Журналист Бобомурод Абдуллаев бедарак йўқолди

Тошкентда журналист Бобомурод Абдуллаев бедарак йўқолган. Турмуш ўртоғининг Би-би-си Ўзбек хизматига маълум қилишича, журналист чоршанба куни тушдан сўнг уйидан чиқиб кетганича қайтиб келмаган.

 "Тушдан сўнг машинани устадан оламан деб чиқиб кетган эди. Шундан сўнг қўнғироқларимга ҳам, мактубларимга ҳам жавоб бермади", дейди журналистнинг турмуш ўртоғи.

Бобомурод Абдулла Ўзбекистонда футбол журналисти сифатида танилган. Футбол федерацияси ва терма жамоа мураббийларини кескин танқидлари билан ажралиб турган.

Унинг танқидий мақолалари Ўзбекистондаги футболга асосланган веб саҳифаларда чоп қилинган.

У бир вақтлар "Озод овоз" мустақил веб сайтига асос солган. Британиянинг уруш ва тинчликни ёритиш институти (IWPR)нинг Тошкентда мухбири бўлиб ишлаган.

"Марказий Осиёда инсон ҳуқуқлари" уюшмаси раҳбари Надежда Атаеванинг маълум қилишича, журналист сўнгги вақтларда уни кимдир кузатиб юрганини сезган.

Human rights watch ташкилотининг Европа ва Марказий Осиё бўйича ижрочи директори Ҳю Уиллиамс Ўзбекистонда журналистнинг йўқолиб қолиши хавотирли эканлигини билдирди.

"Мустақил журналист Бобомурод Абдуллаевнинг икки кун аввал бедарак кетганидан ҳам жиддий хавотирдамиз. Бедарак кетишлар халқаро инсон ҳақлари ҳақидаги барча битимларга зиддир. Расмийлар унинг қаердалигини аниқлаб, яқинларига, оила аъзоларига зудлик билан хабар беришлари даркор. Агар унга қарши жидий айбловлар бўлса, буни жамоатчиликка ошкор қилишлари ва ҳибсга олинишини асослаб беришлари лозим. Унга қарши айблар маҳкамада кўрилиши керак. Бу каби бедарак кетишларнинг бугунги Ўзбекистонда содир бўлаётгани бизни жуда ҳам қаттиқ ташвишга солаяпти", дейди у.