Ўзбекистон ТИВ-и Ҳиндистон ва Бангладешдаги ўзбекистонликларни огоҳлантирди
Ўзбекистоннинг Ҳиндистондаги элчихонаси берган маълумотларга асосланиб, Ўзбекистон Ташқи ишлар вазирлиги Ҳиндистоннинг Одиша штати ва Бангладешнинг қатор ҳудудларига ёпирилган «Фани» циклони натижасида 2 миллиондан ортиқ киши хавфли зонадан эвакуация қилинганини эълон этди.
«Икки мамлакатда ўнлаб кишилар табиий офат қурбони бўлди, минтақада давлат идоралари, аэропортлар ёпилди, поездлар ва бошқа транспорт воситалари ҳаракати тўхтатилди», — дейилади хабарда.
Шу муносабат билан Ўзбекистон Ташқи ишлар вазирлиги Консуллик-ҳуқуқий департаменти Ҳиндистон ва Бангладешнинг юқорида кўрсатилган минтақаларида бўлиб турган Ўзбекистон фуқароларига «Фани» циклони таъсиридаги ҳудудларига боришни вақтинчалик тўхтатишларини тавсия қилади ва Нью-Деҳли шаҳридаги Ўзбекистон элчихонасининг телефон рақамларини эслатади: (9111) 24670774, 24670775, 24105640.
