د تاریخي آبداتو د ساتنې په تړاو د سرپرست حکومت مکلفیت
د سرپرست حکومت د اطلاعاتو او کلتور وزیر خیرالله خیرخواه ویلي چې د افغانستان د تاریخي آثارو ساتنه د دوی د حکومت له مکلفیتونو څخه ده.
نوموړي په کابل کې د آغا خان بنسټ د تاريخي آبداتو د څانګې له مشر سره په کتنه کې ویلي چې د هېواد تاريخي آبدات، د افغانانو د لرغوني تاريخ، اصلي کلتور او ملي هويت څرګندونه کوي.
په ورته وخت کې؛ داطلاعاتو کلتور وزارت وياند حبيب غفران هم ویلي چې: پر هغو پروژو خبرې وشوې چې کار روان دى، په هرات کې د جامع جومات بيارغونه، د خواجه عبدالله انصاري زيارت چې په دې ولایت کې د وروستیو زلزلو له امله زيانمن شوی دی، همدارنګه په غزني ولایت کې د باباجي جومات بیارغونه او د کابل په بالاحصار کې د لرغوني پارک د جوړښت چارې دي.
تر دې مخکې هم د سرپرست حکومت چارواکو ژمنه کړې وه چې د افغانستان د تاریخي آثارو د ساتنې او پالنې لپاره به هڅې کوي.
دوی ویلي چې دا مهال د بیارغونې یوویشت پروژې په لاس کې دي، چې پر یوولسو پروژو کار روان دی او د لسو نورو پروژو کار به هم ډېر ژر پیل شي.
