Қолибоф: АҚШ ваъдабузарлиги билан минтақада барқарорликка тўсқинлик қилди
Эрон Исломий Кенгаши Мажлиси раиси Покистон армияси қўмондони билан учрашувда шундай деди: «Биз ўзаро англашув меморандуми шартларининг бажарилишини қатъий кузатиб бормоқдамиз ва айнан Америка ушбу келишув асосида ўз мажбуриятларига содиқ қолиши керак».
Порс Тудейнинг Меҳр ахборот агентлигига таяниб хабар беришича, Покистон армияси қўмондони фельдмаршал Осим Мунир душанба куни кечқурун Эрон Исломий Кенгаши Мажлиси раиси Муҳаммадбоқир Қолибоф билан учрашиб, музокара ўтказди.
Покистоннинг минтақада тинчлик ва хавфсизликни мустаҳкамлашга кўмаклашиш мақсадидаги саъй-ҳаракатлари давомида бўлиб ўтган ушбу учрашувда Қолибоф Америка томонидан Исломобод меморандумини амалга оширишда содир этилган бир қатор ваъдабузарликларни эслатиб, шундай деди: «Меморандумда томонларнинг мажбуриятлари аниқ белгиланган. Айнан Америка ўз ваъдаларини бузиб, минтақада барқарорлик ўрнатилишига тўсқинлик қилди ва бу мамлакатга нисбатан ишончсизлик учун яна бир сабаб яратди».
Эрон музокаралар ҳайъати раҳбари Ислом Республикасининг ташқи босимлар таъсирига тушишини рад этар экан, таъкидлади: «Биз меморандум шартларининг бажарилишини қатъий кузатиб бормоқдамиз ва айнан Америка ушбу келишув асосида ўз мажбуриятларига содиқ қолиши керак».
Осим Мунир ҳам ушбу учрашувда минтақада барқарорликни тиклаш йўлидаги саъй-ҳаракатларини давом эттиришини билдирди.
Генерал Ризоий: Америкага ишонмаймиз, у ўз хулқ-атворини ўзгартириши керак
Эрон Миллий олий хавфсизлик кенгаши котиби генерал Муҳсин Ризоий ҳам Покистон армияси қўмондони билан учрашувда шундай деди: «Биз Америкага ишонмаймиз. Америка ўз хулқ-атворини ўзгартириши ва меморандум шартларини бажариш борасида амалий қадамлар ташлаши керак».
Покистон армияси қўмондони Осим Мунир ҳам Исломобод меморандумини имзолаш учун Покистон томонидан кўплаб саъй-ҳаракатлар амалга оширилганини қайд этиб, Эрон ва Покистон ўртасидаги биродарлик ва дўстликни таъкидлади ва шундай деди: «Покистон икки мамлакат чегаралари ўртасида хавфсизликни таъминлаш борасида ҳам катта саъй-ҳаракатларни амалга оширди».
