Самарқандда карантиндан қочишга уринган фуқаро марказий ҳарбий округ бўлинмаси томонидан қўлга олинди(фотожамланма)
Ҳарбий журналист Ғайрат Мадраҳимовга кўра, марказий ҳарбий округ қўмондони буйруғига асосан, 12 апрель, якшанба куни, карантиндан қочишга урунган фуқарони ушлаб қолган ҳарбий хизматчига III даражадаги сержант унвони ҳамда қимматбаҳо совға топширилди.
Самарқанд вилояти Саломатликни тиклаш шифохонасида 7 апрель куни 129 нафар фуқаро карантинга олиниб, патруллик қўриқловига округ бўлинмаси жалб қилинган эди. 11 апрель куни соат 20:30 да Самарқанд шаҳри «Чўпонота» маҳалласида яшовчи, хориждан келган ва карантинга олинган 1978 йилда туғилган фуқаро Ж.К. шифохонанинг орқа томонидан қочишга уринган. Тақиқланган ҳудудни кесиб ўтган тартиббузар белгиланган йўналишда хизмат олиб бораётган шартнома асосидаги ҳарбий хизматчи Шамсиддин Жўраев томонидан тўхтатилган.
Фуқаро уйига бориб келиши, қайтиб келганидан кейин ҳарбий хизматчини рози қилишини айтиб, унга пора таклиф қилган. Натижа бўлмагач, ҳаракатни давом эттириб, девордан ошмоқчи бўлган. Соқчи тартиббузарни яна бир қатъий огоҳлантириб, қўлга олиш чорасини қўллаган. Алоқа воситаси орқали берилган хабарга кўра, қисқа вақт ичида тезкор бўлинма етиб келган.
Бундан ташқари, Жиззах вилояти Ғаллаорол туманидаги карантинга олинган Кексалар ва ногиронлиги бўлган меҳнат ва уруш фахрийлари учун «Маржонсув» Республика санаторийсига 12 апрель куни соат 12:00да 1991 йилда туғилган фуқаро М.Н. киришга уринган.
Ушбу фуқароларга яна бир бор карантин қоидалари тушунтирилиб, белгиланган тартибда маъмурий баённома тузилган. Карантиндаги фуқароларнинг хавфсизлигини таъминлашда юксак масъулиятни тўла ҳис қилган ҳарбийлар хизмат жойининг ўзида тақдирланган.
