Դեպի Միջին Արևելք զորաշարժն ԱՄՆ-ի պատմական ամենամեծ սխալն էր. Թրամփ
ԱՄՆ նախագահը Միջին Արևելքում իր երկրի ռազմական միջամտությունը համարել է ԱՄՆ-ի պատմական ամենամեծ սխալը:
ԱՄՆ նախագահ Դոնալդ Թրամփը «Հիլ» հեռուստատեսությանը տված հարցազրույցում, այս մեծ սխալի համար պատասխանատու ներկայացնելով ԱՄՆ նախկին նախագահ Ջորջ Բուշին, ասել է. «Միջին Արևելքում ռազմական գործողության Բուշի որոշումն ԱՄՆ-ի պատմական ամենամեծ սխալն էր»:
«Նախկին նախագահ Բորաք Օբամայի օրոք այդ տարածաշրջանից ամերիկացի զորայիններին հեռացնելն էլ մեկ այլ սխալ է համարվում»,-հայտարարել է Թրամփը:
Թրամփի ընդգծմամբ, Միջին Արևելքում ԱՄՆ-ի ռազմական միջամտությունը 7000 միլիարդ դոլար է արժեցել այդ երկրի համար և հանգեցրել է միլիոնավոր մարդկանց զոհվելուն:
ԱՄՆ-ի «Բրաուն» համալսարանում իրականացված ուսումնասիրության արդյունքների համաձայն, Իրաքում ու Աֆղանստանում պատերազմների, նաև Պակիստանի ու Սիրիայի հետ կապված ռազմական քայլերի ծախսերը կազմել են շուրջ 5600 միլիարդ դոլար:
ԱՄՆ պաշտպանության նախարարության հայտարարության համաձայն Վաշինգտոնը 2001-ից 2008 թվականների կտրվածքում Իրաքում ու Աֆղանստանում պատերազմներին հատկացրել է 1520 միլիարդ դոլար:
Թրամփն այն պայմաններում է քննադատում ԱՄՆ նախկին նախագահների կողմից պատերազմների հրահրումը, երբ ինքը շարունակելով Իրաքում, Սիրիայում ու Աֆղանստանում ԱՄՆ-ի ռազմական ներկայություն, բազմիցս արտահայտվել է այլ երկրների, այդ թվում Հյուսիսային Կորեայի դեմ ռազմական հարձակման մասին:
