Исроил Мадримов рақибини ҳушидан кетказди, Рохасни рингдан замбилда олиб чиқишди (видео)
Исроил Мадримов рақибини ҳушидан кетказди, Рохасни рингдан замбилда олиб чиқишди
Профессионал бокснинг супер ярим ўрта (-69,85 кг) вазн тоифасида рингга чиқаётган Исроил Мадримов (2-0, 2 КО) ўзининг иккинчи жангида ҳам муддатидан олдин ғалаба қозонди.
У Нью-Йоркдаги Верона шаҳарчасида жойлашган Turning Stone Resort & Casino аренасида рингга кўтарилиб, чемпионлик камарини ҳимоя қилди.
Венесуэлалик Френк Рохасга (24-3, 23 КО) қарши 10 раундга мўлжалланган жангда Исроил Мадримов иккинчи раунддаёқ ғалабага эришди. Дастлаб рақибининг жигар ва бош қисмига кучли зарбалар йўллаган Исроил Мадримов Рохасни нокдаун ҳолатига туширди. Рохас биринчи вазиятда ўрнидан туришга муваффақ бўлди, аммо Мадримовнинг кетма-кет зарбаларидан сўнг яна ерга қулади. Бу сафар раунднинг 1:56 сонияси ўтиб бораётганда Исроилнинг чап қўлдаги кросс зарбасидан сўнг рақиб чуқур нокаут ҳолатига тушиб қолганди.
Ушбу ғалаба эвазига Мадримов ўзининг WBA InterContinental чемпионлик камарини яна бир маротаба ҳимоя қилди. Биринчи жангида у мексикалик Владимир Эрнандесни (10-3, 6 КО) 6 раундда техник нокаут эвазига мағлубиятга учратиб ушбу камар соҳибига айланганди.
Кетма-кет иккинчи ғалаба эвазига у WBA йўналишида ўз рейтинг поғонасини ҳам сезиларли равишда яхшилаб олади.
