د ایران او د خوست ولایت چارواکو سلامشورې وکړې
صدای افغان خبري اژانس وايي په کابل کښې د ایران د اسلامي جمهوریت د سفارت مرستیال خوست ولایت ته په سفر کولو سره د دغه ولایت له چارواکو سره د ملګرتیاو د زیاتولو په هکله د نظر تبادله وکړه.
د افغانستان د خوست ولایت د والي محمد نبي عمري په بلنه ختیځ ولایت خوست ته چې تر څو میاشتو پورې د افغانستان تر ټولو ناامنه سیمه وه په افغانستان کښې د ایران د سفیر د مرستیال سید حسن مرتضوي لومړی سفر ډیره د پام وړ موضوع ده.
له دغه سفر سره په یووخت ایران د افغانستان د خوست او د پکتیا ولایت په څه د پاسه زرو اړمنو کورنیو بشر دوستانه خوراکي مرستې وویشلې.
خوست ته د ایران د اسلامي جمهوریت د سفارت د چارواکو په سفر کښې د دغه ولایت د تجارتي او د اقتصادي ظرفیتونو د لیدو په ترڅ کښې دواړو لورو په خوست ولایت کښې د ایران د تاجرانو د شتون او د تجارت د پراخولو د کار د پیلیدا په هکله بحث او خبرې وکړې او د خوست چارواکو د دغو اړیکو د پراخولو لپاره خپل چمتووالی اعلان کړ.
د افغانستان ختیځې سیمې د ډیر واټن د لرلو او هلته د امنیت د نشتون په وجه تل د ایران د اسلامي جمهوریت او د افغانستان د راشه درشه په چوکاټ کښې له کوم مقام څخه برخورې نه وې خو په تیرو میاشتو کښې د افغانستان ننګرهار او خوست ولایتونو ته د ایران د چارواکو دغه سفرونه د دې ښودنه کوي چې ایران په هراړخیزه او جدي کتنې سره په افغانستان کښې نوي ډيپلوماسۍ تعقیبوي.
دا په داسې حال کښې دي چې خوست ولایت ته د ایران د ډيپلوماټیک پلاوي له سفر سره په یووخت د دغه ولایت په خلکو باندې د ایران د خیرینو بشر دوستانه مرستې وویشل شوې .
له افغانستان سره د ایران د اسلامي جمهوریت د مومنانه مرستو په دغه پړاو کښې په خوست او پکتیا ولایت کښې له زرو(۱۰۰۰) بې وزله کورنیو سره د ایران مرستې وشوې.
په تیرو لسو میاشتو کښې د ایران اسلامي جمهوریت د افغانسان له کابو پنځوس زره (۵۰۰۰۰)ضرورتمنو او اړمنو کورنیو سره مومنانه مرستې کړي دي.
