Ռուսաստանի ԱԻՆ–ը Բեյրութի օդանավակայան է հասցրել 19 տոննա մարդասիրական օգնություն
Մարդասիրական գործողությունն իրականացվել է ՌԴ նախագահ Վլադիմիր Պուտինի կարգադրությամբ և ՌԴ ԱԻՆ ղեկավար Ալեքսանդր Կուրենկովի հանձնարարականով։
ՌԴ ԱԻՆ Իլ-76 տրանսպորտային ինքնաթիռը Բեյրութի միջազգային օդանավակայան է հասցրել 19 տոննա մարդասիրական օգնություն։ ՌԻԱ Նովոստիին այս մասին հայտնել են նախարարության մամուլի ծառայությունից։
Գերատեսչությունում պարզաբանել են, որ հատուկ ինքնաթիռը Բեյրութ է հասցրել ավելի քան 19 տոննա ընդհանուր քաշով մարդասիրական բեռ, որը ներառում էր առաջին անհրաժեշտության ապրանքներ և դեղամիջոցներ։
Նույն ինքնաթիռով Լիբանանից, ՌԴ ԱԳՆ-ի հետ համաձայնեցնելով, տեղափոխվել է 97 ռուսաստանցի, որոնք տուժել էին հանրապետության տարածքում Իսրայելի հարվածներից։
Հիշեցնենք` Իսրայելը հոկտեմբերի 1-ից Լիբանանի հարավում ցամաքային գործողություն է իրականացնում «Հզբոլլահի» ուժերի դեմ և շարունակում հրթիռակոծել հարևան երկիրը, որտեղ արդեն ավելի քան 2 հազար մարդ է զոհվել, ավելի քան մեկ միլիոն անձ փախստական է դարձել:
Իրավիճակը սրվեց սեպտեմբերի 17-ին և 18-ին Լիբանանի տարբեր շրջաններում կապի միջոցների զանգվածային պայթյուններից հետո, որոնց հետևանքով տասնյակ մարդիկ մահացան, շուրջ 3 հազար քաղաքացիներ վիրավորվեցին: Ավելի ուշ իսրայելական ավիացիան հարվածեց Բեյրութի հարավային արվարձանում գտնվող բնակելի շենքին, ինչի հետևանքով մահացավ ավելի քան 50 մարդ:
