Бухоро-Самарқанд-Тошкент йўналишида “Афросиёб” электропоезди қатнови йўлга қўйилади

Эрталабки соат 5:00 да Бухоро вокзалидан жўнаб, эрталабки соат 8:48 да Тошкент марказий вокзалига кириб келади

Жорий йилнинг 1 июль кунидан бошлаб Бухоро-Самарқанд-Тошкент йўналиши бўйлаб юқори тезликда ҳаракатланувчи “Афросиёб” йўловчи электропоезди қатнови йўлга қўйилади.

№766/765-сонли поезд ҳар куни эрталабки соат 5:00 да Бухоро вокзалидан жўнаб, эрталабки соат 8:48 да Тошкент марказий вокзалига кириб келади. Шу куни кечки соат 18:50 да ортга қайтган поезд тунги соат 22:48 да Бухорога етиб боради. 

Шу муносабат билан 1 июль кунидан бошлаб Тошкент-Қарши-Тошкент ҳамда Тошкент-Бухоро-Тошкент йўналишларида ҳаракатланаётган “Афросиёб” йўловчи электропоездларининг ҳаракатланиш вақтига ҳам ўзгартириш киритилди.

Тошкент-Қарши-Тошкент йўналишида ҳаракатланадиган №760/759-сонли “Афросиёб” йўловчи электропоезди ҳар куни эрталабки соат 8:00 да Тошкент марказий вокзалидан жўнаб, кундузги соат 11:20 да Қаршига етиб боради ва шу куннинг ўзида кундузги соат 16:48 да Қарши вокзалидан ортга қайтиб, кечки соат 20:10да Тошкентга етиб келади.

Тошкент-Бухоро-Тошкент йўналишида ҳаракатланадиган №762/761-сонли электропоезд ҳар куни эрталабки соат 7:30 да пойтахтдан жўнаб, кундузги соат 11:16 да Бухорога етиб боради ва шу куни кундузги соат 15:52 да Бухородан ортга қайтиб, кечки соат 19:40да Тошкентга етиб келади.

Шунингдек, 1 июль кунидан бошлаб бир қатор йўловчи поездларнинг ҳаракатланиш жадвалига ҳам ўзгартиришлар киритилди.