БАА-дан олиб келинган 251 нафар фуқаро карантин муддатини тугатиб, уйларига қайтди
«Ўзбекгидроэнерго» ахборот хизматига кўра, 2020 йилнинг 17 март куни Бирлашган Араб Амирликларининг Шаржа шаҳридан олиб келинган 251 нафар фуқаро Тошкент вилоятининг Қибрай туманида жойлашган «Ўзбекгидроэнерго» АЖга қарашли «Энергетиклар» сиҳатгоҳида карантинга олинган эди. Улар карантин муддатини тугатиб, ўз уйларига қайтди.
Хабар берилишича, дастлаб 19 март куни мазкур фуқаролардан коронавирусга чалинган ёки чалинмаганлигини аниқлаш мақсадида таҳлил олинган. Таҳлиллар жавобига кўра, чартер рейс орқали олиб келинган фуқароларда коронавирус касаллигига оид ҳеч қандай белгилар аниқланмаган.
Карантин якунида олинган охирги таҳлиллар натижаси ижобий бўлганлиги сабабли фуқароларга уйга кетишга рухсат берилган.
Аввалроқ БААдан олиб келинган ҳамда «Энергетиклар» сиҳатгоҳида сақланаётган 7 киши карантин қоидаларини бузгани учун 15 суткага қамалгани ҳақида хабар берилган эди.
Эслатиб ўтамиз, Нманган, Навоий, Самарқанд ва Бухорода карантин муддатини ўтаб бўлган фуқаролар ўз уйларига қайтгани ҳақида хабар берилган эди.
