Тошкентдан Бухорога 8 мингдан ортиқ «Трамадол» таблеткасини олиб кетаётган шахс қўлга олинди
Давлат хавфсизлик хизмати томонидан олиб борилган тезкор тадбирлар натижасида гиёҳвандлик воситалари савдоси билан шуғулланувчи шахслар фаолиятига чек қўйилди.
Жумладан, «Тошкент—Бухоро» йўналишида ҳаракатланиб келаётган фуқаро Лазиз Мустафоевга тегишли Lacetti автомашинаси Ғиждувон туманидаги «Сармижон» назорат постида тўхтатилиб, кўздан кечирилганда, машинанинг орқа ўриндиғида гиёҳвандлик воситалари тоифасига кирувчи 8080 дона «Трамадол» таблеткаси борлиги аниқланди.
Шунингдек, Сирдарё вилояти Сирдарё тумани ҳудудида ҳаракатланаётган Cobalt русумли автомашина тўхтатилиб текширилганда, унинг юкхонасидан 1980 дона «Трамадол» таблеткаси топилди. Маълум бўлишича мазкур автомобиль эгаси Тошкент шаҳридан олинган ушбу гиёҳвандлик воситаларини мамлакатнинг шимолий минтақасига етказиб бериши керак бўлган.
Тошкент шаҳрининг Чилонзор туманида ҳаракатланаётган ВАЗ-2106 автомашинаси тўхтатилиб, кўздан кечирилганда, унинг салонида 3000 дона «Трамадол» таблеткаси борлиги аниқланди.
