmət kardəme rozi beyku vey çok ni.” Im kırtə cəvob, bo həmmə maneon oj kardey yolə kilid bə hisob omeydə. Həmonə maneon ki bəşəriyəti aliyə roon dəbastə və əy de vey muşkilaton dim bə dim kardəşe. Təvəkkul yəni bə yolə Xıdo etemo və yəğin kardey, həmonə himoyə əkə ki odəmi con iyən pisixi rohətəkə bə hisob omeydə.
Im erjinə hədisi co baxşədə, Xıdovənd bəştə Peyğəmbər hamiyəş: “ey Əhməd, ibodət 10 baxşış heste, çəy 9 baxş həlolə ruzi dumoədə hərəkət kardeye. Peşo əqə ıştə hardemoni və peşomey həllolə royku hozzo bıkoş, çıme oqəte və himoyə bə tı şomil bəbe” peyğəmbər(s) soal kardeşe: “ ey Xıdo, vey çok iyən iminnə ibodət çiç heste? Hamiyəşe: “iminnə ibodət, rujə və sukut heste.”
Xıdovənde xalıği həminə sıxən nışo doyədə ki Xıdo dərqohədə bandə beyədə, sukut kardey və rujə qətey, iminnə ğədəm heste. Xıdo dərqohədə bandə bey, insoni komil iyən ibodəti royədə, ım 2 qılə xusiyət, iminnə qəmon bə hisob omeydən. Tosə zəmoni ki insoni zıvon ozode, və harcurvə botelə sıxənon voteyədə tarsış ni, itoəti royədə ğəror qətəş ni və nəticədə bə hədəf və məğsəd nibərəse.
Peşo peyğəmbər ərz kardeşe: pərvərdıqara, rujə qətey təsiri çiç heste? Hamiyəşe: “ rujə hikməti peydo bey və hikmət zıney iyən zıney yəğini bois bəbe. Peşo har zəmon ki bandə bə yəğin rəsə, jimoni saxti iyən hostoni bəyro muhimm ni”.
Meraci heyrətomizə hodisə, Peyğəmbəri mislış nıbıə və yolə şəxsiyəti əzəməti nışonəy, həğiğətədə, Meraci cərəyoniku jəqo diyə bəbe ki insoni zərfiyət vey barze. Peğəmbəroni bənə İbrahim həm bə osmon və zəmini mələkoti diyə kardışone əmmo Xıdo Rəsul(s) jəqo bə Xıdo nez bey məğomədə nəvəjən be ki Xıdo Nəcmi surə 9 minnə ayədə hamiyəşe:
“ anədə ki çəy fasilə bə 2 qılə kəmoni miğdor və ya çəyku həm vey kam be”
Mehribonon bə ım bərnomə quş doe xoto şıməku təşəkkur kardedəm. Dəvət kardəm bə co bərnoməon quş bıdənən ki koy həmron bə şımə xıdmət təğdim bəkan.
