Ռուսաստանն ու Չինաստանը զգուշացրել են ԱՄՆ-ին
Ռուսաստանն ու Չինաստանը բողոքել են Կորեական թերակղզում ԱՄՆ-ի և Հարավային Կորեայի օդուժի լայնածավալ զորավարժության անցկացման դեմ:
«Ռոյտերս» լրատվական գործակալության հաղորդման համաձայն, Մոսկվան ու Պեկինն առանձին հաղորդագրություններ հրապարակելով, սադրիչ են բնութագրել տարածաշրջանում ԱՄՆ-ի ու Հարավային Կորեայի օդուժի համատեղ զորավարժությունը և երկու երկրին կոչ են արել հրաժարվելով այդ զորավարժությունից, նպաստել Կորեական թերակղզում խաղաղության ու կայունության հաստատմանը:
Չինաստանն ու Ռուսաստանն ավելի վաղ առաջարկել էին, որ Հյուսիսային Կորեայի սպառազինական ծրագրի դադարեցման դիմաց, ԱՄՆ-ն ու Հարավային Կորեան հրաժարվեն համատեղ զորավարժությունների անցկացումից:
Չնայած զգուշացումներին, երկուշաբթի օրը, ավելի քան 230 կործանիչների մասնակցությամբ, մեկնարկել է ԱՄՆ-ի և Հարավային Կորեայի օդուժի համատեղ զորավարժությունը, որը շարունակվելու է մինչև ուրբաթ օրը:
Փխենյանը բազմիցս քննադատել է Կորեական թերակղզում բռնությունը կանխելու հարցում ԱՄՆ-ի երկակի վերաբերմունքը և հայտարարել է, որ Վաշինգտոնը պետք է հրաժարվի Հյուսիսային Կորեայի դեմ իր թշնամական քաղաքականություններից, այդ թվում Փխենյանի միջուկային կարողությունը ոչնչացնելու քաղաքականությունից: