«Բալթիկայում իրավիճակն այժմ ավելի վտանգավոր է, քան սառը պատերազմի ժամանակ». Ֆինլանդիայի նախագահ
«Ֆինլանդիայի նախագահ Սաուլի Նինիստյոն Եվրոպայում հայտնի է հարեւան Ռուսաստանի հետ կայուն հավասարակշռություն պահպանելու կարողությամբ»,- EL PAÍS-ում գրում է լրագրող Բելեն Դոմինգես Սեբրիանը:
Հարցազրույցում նա խոստովանել է, որ Բալթիկ ծովի տարածաշրջանում իրավիճակը մի քանի տեսանկյուններից ավելի վտանգավոր է, քան սառը պատերազմի ժամանակաշրջանում:
Հեղինակի խոսքերով՝ Ֆինլանդիայի՝ ՆԱՏՕ-ին անդամակցելու վերաբերյալ հանրաքվեն լայնորեն քննարկվում է նախագահական ընտրությունների նախօրեին: Նինիստյոն հարցազրույցի ժամանակ չի պատասխանել հարցին, թե տեղի կունենա՞ արդյոք հանրաքվեն:
«Այս անգամ մենք չենք ասում՝ «ոչ ՆԱՏՕ-ին», նշում է նախագահը՝ վստահեցնելով, որ իրեն ավելի հարմարավետ է զգում Եվրամիության գործընկերների եւ հարեւան Շվեդիայի հետ ռազմական համագործակցության պաշտպանության ներքո»:
«69-ամյա Նինիստյոն վստահեցնում է, որ իր համար կարեւորը հանրաքվեի լեգիտիմությունն է»,- գրում է հեղինակը: «Ըստ վերջին տվյալների՝ Ֆինլանդիայի քաղաքացիների 22 տոկոսը կողմ է ՆԱՏՕ-ին անդամակցելուն, 59 տոկոսը՝ դեմ»: «Հիմա հանրաքվեն անցկացնելու համար հարմար հասարակական մթնոլորտ չէ: Բայց ես դեմ չեմ»,- նշում է նախագահը:
«Երկրի ղեկավարի լավ հարաբերությունները Ռուսաստանի նախագահ Պուտինի հետ ողջունելի են հարեւան հյուսիսային երկրների եւ Բալթյան երեք երկրների համար, որոնք մտնում են ՆԱՏՕ-ի կազմի մեջ»: Նինիստյոն հարցազրույցի ընթացքում ասել է. «Պուտինի հետ հարաբերություններում ես բացարձակ անկեղծ եմ: Նա հստակ գիտի, թե ես ինչ եմ մտածում, եւ ես հստակ գիտեմ, թե ինչ է մտածում նա: Ռուսների հետ հարաբերություններում պետք է հստակ հասկացնել, թե ինչ ես ուզում նրանցից»:
Նինիստյոն հայտարարել է. «Եթե այդ գոտում՝ Եվրոպայի արեւելքում, ռազմական հակամարտություն սկսվի, սցենարը նման կլինի Երկրորդ համաշխարհային պատերազմին: Եվ դա գիտեն բոլորը»:
«Ֆինլանդիայի նախագահը կարծում է, որ այդ դեպքում բոլորը կպարտվեն: Նա բացառում է Ֆինլանդիա ռուսաստանյան ռազմական միջամտությունը, քանի որ Պուտինին դա չի հետաքրքրում, բայց անհանգստություն է հայտնում կիբերնետիկ սպառնալիքի մասին, որը գալիս է արեւելքից»:
Աղբյուր՝ EL PAÍS
